هنا ثريد بأحاول ألخّص قصتي من بدايتها لين الآن ( في جزئيات ممكن ما تنفع لأصحاب القلوب الضعيفة ) فلذلك أتمنى تجاوزها، نبدأ بسم الله :
١- الإعاقة معي مُنذ الولادة .
٢- قرار عملية البتر قراري ( عمري ٤-٥ سنوات ) .
٣- أنا أقدر ماني بعاجز ( كل شيء قدام - عنيد ) .
٤- عندي طموح !
١- الإعاقة معي مُنذ الولادة .
٢- قرار عملية البتر قراري ( عمري ٤-٥ سنوات ) .
٣- أنا أقدر ماني بعاجز ( كل شيء قدام - عنيد ) .
٤- عندي طموح !
بالنسبة للإعاقة فهي زي ما ذكرت إنها من الولادة و الحمدلله إن أهلي مخليني أعرف أدق تفاصيل الإعاقة من البداية ( هذا أنت ربي خلاك كذا لأنه يحبك )، و طبعًا أبوي و أمي حرصوا قد ما يقدروا إنهم ما يحسسوني بالفرق عن الباقيين، و هالشيء مهم ترا ..
بخصوص البتر، يب فوقتها الأطباء كلهم قالوا ماله أيّ حل غير البتر عشان يمشي ( ايه كنت امشي )، أهلي جلسوا محتارين يوافقوا أو لا، جيت حسمت الموضوع بنفسي لما شفت بإحدى مراجعاتي للمستشفى طفلة أخرى تمشي بالأطراف الإصطناعية، يا إني أبثرت أمي بالأسئلة عشان أعرف كيف .. يتبع .
بموعد اللي جاء بعده مع الدكتور أليكس و هم يتناقشون معه، قلت لهم سوو العملية و من بعدها جلست لهم لين رضوا و استسلموا لعنادي، سويت العملية و لما صحيت أول شيء سألت عنه وين رجولي الصناعية ابيها !
سألت أمي عن تلك الفترة هل بكيت ؟ قالت لا و ما كنت تشتكي بس سويت إضراب ما تأكل لأنك تبي ترجع للبيت، و بعد ٩ أيام طلعوك على مسئوليتك، عنيد بقوة صح 😂؟! مشيت بالأطراف بعد ٦ شهور من العملية .. و كل العمليات بعدها أنا أقرر أوافق عليها أو لا ..
وين درست؟ بمدارس العامة و ليست خاصة و لا أهلية من الإبتدائية لين الثانوية ( أولى إبتدائي بالبيت فقط )، المجتمع و التجاوب معه و مع أسئلته تعودت عليه و لا أتضايق منه أبد، ليه ما أتضايق؟ لأن هم مثلي و أنا أعرف إن الإنسان يجيه فضول و يحب يعرف فلذلك الوضع طبيعي مره عندي
الحين فقرة كل شيء قدام و عنيد، ايه فكرة إني أخاف أجرب و أجلس كذا ما عندي، مع إن هالشيء مع العمر صار يزيد خوف أهلي عليّ ( زي موضوع السواقه ) طبعًا عندي سيارة و رخصة و أسوق و أسافر خطوط الآن، بس بالبداية الموضوع متعب من الطرفين، خوفهم و عنادي ..
الحين نروح للطموح، لو قلت لكم إني كنت أتمنى أصير لاعب كرة قدم !!! طبعًا لما صرت بالمتوسط أقتنعت تمامًا إنه ما يصير، بس هيهات ما هو أول طموح يروح، أول طموح إني أصير محارب و عسكري و قائد و كذا 😂، بس مخي أساسًا حوّل للطموح الثالث و اختصرها عليّ ( مبرمج و مخترع )
بالنسبة للمخترع ( ملفاتي و أبحاثي حاطها بالأدراج ) و لا شاركت بها للآن و في سبب عندي، ممكن لاحقًا إن كتب ربي، المبرمج سليمان بدايته كيف ؟ ابد مفتون بالبرامج اللي يشوفها بالكمبيوتر و حب يصير هو اللي يصنعها و قام يبحث كيف تتسوى، هالكلام بعام ٢٠٠٧ تقريبًا ..
طبعًا كنت أتمنى يكون تخصصي بالجامعة علوم الحاسب بس ما أنقبلت و صارت قصة و كذا ( الآن طلّاب هالجامعة أدرّسهم عن بعد ) نظام إني أحبط و أوقف اسف ما أحبه و حتى لو حاولت أسوي كذا مخي ما يخليني أبد .. متى أول مرة بديت انعرف و اطلع للعالم؟
بداية ٢٠١٨ لما تبنّتني جمعية الإرادة للموهوببن @AleradahSA ، و بصراحة ما قصّروا معي مع إني تعبتهم معي، و بعدها كذا هدوء لين ما فجعوني و كرموني ب سابك بمنتصف الثاني لنفس السنة، بعدين؟ الوضع هدوء لأسباب خاصة و هنا بأوضّحها لأنها مهمة و عانيت منها صراحةً ..
ايوه اكتئبت بنوفمبر ٢٠١٨ لسبب خاص و من بعدها ما كنت طايق الحياة لدرجة كنت أقول ابي انام و لا أصحى بعدها، لين يوم من الأيام قلت الحياة جالسة تستمر و أنا كذا ما في شيء اقدمه ؟ يعني بتنتهي الحياة؟ أحد بيدري عني لو مت؟ لا، طيب ليه واقف؟ و بديت ارجع شوي و شوي ( مخي رفض يستسلم )
بنوفمبر ٢٠١٩ قابلت @Abdulmogeeb بمحاضرة هو يقدمها بحاضنة بادر و بوقت الفراغ جلس يسألني ثم خشيت بعينه قلت ترى ارسلت سيرتي و ابي اتدرب عندكم بفلكس و ما رديت، و اردفت كلامي قلت عشاني بالرياض و أنتم بالقصيم؟ قال ايه، قلت عادي أجيكم وش ورانا ( نشبت له ) و وافق
ايوه ترى رحت لبريدة و سكنت فيها شهرين و نصف لحالي و كنت رافض أحد يجي معي و يسكن معي عشان يعاوني، اطبخ لنفسي - اودي ملابسي للمغسلة بنفسي - اسوق اروح و ارجع بنفسي و اداوم و الوضع طبيعي ( رجعت للرياض بسبب أزمة كورونا )، كانت تجربة جميلة و حبيت أنفذها و الحمدلله قدرت ..
من التسلسل لو تلاحظون بدايتي بمجال البرمجة ٢٠٠٧ و بداية ظهوري ٢٠١٨، فلا توقف طموحك عشان و الله سنتين و إلا لي خمس سنوات و ما شفت النتيجة، استمر و لا تحط لك نهاية ( نهاية عمل الإنسان بوفاته ) غير كذا لا تفكر و تقول كبرت و مدري وش، بتشوف الأثر يومًا ما ..
طبعًا الآن شغّال مع @flexcourses كمساعد مدرب 😎🖤
جاري تحميل الاقتراحات...