رتبها

"المصالحة الخليجية"
ليه الرئيس #السيسي محضرش القمة الخليجية وليه ولي عهد الامارات الشيخ محمد بن زايد محضرش القمة الخليجية وهل دول الرباعي هتتصالح مع قطر ؟ وهل هي فعلاً مصالحه كامله؟
وهل في علاقه للي بيحصل بين ايران وامريكا دلوقت ؟
وهل #مصر ممكن تتصالح مع #قطر ولا مستحيل؟
يتبع👇👇

في البداية أول حاجة لازم تكون عارفها هي ان مصر اول دولة كانت مقاطعه لقطر من 2013 وبعدها انضم ليها دول المقاطعه والدول هي السعودية والإمارات والبحرين واليمن وجزر المالديف وجزر القمر في 2017
يعني لو كل الدول اتصالحت وفضلت مصر مقاطعه قطر عادي لأن ف البداية كنا مقاطعينها لوحدنا👇

ولكن هي ليه انضمت الدول دي للمقاطعة من البداية وليه دلوقت بتتصالح
السعودية والإمارات والبحرين كانوا من البداية سمنه ع عسل مع قطر والعلاقات حلوة وجميلة
ومكنوش مصدقين اللي مصر بتقوله ع قطر
وكانوا متفقين مع بعض في عدد من القضايا في المنطقة منها سوريا مثلاً وكانوا مختلفين مع مصر 👇

مصر حتي لو معارضة نظام بشار فهي شايفه أهمية وجوده للحفاظ علي سوريا من مخطط التقسيم وسيطرة الإرهابيين عليها
لكن السعودية وقطر وقتها كانوا بيحاربوا بشار وبيمولوا الضربات الأمريكية ضده لمجرد ان إيران بتساعده وعشان الاتهامات بأنه شيعي
وكمان قطر كانت جزء من التحالف العربي👇

اللي بيحارب في اليمن ضد الحوثيين التابع للحرس الثوري الإيراني
اللي حصل هو أنه تم طرد قطر من التحالف العربي ف اليمن
طول عمر مصر بتقولهم ان قطر بتدعم الإرهاب قطر بتمولهم بالفلوس قطر هي اللي انشأت الجماعات دي ومحدش منهم عايز يصدق👇

ان قطر هي اوس الخراب والدمار في المنطقه كلها زي مصر ما كانت بتقولهم
لحد مصر ما قدمت للسعودية والإمارات والبحرين مستندات مهمة وملفات عن محاولات قطر للانقلاب علي السلطة في السعودية وزعزعة الأمن والاستقرار في الامارات والبحرين بمساعده إيران والتنظيمات الإرهابية👇

مش كدا وبس ده كمان ان قطر اللي هي اصلا مشتركة في التحالف العربي في اليمن هي إللي بتسرب معلومات عن أماكن القوات العربية للإرهابيين الحوثيين اللي تبع إيران وعناصر القاعدة إللي تبع الإخوان وخسرت السعودية والإمارات عدد من الجنود
وكمان دعمها للتنظيمات الإرهابية في ليبيا وسوريا👇

وفي 2017 عمر غباش سفير دولة الإمارات في روسيا خرج وقال ان بلاده عندها معلومات بالصوت والصورة ان قطر سربت معلومات الي عناصر تنظيم القاعدة في اليمن عن أماكن تمركز القوات الأماراتية
وان ف الوقت ده كانت الأمارات بتجهز لتوجيه ضربة للتنظيم داخل اليمن👇

ولكن فوجئت بعملية انتحارية ضد القوات وادي الي استشهاد عدد منهم
ومن هنا الرباعي العربي اتأكد من اللي مصر بتقوله بقالها سنين ان قطر هي السبب في كل اللي بيحصل في الوطن العربي
وبدأت المقاطعة لقطر وبدأ الرباعي العربي أخيرا يقتنع بكلام مصر👇

وهو الحفاظ علي وحدة الأراضي العربية في سوريا وليبيا واليمن ومن يوم المقاطعة وبدأ الجيش السوري يحقق انتصارات ف سوريا ويطرد الميليشيات وبدا الجيش الليبي يحقق انتصارات في ليبيا
والجيش العراقي قضي ع وجود داعش
لما الجيوش بدأت تهزم الإرهابيين وخلاص سوريا هتبقي مستقرة وليبيا مستقره👇

ظهرلنا مين بقي؟
تركيا ماهو لو الجماعات الإرهابية دي اتهزمت والدول دي استقرت كدا مشروع قطر وتركيا فشل
ودخلت تركيا سوريا وليبيا تحارب الجيوش العربية بدل التنظيمات الإرهابية اللي اتهزمت
المهم نرجع لقطر
لما اتقطعت العلاقات بدأ الاقتصاد القطري يتأثر بالمقاطعة ويخسر فلوس كتير👇

ده غير حركة الملاحة الجوية اللي وقفت مع الدول الأربعة فبدأت قطر تعمل حركات استفزازية لدول الرباعي
شغل عيال صغيرة
قطر راحت جابت إيران اللي عدو لدول الخليج كلها والإمارات والسعودية والبحرين بالاخص ودخلتهم وقعدتهم في قطر
وراحت جابت تركيا وعملت قاعده عسكرية في قطر 👇

وبقت تهديد واضح للأمن العربي
جات الكويت وقالت نعمل مصالحة يا جماعة ونشوف حل وسط
اتحط 13 شرط عشان يكون في مصالحه وقطر تنفذ الشروط دي ف خلال 10 أيام
كان رد قطر ايه بقي انها بترفض الشروط دي وانها بتمس سيادتها واستقلالها👇

يعني تنفيذ الشروط بتمس سيادتها لكن وجود قاعدة أمريكية وقاعده تركية وقوات إيرانية ع أرضها ده مش بيمس سيادتها واستقلالها
طيب هل بقي قطر وافقت ع الشروط دي عشان كدا دلوقت دول الخليج بتتصالح ؟ اه وافقت وسياستها الفتره الجايه هتتغير المفروض👇

طب ليه الرئيس السيسي وولي عهد الامارات محمد بن زايد محضروش لان ببساطه لسه قطر ما نفذتش وعودها وبالتالي لما تبقي قطر تظهر حسن نيتها وتبدأ تنفذ الشروط ساعتها نبقي نقعد كلنا زي الرئيس السيسي ما قال كدا بالظبط أهمية الالتزام بالنوايا الصادقة لتحقيق المصلحة المشتركة👇

وعدم التدخل في الشؤون الداخلية والله حضرتك ملتزم يبقي في مصالحه لكن من الآخر مصر والإمارات شايفين ان قطر مش هتلتزم بالاتفاق ده وسياستها مش هتتغير عشان كدا محضروش
من وجهة نظري ان المصالحة دي لها علاقة كبيرة باللي بيحصل دلوقت بين إيران وامريكا وهقولك ازاي👇

بص يا سيدي المصالحة دي برعاية أمريكية كويتية
وحضرها كوشنر مستشار ترامب وهو اللي لف علي كل الدول وعمل المفاوضات عشان يحل المشكلة مع قطر
وزي مانت عارف ان إيران هي العدو الأول للدول الخليجية وامريكا بتحاول توصل لدول الخليج انها هي اللي بتحميهم من خطر ايران 👇

وانهارده إيران بتعمل مناورات عسكرية كبيرة في مياه الخليج
وبالتالي السعودية شايفه ان وجود إيران ف اي مكان حواليها هو خطر كبير عليها
زي مانت شايف وجود تركيا في اي مكان حواليك هو خطر كبير عليك
وطبعا انتوا شوفتوا كلام الأمير محمد بن سلمان بعد المصحاله عن أن إيران دلوقت هي العدو 👇

ولازم يشتركوا في ردعه ويحطوا حد لبرنامجه النووي
ده غير ان في حالة توجيه ضربة عسكرية لإيران ممكن إيران ترد علي اي قاعدة أمريكية موجوده داخل دول الخليج
خصوصاً ان في أكبر قاعدة أمريكية في قطر
وفي قاعده في الامارات والكويت والسعودية والبحرين👇

طب هل السيسي ممكن يتصالح مع قطر ؟
وزير الخارجية المصري انهارده سامح شكري وقع ع الاتفاق زيه زي باقي الدول العربيه الأربعة بالظبط وهو اتفاق العلا اللي يدعوا الي تحقيق الشروط وعدم المساس بامن الدول الداخلي والعمل ع وحده الصف العربي وتماسكها وعدم شق الصف👇

ولكن الموضوع اشبه بأنه تهدئة للأمور مش مصالحه بالمعني الكامل ليها
واحد هيقولي طب ودم الشهداء بص مصر مش بتسيب حقها ولا تار ولادها ومش معني انك مثلاً اتصالحت يبقي خلاص العلاقات هتبقي زبادي خلاط ولكن انت بتحاول توصل لاقصي استفاده ف الوقت الحالي👇

انا واحد من الناس اتمني ان ال 13 شرط يتنفذوا ويكون في مصالحة تخيل معايا كدا تصحي تاني يوم مفيش قناة الجزيرة بتتكلم عليك مفيش قنوات إخوان ليل نهار بتنشر سمومها للشعب مفيش قنوات وصفحات بتربي اجيال كاملة ع الكره لبلدها وجيش بلدها👇

مفيش إشاعات كل يوم مفيش تسخين للناس مفيش تشويه للمشروعات مفيش شهداء تاني مفيش دعم لإثيوبيا عشان تقفل عليك المايه مفيش دعم لتركيا وفلوس عشان تهددك في الغرب مفيش تمويل للإرهابيين في سيناء مفيش تسخيين لمنظمات حقوق الإنسان وأوروبا وريجيني .. وتستلم كل الإرهابيين وتحاكمهم هنا👇

وبالتالي هتلاقي الدولة المصرية بدل ماهي مشغوله وملهيه في 50 ملف إرهاب وليبيا وسد النهضه وريجيني وحقوق الإنسان واشاعات وتشويه وغيره هتلاقي الدولة المصرية مركزه بس البناء والتنميه هتلاقيها مركزه ف مشاكلها الداخليه وبس هتلاقي الشعب بيشوف اللي بيحصل ف البلد بدون تشويه بدون اشاعات👇

ولكن انا متوقع ان الاتفاق مش هيتنفذ وقطر سياستها مش هتتغير القنوات دي مش هتتقفل ولا ولا الجزيره هتغير طريقتها
ولكن ادينا قاعدين مستنيين وهنشوف ..
"سأظل أقول كل الثقه في الرباعي العربي فقط"..✌️🇪🇬🇸🇦🇦🇪🇧🇭
#تحيا_مصر ✌️🇪🇬
#مصر_قاطره_العروبه
#abdallah_hebeshy✍️✍️

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد