رتبها

في أي استثمار داخل فيه .. أو ناوي تدخله
هل دايما لو قللت تكلفة إدارته حتكون أرباحك أحسن ؟!
إذا جوابك إيوة .. معناها إنك بتضيع على نفسك فرص أحسن 😫
حنتكلم عن تكلفة الفرصة البديلة (Opportunity Cost)
ليش لازم نحسبها ؟! حنقول قصة حلوة حتقنعك 🤩 .. شوف معايا 👇
#الاستثمار_للجميع

موضوعنا اليوم بسيط وحلو .. يحتاج شوية تركيز عشان فيه شوية حسابات 😁 .. لكن مهم مرة عشان نعرف هل قراراتنا الاستثمارية صح ولا فيها شي يحتاج يتعدل .. حنقول قصة لزيزة تفهمنا كل شي .. يللا ركز

أحمد وحسن .. كل واحد عنده مليون ريال (تحويشة) ويبغوا يستثمروها .. الاثنين قرروا يدخلوا في الأسهم .. الاثنين يسمعوا عن الصناديق الاستثمارية .. حسن عجبته الفكرة ودخل الصندوق .. لكن أحمد كان ذكي شوية .. لمن شاف الرسوم الإدارية (2% حقت الصندوق) قرر يوفرها .. ويدير استثماره بنفسه 💪

حنفترض إنو أداء أحمد في السوق كان مثل أداء الصندوق بالزبطت .. يعني العوائد حتكون نفسها .. بعد سنة أحمد كانت عوائده 10% في السنة .. أما حسن كانت 8% في السنة .. عشان أنخصمت منه الرسوم الإدارية .. المفروض واضح من اللي بيكسب أكتر هنا .. لكن دقيقة أكمل 😅

في يوم من الأيام أحمد وحسن اتقابلوا .. أحمد كان واثق في نفسه .. وقال لحسن: ياخي ليش إنت تضيع فلوسك ؟! .. ليش تخلي الصندوق ياخد منك رسوم كل سنة .. ليش ما تستفيد إنت من دا المبلغ لنفسك .. شوفني أنا .. صح أتعب شوية وأتابع السوق أكثر منك .. لكن في الأخير أستفدت 2% أكثر منك ! 😩

بدأ حسن يفكر بينه وبين نفسه .. إنو يخرج من الصندوق ويشتري أسهم بنفسه ويشتغل زي أحمد .. لكن حسن قبل لا يأخد الخطوة دي .. قعد يحسب كم شغله .. وأكتشف شي يخوف وأحمد ما كان منتبه له .. خلته ياخد قرار مختلف تماما ! 😰

الحسبة حقت السنة دي كانت كدا:
دخل أحمد:
راتب 20 ألف/الشهر = 240 ألف/السنة
عائد أسهمه السنوي 10% = 100 ألف/السنة
إجمالي = 340 ألف في السنة .. حلو ؟! .. خلينا نشوف حسن دحين 😏

دخل حسن:
راتبه نفس أحمد 20 ألف في الشهر = 240 ألف/السنة
عائد الصندوق السنوي 8% = 80 ألف/السنة
إجمالي = 320 ألف في السنة .. واضح أقل من أحمد بـ 20 ألف ! 😟

إلين دحين الموضوع ماشي تمام .. طيب إيش المشكلة ؟! .. المشكلة في الحتة الجاية 😬 .. حسن بعد ما حسبها .. وبدل ما يقرر إنو يخرج من الصندوق عشان يوفر الـ 2% .. لقى عنده وقت أكثر عن أحمد .. وقرر إنو يشتغل فيه شي يجيب له دخل إضافي بنفس قيمة وقته .. ايش يعني ؟!

نحسب قيمة وقته =
راتبه 20 ألف/الشهر .. ودوامه 8 ساعات/اليوم .. 5 أيام/الأسبوع .. يعني 125 ريال في الساعة .. تمام ؟! .. قرر حسن يشتغل ساعتين زيادة في اليوم في شغلة ثانية مالها علاقة بالأسهم .. يعني 125*2 = 250 ريال في اليوم .. 250*20 يوم = 5 آلاف ريال في الشهر .. حلو ؟! 🤗

طيب هنا حسن رجع يحسب دخله السنوي:
راتبه الأساسي 20 ألف/الشهر = 240 ألف/السنة
عائد الصندوق السنوي 8% = 80 ألف/السنة
عمل إضافي 5 آلاف/الشهر = 60 ألف/السنة
إجمالي = 380 ألف في السنة .. مين فاز دحين حسن ولا أحمد ؟! 😎

إيش اللي صار هنا ؟! .. الاتنين كانو يشتغلو بالضبط 10 ساعات في اليوم .. والاتنين قيمة وقتهم في الدوام نفسه بالضبط 125 ريال في الساعة .. ورغم إنو حسن كانت عوائد أسهمه أسوأ من أحمد .. لكن حسن أستغل فرصة فراغه في شي يجيب له عوائد أفضل من إدارة الأسهم بنفسه 😉

يعني بالعربي كأننا بنقول إنو أحمد بيخسر كل سنة 60 ألف .. وهو كان مفكر إنو ذكي وبيوفر الـ 20 ألف حقت إدارة الصندوق .. الـ 60 ألف دي هي تكلفة الفرصة البديلة اللي أحمد بيدفعها لكن بدون ما يحس !

طيب هل دايما الصندوق هو القرار الصح ؟! .. لأ طبعا .. كدا إنت ما فهمت قصدي .. اللي لازم تعرفه إنك تعرف تحسب تكلفة الفرصة البديلة .. في أي فرصة استثمارية كتير تشوف فرص مختلفة بتكاليف مختلفة .. مو شرط اللي قيمته أقل أو تكلفة إدارته أقل .. حيكون الأفضل 🥳

بعض الناس حياخدوا منك رسوم شغلة معينة .. أو تكلفة خدمة بطريقة معينة .. القرار الصح مو إنك تحاول توفرها .. الصح إنك تحسبها وتقارنها بقيمة وقتك .. وتشوف المحصلة .. أعطيهم حقهم وخد انت الفايدة الأكبر بعدين 😉

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة