رتبها

ثريد عن الانتحار، أرجو من الجميع قراءته بتمعن، و مش غلط ننشره، لانه ممكن تساعد شخص انه ما ينتحر، و كمان رح تساعد انه الناس تفهم موضوع الانتحار أكثر و الصورة كاملة

بداية، الانتحار فيه 3 مصطلحات مهمة لازم نعرفها، و هم الأفكار الانتحارية، محاولات الانتحار، و الانتحار نفسه
الافكار الانتحارية هي أفكار متكررة في عقل الشخص تقوده للانتحار، ع سبيل المثال الشخص بشوف انه نهاية حياته هي الحل لمشكلته، او لو الشخص خطط ينتحر، هاد اسمه أفكار انتحارية

و بالواقع، الشخص بمر بعده أفكار انتحارية قبل ما يجرب يحاول ينتحر فعلياً، و الها علامات قد لا تراها انت عالشخص، لكن بتفطن الها بعد ما ينتحر، و رح نحكي فيها لاحقاً في الثريد

ثاني مصطلح هو محاولات الانتحار، محاولة الانتحار اسمها بفسر معناها، و هي محاولة لكن لم تنجح، و الشخص ممكن يكون آذى حاله بس ما مات من الفعل.
و المصطلح الثالث هو الانتحار، و هو انه محاولة الانتحار تأدي لوفاة و انهاء حياة الانسان

كمعلومات عامة عن الانتحار، الانتحار هو ثاني أكثر سبب شائع للوفاة للأعمار من 15-34، و هو عاشر أكثر سبب شائع للوفاة في كل الأعمار
أكثر فترات العمر الي بظهر فيها الانتحار هي الأعمار في فترة المراهقة (15 و طالع)، و الأعمار في فترة ما بعد ال 45 سنة

نسبة محاولات الانتحار في الاناث أكثر من الذكور، لكن نسبة الموت بسبب المحاولات الانتحارية “الانتحار” في الذكور أعلى من الاناث
و سنوياً في أكثر من مليون محاولة انتحار، فالموضوع شائع، و ليس قضية لازم نتجاهلها و نرميها على البعد عن الدين فقط، رح تعرف ليش، كمل قراءة

رح نحكي عن شغلتين هون مهمين، الأولى هي أسباب للأفكار الانتحارية، و الثانية هي شو في علامات و أعراض بتبين عالشخص اذا كان عنده فكر انتحاري، و كيف ممكن يساعد حاله، او تساعده انت كمان

أسباب الأفكار الانتحارية تشمل الاضطرابات النفسية، و طبعاً بتعرفوا الاضطرابات النفسية مثلها مثل أي مرض عضوي ثاني، يعني الاكتئاب الحاد مثلا اشي مهم و خطير، زي ما أمراض القلب و غيره خطيرة، الاكتئاب واحد من أهم الاسباب في انه الشخص يتكون عنده أفكار انتحارية، خارجة عن ارادته، و صعبة

من الاضطرابات النفسية الي ممكن تأدي للأفكار الانتحارية في اضطرابات المزاج مثل الاكتئاب و ثنائية القطبية، اضطرابات الهوس و الذهان زي السكيزوفرينيا، اضطرابات الطعام، الوسواس القهري، و غيرها من الاضطرابات الي بلزمها تدخل و عدم السكوت عنها عشان ما توصل لمرحلة الافكار الانتحارية

عدا عن انه الاضطرابات النفسية قد تصاحب بعض ف بزيد ضغط الافكار هاي، على سبيل المثال الاكتئاب يرافق العديد من الأضطرابات النفسية الأخرى، بيجي يعني زيادة على الاضطراب الموجود، طبعاً في حالة ما سيطر الواحد على الاضطراب الاساسي و اخد العلاج اللازم

ففي بعض الاضطرابات النفسية، الواحد ما بكون 100٪ مسيطر على نوعية الافكار الي عنده، عدا عن الهلوسات و الاوهام الي ممكن تأثر على الشخص، فهي أول سبب بفرجيك انه الانتحار ممكن يكون لأسباب ثانية غير البعد عن الدين

لأنه زي ما بتعرفوا، حتى الانسان المتدين و الملتزم قد يصاب باضطراب نفسي، لأسباب عدة، بتشمل انه الاضطرابات النفسية الها نواحي بيولوجية و وراثية و مجتمعية، و ليست فقط نفسية بحتة أو دينية، نفس ما بنصاب الشخص بأي مرض ثاني في جسمه.

غير عن الاضطرابات النفسية بشكل أساسي، الأشخاص الي بتعرضوا لعنف مستمر، مثل العنف الأسري، أو أي نوع abuse، معرضين للأفكار الانتحارية و بشكل كبير. هيك حكينا عن أهم سببين بالنسبة لجميع الأعمار، لكن بدي أقسم هسا 3 أقسام

بالنسبة لأعمار ال 45 و فوق، عدا عن الأضطرابات النفسية و العقلية و العنف، بعض الناس في هذا العمر بلجأ لاستعمال الكحول أو المخدرات، كوسيلة لتخفيف الضغط أو تخفيف حدة موضوع صار معهم، و عارفين نهاية هالطريق أفكار انتحارية

و ما بتقدر تحكم على شخص، حتى لو استعمل مواد مخدرة أو شي، ما بتعرف الضغط وصل معه لأي مرحلة، أنا ما ببرر استعمال هالمواد طبعاً، لكن بقلك لا تلعب دور موزع الأحكام، لانك مش بمكان الشخص، ولا انت رب العالمين لتعرف شو في بقلبه و براسه، رجاءً

في عمر ال 45 و بعد، قد يصل الانسان لمرحلة يحس فيها انه ما نجح في الحياة، ممكن عشان تأخر في شي أو مشاكل في علاقاته أو موت شريك حياته أو غير هاي الاسباب، و ما بتعرف شو قوة تحمل كل شخص، لكن لما تيجي أفكار انتحارية، فالموضوع جدي، رجاءً لا تلعب دور الحكم

بالنسبة للقسم الثاني و هم الأطفال و المراهقين، التعرض للتعنيف او الاعتداء الجنسي، قد يكون سبب كبير في هاي الأفكار و المحاولات عند هالاعمار، أي نعم الانتحار ما بفرق بين صغير و كبير، ممكن يجي بأي عمر، غير هيك ضيف عليهم التنمر

بهالعمر الواحد لسا ما بكون عنده صورة كاملة عن نفسه، فالتنمر بأثر فيهم كثير كثير، و ممكن يوصل لأفكار انتحارية، و قصدي بالتنمر هو التنمر الي بصير بالمدارس و فاهمين قصدي كيف

و القسم الثالث و الي هو كبار السن، واحد وصل عمره 60 سنة و مع هيك بحاول ينتحر، السبب بالعادة برجع اما لفقده لشريك حياته، أو لانه عنده مرض مخليه يحس حاله عالة على أحبابه، ف بتيجي الأفكار و من ضغط الافكار الانتحارية بقرر ينهي حياته للأسف، طبعاً بعد موجة اكتئاب حاد مستمرة

حالياً، شو العلامات الي ممكن تشوفها على الشخص الانتحاري، أول شي و أهم شي، رح تشوف عنده أفكار بالموت، سواء انتحارية أو لا، لكنه بتمنى الموت عنجد و بكون متوهم انه الأفضل انه ينهي حياته.

كمان احتمال يكون منسحب من المجتمع بفرق كبير عن أول، و بكون فاقد للأمل، بودع الناس زي كأنه رح يبطل يشوفهم قريباً، متوتر و قلق دائماً، بيعطي أغراضه للناس، بطلب السماح من الناس، تغييرات واضحة لفترة في نومه و أكله و روتينه،
تصرفات متهورة، برمي نفسه في الخطر بدون مبالاة و غيرها كثير

طبعاً هاي العلامات ممكن تكون واضحة و الشخص يبينلك ياها بشكل واضح، و ممكن تكون مخفية و الشخص يخبي عنك الشي تماماً، و فجأة تلاقيه انتحر، لكن الافكار الانتحارية كان صايرلها فترة طويلة داخل عقله بس ما كان مبين هالشي عليه

و لا تنسى انه الشخص الي عنده وسائل فعلياً بتخليه ينتحر، وضعه أكثر خطر من الي ما عنده، يعني اذا شخص بمتلك أسلحة، أو قريب من أدوات حادة أو بضل يقعد بمكان عالي، هاد أخطر لانه نسبة انه محاولة انتحاره تزبط هي أعلى من نسبة شخص ما بمتلك وسيلة

طيب هل كل الي بنتحروا بعاد عن الدين؟
طبعاً لا، كثير جداً من الحالات زي ما حكينا بكون السبب اضطراب نفسي، و اصلا باقي الاسباب كلها ممكن تكون اسباب لاضطراب نفسي اصلا، و الاضطراب النفسي ممكن يخلي الانسان غير واعي عن تصرفاته، ف لا تحكم على حدا

طيب، شو تعمل انت في المجتمع لتخفف هاي الظاهرة؟
أول و أهم شي، لا تحكم على حدا، لا تقول بعد عن الدين ولا ضعف شخصية، انت مش قاعد بتساعد ولا رح يجي حدا يصفق الك و يقلك أحسنت انت قوي و كلامك اقنعني. بالنهاية الحكم عند رب العالمين، ما بتعرف شو في بقلب الشخص

كون لطيف مع الناس، اسأل عن الناس الي بتعرفهم من وقت لوقت، لا تآذي حدا و تتنمر ع ناس بشكل مؤذي، كون كويس مع الأطفال، يعني بشكل عام، خليك انسان كويس مع الكل، و رح تكون مفيد و بتعمل فرق

هسا أهم سؤال، لو انت نفسك اجاك ميول انتحارية و أفكار انتحارية، شو تعمل؟
لا تتردد أبداً في زيارة الطبيب النفسي، زور طبيب و رح يساعدك و رح تنحل مشكلتك بإذن الله
احكي مع الناس المقربين منك، صارحهم باللي جواتك، لا تخبي و لا تكتم، رح تتفاجأ انه الناس بتحبك و بدها تسمع منك

تذكر انه هالافكار مؤقتة، حتى لو استمرت فترة، اذا كان معك دعم كويس، و تلقيت علاج اذا كان في مشكلة أساسية سببت هالأفكار، ف أمورك رح تكون ممتازة، لا تنسى حياتك غالية و لسا قدامك كثيرتعيشه
و لما تنتحر انت مش قاعد بتحل مشكلتك، النهاية ليست حل أبداً، صدقني رح تلاقي حلول و رح تطلع منها

لو حدا قريب منك حسيت عنده ميول انتحاري، شو تسوي؟
اسأل عنه، اقعد معه و احكي معه، خليه يحكي، هي صعبة عليه يحكي، بس رح يحكي لما يشوفك مهتم فيه، و بتحرص على انه يكون كويس، ما بتعرفوا أثر الكلمة الكويسة قديه مهم، و لو حسيت عليه بوادر ميول او أفكار بالموضوع …

.. اعرض عليه زيارة طبيب نفسي لمساعدته في مشكلته، و شجعه حتى عالموضوع، جميع الاضطرابات النفسية قابلة بشكل كبير للعلاج و تحسين جودة حياة الشخص، و حتى لو ما كان في اضطراب نفسي، الافكار الانتحارية بتتعالج كمان و بتروح

ذكره انه هاي الأفكار مؤقتة، و احكيله حكي كويس، طمنه، خليك قريب عليه و أعطيه الدعم اللازم، ما ننسى انه الناس لبعض، ما ننسى انه الانسان شو ما كان بالأخير هو أقوى لما يكون في كتف ينسند عليه

بالنهاية أعزائي، الأفكار الانتحارية مش شي سهل أو دلع، لو جربتها رح تعرف قديه هي قوية و بتسيطر عالشخص، لذلك لا تحكم عالشخص الي بقوم بالفعل، لكن كمان هذا مش مبرر الك عزيزي القارئ بإنك تقوم بالفعل

الحمدلله في روادع بتخلي الشخص يتردد و هذا شي كويس، منها الروادع الدينية، الاجتماعية، أو مثلا الخوف على العيلة و الاولاد بعد ما يموت الشخص، كلها روادع كويس انها موجودة

لكن بالنهاية بنرجع نحكي، الأفكار الانتحارية اذا سيطرت على الشخص، ممكن انها تتغلب على الروادع، لذلك للمرة المليون، لا تحكم عالناس، لا تحكي بعد عن الدين، لا تحكي ضعف شخصية، لا تحكي جنة و نار، هاد مش شغلك، هالموضوع عند رب العالمين، ادعيلهم بالرحمة

الانتحار ظاهرة ما بصير نلفت نظرنا عنها، و ما بصير نرميها على البعد عن الدين و بس، دام في أسباب، لازم نحل الأسباب، و لا تنسوا قول الرسول ﷺ “المؤمن للمؤمن كالبنيان يشد بعضه بعضًا”، ف ديروا بالكم على أحبابكم و أصدقائكم

و سلامتكم و سلامة أحبابكم يا رب ❤️
#انتهى

@RouaaAlg لا شكر على واجب 🙏

@LynnHashem12 تسلمي ليين 🙏🏻🙏🏻

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد