هنتكلم النهاردة عن تأثير أساسي وجذري لأزمة كورونا السنادي على مستقبل سلاسل الإمداد Supply Chain وفرص مصر والعلاقة ما بينها وما بين التحول الرقمي (كالعادة) 😁
قبل كورونا، كان الاهتمام في الإمداد والتجارة فيما يعرف باستراتيجية Just in Time ومعناها ببساطة أنك دايما تقلل المخزون عندك بقدر الإمكان والاعتماد أكتر على اللوجيستيات لتوفير احتياجاتك سواءا انت مشتري نهائي أو مصنع مع استخدام نظم عشان تحسب انت محتاج أيه بناءا على الطلب بأقل مخزون
استراتيجية ال JIT مفيدة للسوق عشان بتقلل الهدر ده غير أنها بتعزز من العولمة بمعنى أنك لو بتجمع منتج من كذا حتة في العالم أنت واثق في النظام اللوجيستي العالمي أنه هيوفرلك الإمداد المطلوب من أي حتة في العالم بأحسن سعر وبالتالي التصنيع المحلي لو مالوش سوق بيواجه منافسة شديدة
جت الكورونا، وفجأة فقد العالم الثقة في لوجيستياته، الإمداد تأثر بشكل كبير، الأرفف في أوروبا بقت فاضية، العرض والطلب كله أتغير، الملاحة العالمية اتأثرت، فقد العالم الثقة في توفير كل احتياجاته (خاصة من الصين) بنظام ال JIT، بدأت الناس تخزن وتخزن وتخزن عشان معندهاش ثقة في الإمداد
سريعا بدأت كل دولة تبص جوه السوق المحلي بتاعها والسوق الاقليمي أيه اللي ممكن نجيبه من بعض بسرعة يسد الطلب المتزايد ده، النظم الرقمية اللي بتوعد وبتخطط طرق للإمداد تعطلت والناس اشتغلت بأيدها تشتري من المحلي والشركات الكبيرة اعتمدت أكتر على قواعدها الاقليمية لتوفير طلبات كل أقليم
دلوقتي ما بعد كورونا الحديث عن تعديل الاعتماد الكامل لل JIT والاهتمام باستراتيجية ال Just in Case ومعناها أننا بدل ما نعتمد على ال zero inventory بمعنى أن التخزين صفر، نهتم بالتخزين الكافي لتغطية المخاطر ونعتمد أكتر على الإمداد الاقليمي Regionalization أكتر من الدولي
طيب أيه فرص مصر في الموضوع ده، أولا مصر من أكتر الاقتصاديات المتنوعة في الاقليم سواءا منتجات أو خدمات وبالتالي تستطيع أنها تكون الhub الاقليمي للإمداد لما تمتلكه من موارد بشرية وصناعية ولوجيستية (قناة السويس، الموانئ، موقعها الاستراتيجي).
استقرار مصر في الفترة اللي فاتت بيدي ثقة أننا لو لعبنا الدور ده هنقدر نوفر احتياجات الاقليم (خاصة أوروبا وأفريقيا) بشكل يقلل من مخاطر الهدر ويوفر أماكن للتخزين داخل مصر تحافظ على السلع وسلاسل امدادها في المنطقة.
طيب ازاي ممكن التحول الرقمي يفيد مصر في النقطة دي تحديدا، أننا نعمل نظام الكتروني ذكي يقدر العالم كله يعتمد عليه في التخطيط و مراقبة عمليات الإمداد والتخزين واللوجيستيات بحيث نقدر من خلاله نطمن اطراف العملية التجارية بأننا بنوفر المنتج المحلي المناسب وبنصدره وبنعرف نخزن كمان
وأخيرا، فالاهتمام بالمنتج المحلي وتصديره (خاصة مدخلات عمليات الانتاج) هيكون أساسي والتحول من JIT لـ JIC فرصة لإنعاش الشركات المتوسطة وللإبتكار في السوق وعلى ما يبدو فاستراتيجية أمهات البيوت المصرية في تخزين الأشياء (فوق الدواليب والسطح) بدلا من التخلص منها ستؤتي أكلها قريبا.
جاري تحميل الاقتراحات...