كنت كلمتكم هنا عن صاحب عمر لي توفي الله يرحمه كان متعود لما حد مايعرفوش يسأله علي حاجة يحط وسط الكلام شتيمة والتاني مايخدش باله وأن ليه قصة حب ولا قيس وليلي وازاي حب بنت جميلة في سنة سادسة ابتدائي وهو كان مخلص ثانوي واهلها خبوها منه. ازاي ؟
القصة دي بدات في اول الستنيات . جزء كبير منها كتبته في روايتي طيور العنبر. اللي ماكتبتوش ليلة غناء ام كلثوم لاغنية الاطلال لان زمن الرواية خلص قبلها. كنت انا وهو سهرانين عند صديق تاني اجن بنسمع وهو سرحان اكتر مع الاغنية وانا عارف انه حزين لانهم خافيين البنت عنه
مش خفوها وبس وقعدوها كمان من المدرسة . خلصت الاغنية وقال لازم اشوفها النهاردة . انا حاروح الحضرة عند بيت خالها انا عارفه يمكن تكون هناك. مانمناش وخدني معاه. ليه؟ للاتي . وصلنا البيت وكان في شارع شعبي اوي نسيت اسمه كل دور فيه غرف ودورة مياه عمومة للدور .
رحنا بدري الساعة سابعة الصبح قعد علي قهوة قريبة شوية وشاور لي علي البيت وقال لي اطلع انت السلم وانزل كذا مرة وبص علي الصالة يمكن تكون خارجة رايحة الحمام تشوفها وتبلغها اني هنا . دخلت البيت وطلعت السلم ونزلت وطلعت تاني ابص علي الصالة
واحد من السكان كان في حوالي الاربعين وانا صغير ونحيل جدا ساعتها شك في وسالني انت جاي لمين بدري كدا . تعرف حد هنا . ارتبكت وافتكرت ان احنا قبل حفلة ام كلثوم سمعنا اغنية الجندول للشاعر علي محمود طه بصوت عبد الوهاب ودي من الاغاني الحلوة اوي
قلت له انا جاي للاستاذ علي محمود طه اللي ساكن في شارع الجندول . قال لي مافيش حد بالاسم دا ولا الشارع اسمه كدا انزل دور علي الشارع . نزلت كاتم الضحك ورحت له القهوة حكيت وانا باضحك ورجعنا وفي السكة قال لي لازم الاقيها . جدها عايش في باكوس حاروح لها هناك
باكوس ساعتها كانت فاضية فيها كام عمارة وصحرا وشركة نسيج وشركة بيبسي بعيد عن البيوت القليلة . المهم قابلته بعد كام يوم فرحان قال لي لاقيتها. ازاي . قال لي رحت بدري عند الكام بيت المبنيين لاقيت محل فول وفلافل وقفت قريب منه قلت يمكن تكون جاية تشتري فول
شوية ولاقيتها جاية معاها طبق فيه قرش صاغ اول ما شافتني اترعشت والصاغ باه يرن في الطبق وقفت بعيد واشترت الفول وفي السكة كلمتها واتفقنا نتقابل في النزهة بكرة . واتقابلو كذا مرة لحد ماجدها عرف انها مش بتروح لاهلها لما تستاذن منه وشك فيها وخفوها تاني
المهم حكاية طويلة لحد ما اعترفوا بيه وزي ماقلت يوم الجواز مات عبد الناصر قبلها وقفلوا مسارح الافراح واتجوزوا في البيت وذاكرت ودخلت الجامعة واتخرجت وخلفوا . اكتر من سبع سنين حب مجنون وحكايات تانية تموت من الضحك علشان يشوفها كتبتها في طيور العنبر . ولا قيس وليلي ولا قيس ولبني
جاري تحميل الاقتراحات...