زيدان بيرمي نفسه في نار اللاعبين، بيدافع عن المجموعه اللي يمتلكها ليل نهار علشان عارف قدراتهم وعارف انهم لو قدمو مستوى كبير معناها نجاحه، في نفس الوقت لما بيقعو هو كمان بيقع معاهم علشان كده مبقتش استغرب من دفاعه المستميت عنهم.
بستغبى اوي كلمة انه مش معاه لاعيبه دي بمجرد التعثر من فريق عبيط زي الافيس، شختار، قادش. لأنه هو اللي عايز اللاعيبه دي ..
معاه من فترته الأولى راموس - فاران - كارفخال - مودريتش - كروس - كاسيميرو - بنزيما - اسينسيو - فاسكيز - ايسكو - مارسيلو - ناتشو ومعظمهم اساسيين في وقت الناس الموسم اللي فات كانت بتقول انه راجع يعمل ثوره في الفريق . لكن هو فضّل الناس دي وقالك انا معاهم للموت واللي هيصيبهم هيصيبني.
مينفعش في كل تعثر ترمي اللوم على اللاعبين والكلام ده لفئه معينه كانت مجهزه تبريراتها قبل ماتش مونشنجلاباخ في حال الخروج لقدر الله. في نفس الوقت بتخرج بعد كل ماتش كبير زي امبارح تشيد بمستوى مودريتش، كروس، بنزيما، كرفخال، ميندي، فاران، فاسكيز ورودريغو ..
ما هي هي دي نفس اللاعيبه اللي لما بنخسر بتجيب اللوم عليها مش على الشخص اللي مش محضر للماتش واللاعيبه بتنزل تايهه - واللي في اغلب الوقت بيكون ضد فرق صغيرة اللي هي بتمثل تقريبًا 80% من ماتشات الموسم- او منزل لاعب ميستاهلش يكون في الأسكواد اصلا او عامل تبديل مضحك.
بفتكر دايمًا مشجعين برشلونه في وقت من الاوقات من كام سنه وهو بيقولك شتيغن افضل حارس وبيكيه افضل مدافع وسواريز افضل مهاجم ووو ولما ميسي يخسر كوره ذهبيه او يطلعو من الابطال يقولك هو هيعمل ايه لوحده اصله مش معاه لاعيبه.
انا مقتنع 100% ان سكواد ريال مدريد محتاج اضافه وانه هجومه عره، لكن الفريق الحالي مش بالسوء اللي ممكن يصدره لينا البعض. لأن سكوادك افضل من فِرق كتير بتلعب احسن منك وبتكسب عادي وحتى حجة الجمهور وانهم مش عارفين يلعبو من ضغط الجمهور زي ما كنا بنقول قبل كده مش موجوده.
الفريق هيفضل مزاجي، يمشي على سطر ويسيب سطر، في افضل الاحوال هيعمل فتره كويسه وبعد كده يرجع تاني.. قدام فياريال عملت ماتش كارثي قدام انتر عملت ماتش عالمي وهتمشي هكذا ومفيش سبب حاليا للمزايده او فتحت الصدر لأن الواحد عارف اللي فيها الا بقى لو بيضحك على نفسه او عايش في عالم تاني.
اما بخصوص ماتش اتليتكو اللي شفنا فيه ضغط، واستماته في الحصول على الكوره والخروج بيها من نص ملعبنا، لعبنا كوره نضيفه .. كل شيء كان جميل فا اللي تقدر تعمله انك ترفع لزيدان ولاعيبته القبعه وتقيم الليل كل يوم اننا نشوف التحضير والاداء ده كتير.
جاري تحميل الاقتراحات...