بورصة السلع بالدارجي السوداني
تعال ياخينا لو سمحت،بسمع الايام دي كتير بحاجة اسمها بورصة السلع دايرك تنورني بيها لاني ما فاهم حاجة، بس حاسي انه الموضوع مهم لي انا كمزارع وداير ابيع محاصيلي بسعر كويس.
تعال ياخينا لو سمحت،بسمع الايام دي كتير بحاجة اسمها بورصة السلع دايرك تنورني بيها لاني ما فاهم حاجة، بس حاسي انه الموضوع مهم لي انا كمزارع وداير ابيع محاصيلي بسعر كويس.
طيب يا حاح بورصة السلع دي منظومة متكاملة تقدر من خلالها تبيع وتشتري اي سلعة او محصول ممكن يتخزن، وحتلاقي فيها مستثمرين دايرين يشتروا سلع ويصدروها للخارج وانت بتستفيد والبلد بتستفيد.
دقيقة دقيقة انا بستفيد كيف ياولدي، تمام ياحاج حاشرح ليك، انت حاليا بتزرع شنو، انا بزرع سمسم، تمام شديد، زي ما انت عارف المشكلة الواقع فيها معظم السودانيين انك لمن تزرع وتتعب وتحصد واكيد بتكون داير سعر كويس لمحصولك.
البحصل انك بتشيل انتاجك للسوق وهناك حتلقي سماسرة كبار وهم الوحيدين البسعروا المحاصيل حتى في الخضار والفواكه، حتضطر انت ولانك متضايق بسبب دين البنك الشلتو تقوم تبيع بالسعر بتاعهم وفي الحالة دي هم المستفيدين وانت كانك تعبت في الفاضي وسنة سنتين وغالبا تخلي الزراعة وتتجه لمشروع تاني
بالضبط يا ولدي ده الحصل لجاري سنتين وساب الارض وباعها كمان.
طيب ياحاج بورصة السلع بتديك سعر عادل وعالمي لمحصولك، كل الحتعملوا بعد الحصاد حتشيل شوالاتك وتمشي بيها مخزن البورصة وده مخزن معمول بمواصفات محددة لتخزين السلع بطريقة منظمة وغالبا المخازن بتتعمل قريب من مناطق الزراعة.
طيب ياحاج بورصة السلع بتديك سعر عادل وعالمي لمحصولك، كل الحتعملوا بعد الحصاد حتشيل شوالاتك وتمشي بيها مخزن البورصة وده مخزن معمول بمواصفات محددة لتخزين السلع بطريقة منظمة وغالبا المخازن بتتعمل قريب من مناطق الزراعة.
وهناك يسلموك ورقة (شهادة ملكية) فيها الصنف بتاع محصولك بعد ما يعرفوا تفاصيله سمسم ابيض ولا سمسم احمر، فول نقاوة ولا عادي وكده، ويشيلوا المحصول يخزنوه معاهم في المخزن وبسجلوا اسمك وتفاصيل محصولك.
وبعد ده لو عايز تبيع محصولك ما عليك إلا تمشي بورصة السلع وتبيع بالسعر العالمي لانه البورصة اتعملت لي كده انها تديك سعر عادل حسب العرض والطلب، معليش يا ولدي ابيع لمنو وكيف القاهو ؟
انت ياحاج ما بتبيع مباشرة وانما عن طريق شركات وساطة مالية متخصصة في الشغل ده ما عليك إلا تديهم الشهادة وتوقع معاهم تفويض وهم البعملوا ليك البيع في أنظمة البورصة وبدوك اخطار انو محصولك اتباع بالسعر العالمي بتاع البورصة.
وكده ما حتعرف زاتو الاشتري منك منو، الزول البشتري محصولك ممكن يصدرو خارج البلد او يستعمله في مصنع او اي غرض هو عايزو، ومكن كمان اي مستثمر اجنبي داير يشتري اي كمية ما عليه إلا يمشي او يتصل بالبورصة ويشتري الكمية الطالبها وكده حتجينا عملة صعبة من عمليات الشراء للشركات والمستثمرين.
ولو ما عايز تبيع، عادي ممكن تحتفظ بالشهادة دي وممكن تتعامل بيها لو داير تشتري اي حاجة تانية او تدخل بيها كضمان للبنك عشان يسلمك تمويل إضافي تزرع بيه تاني وتالت ورابع ، والكلام ده كلله وحقك محفوظ في حالة اي وقت داير تبيع شهادتك في البورصة.
الكلام ده كله ياعمنا حيلغي لينا السماسرة الشغالين يسعروا من رأسهم ساي ويبخسوا مجهود الناس بطريقة عشوائية وكدا حيكون في سعر عادل واكيد حتكون في عدالة لأي مزارع زرع محصول ولو كمية بسيطة، يعني الزول الزرع الف فدان حيبيع بسعر واحد زي الزول العنده ربع فدان.
انت ياولدي كده طلعت بي القمر عديييل وخليتي اسرح بعيييد، هل الكلام دا ممكن يحصل لأي محصول بتزرع؟ ايوا يا حاج ممكن يتعمل لأي محصول ممكن يتخزن. وقريب جدا البورصة دي حتتعمل في السودان ، يعني ما حتكون سرحان تاني
واكيد في بلدنا دي عندنا محاصيل كتيرة ضايعة ساي، يعني البلد والمواطنين ما مستفيدين من عائدها، مثلا لو عملنا الشغل دا في محاصيل زي السمسم والكركدي والفول السوداني و، و، وحتى الصمغ العربي بنقدر نتحكم في عمليات بيعه بدل ما شغال يتهرب بطريقة عشوائية ونحن عارفين انه مطلوب في كل العالم.
بورصة السلع دي بتعمل عدالة اجتماعية لكل المجتمع، انت مستفيد والأرض مستفيدة والبلد مستفيدة والعالم كله مستفيد، وكدا حنقدر نوصل محاصيلنا وسلعنا لأي زول في العالم وأهم شي زي ما بنكرر ونعيد بسعر عااااااااااااااادل.
جاري تحميل الاقتراحات...