عبود باشا كان اول من فهم نيه عبدالناصر في التأميم واكتر واحد سيل اصول ثابته وهرب اموال للخارج وعند لحظة معينة امر بعدم عودة اسطول النقل البحري المملوك لشركته وساب البلد واستقر في انجلترا وادار اعماله وأسطوله من هناك مشيعا باللعنات واتهامات الخيانة حتى وفاته في منتصف الستينات
غيره كتير هربوا فلوس بدرجات اقل وصولا لناس ما لحقتش واللي اتشل واللي طب ساكت، ومن وقتها ابتدي الإقتصاد الرمادي والتحويش تحت البلاطة وترعرع نموذج استثماري اسمه حط الحمام طار الحمام يعني بالبلدي كدة خلي استثماراتك خفيفة وتتسيل بسرعة وظهرت مدارس رائدة في تهريب الفلوس على كل شكل ولون
لدرجة انك ممكن تهرب كاش معاك من المطارات طالما تدفع المعلوم ولما السادات اعلن بداية الإنفتاح الإقتصادي اقتصر نشاط القطاع الخاص تقريبا على الإستيراد والدولة ما كانتش بتشجع دخول القطاع الخاص في الصناعات التقيلة والإستراتيجية واكتفت بمباركة مصانع الشيبسي والمنظفات والمشاريب الغازية
وبعد انهيار الاتحاد السوفيتي ونموذج رأسماليه الدولة تم السماح لرجال الأعمال المقربين بالدخول في صناعات استراتيجية زي الحديد والصلب ومع وصول السيسي للحكم كل ده اتلم ونزل الجيش شخصيا ينافس في كل حاجة من الأسمنت للسي فود والسياحة وابتدت الدنيا تصعب تاني على القطاع الخاص بتنويعاته
ولكن مؤخرا بدأت ظاهرة القبض على رجال الأعمال، ومش القصد بس المشاهير ولكن مستويات اقل وبعيدا عن لإعلام مثلا المقاولين اللي اتقبض عليهم واتعملهم غرامات جزافي ويا الدفع يا الحبس وبالتوازي تطلع قصص اشكال واللوان يعني بعد القبض على صفوان ثابت واتهامه بعدها بكام يوم بتمويل الإخوان
دون اعلان اي تفاصيل تأكد الإتهام، تبص تلاقي قصص متداولة عن ان الجيش نازل سوق الألبان والزبادي وقصص تانية ان في ضابط برتبه صغيرة بيبتزه وفقعه مذكرة تحريات ودته ورا الشمس، ومع الغياب التام للإعلام اللي برضه اممته المخابرات بقى ممكن تطلع اي حكايات ونظريات عما هو حاصل
ومن هنا يتضح ان عبود باشا ده كان راجل نمس، وفهم الفولة بدري وخلع، واحب انتهز الفرصة وأكد ما سبق أن قلته من إن السيسي خاتم العسكريين
جاري تحميل الاقتراحات...