الحمدلله والشكر لله وماشاء الله،
اليوم جتني احسن 🎁 هدية 🎁 في العالم من الوالده الله يخليها لنا ويطول بعمرها، هذا الـ #ثريد بعيداً عن العاطفة بتكلم عن الوالده بشكل عملي عشان اثبت انها احسن ام في العالم 😍😍
اليوم جتني احسن 🎁 هدية 🎁 في العالم من الوالده الله يخليها لنا ويطول بعمرها، هذا الـ #ثريد بعيداً عن العاطفة بتكلم عن الوالده بشكل عملي عشان اثبت انها احسن ام في العالم 😍😍
الوالده كشخصية تعتبر (قائد) تحب العدل، النظام، الآليات، اتذكر يوم كنت صغير اعتقد ان هالشي قاسي واسأل نفسي دايم ليه الوالده مختلفة عن الامهات اللي نشوفهم ووش نتيجة هالتربية المليئه بالانضباط ؟ بعطيكم بعض الامثلة، سكر فمك وانت تاكل، ارفع ظهرك، النوم الساعة 7PM ..
تقصص اظافرنا بالدور وبشكل دوري، تزين ملابسنا سواء في البيت او قدام العالم بمعنى ممنوع تطلع عند نفسك او عند الناس بشكل موب مرتب، اذا شرت لي شي لازم تشتري لكل اخواني او لو كان معنا احد تشتري لهم كذلك من باب العدل والانصاف ..
المثير واللي عجزت اطبقه، النظام السنوي اللي تسويه مع العائلة كل رمضان، تشتري سجادات وتجبرنا نروح معها عشان نسلمها لعماني وخوالي ..الخ ببيوتهم وباب باب لدرجة يوم كبرت الان ماصار عندها الاستطاعه تستمر على شي استمرت عليه لسنوات فصارو بعد اول سنة يكلمونا امكم بخير ؟
المثير انها حتى الان مانست اي تعليمات كانت تقولها كمثال وانا اتكلم وماقلت ان شاء الله، قل ان شاء الله، اذا صارلي شي كويس قل الحمدلله، اذا بشرتها بشي وقف واسجد سواء عندك ناس او ماعندك في السياره وقف على جنب واسجد، بقولكم موقف غير حياتي ..
اتذكر في سنة من السنوات شريت سيارة كانت حلم بالنسبة لي بمجهودي، صار لي حادث وراحت تشليح، الكل يقولي الحمدلله على السلامة في الحديد ولا فيك، الوالده قالت لي راجع نفسك مع ربك وشف وقاعد تسوي في حياتك ؟ انا استغربت وقلت ليه؟ اكتشفت انها متابعة هذيك الفترة ان اي شي احصل عليه يروح مني
من بعد هذاك الموقف صرت وبشكل تلقائي اقدر اي نعمة من الله، اتمتم بيني وبين نفسي في الحمد والشكر، ومع هالتصرفات صرت ادعي ادعيه ماكنت ادعيها زي، يارب لا تخليني اشوف نفسي، يارب ارشدني اقدر نعمتك وكيف اتصرف فيها، يارب لا تخليني انسى نفسي واغتر وهكذا ..
كانت تقول لنا ماابي واحد فيكم يصير اقل من جامعي، اذا ماهمتك الشهادة خذها عشاني، كانت هي تجيب المدرسين، اي شي فيه تعليم علمني بس وش تبي وماعليك، طبعاً انا تأخرت بالحصول على الشهادة مقارنة بأخواني ووقتها اعلنت في #تويتر وكتبت انها اهداء للوالده لان فعلياً هي تعبت اكثر مني ..
من المواقف الغريبة واللي دايم تعلمنا عنها وتقول لنا عن الاثر والنتيجة، في مصائب الناس او مصائبها او مصائبنا لو كان معها اللي معها تساعد وتتصدق والمفترض مااقول هالشي يمكن تزعل مني لكن كنا دايم نتعلم نتيجة هذا التصرف الكريم كيف ربي يكرمها ..
من صغري وحتى هذي اللحظة اتابع هي وش تسوي لنا ودايم اسأل نفسي هي ميب مضطره ولكن تعتبرنا مشروعها اللي فنت عمرها تبدينا على نفسها لدرجة حتى العطر او اي شي نفسها فيه تخليه اخر شي او ممكن تنساه او ماتحصل عليه عشاننا وفعلياً مستغرب ليه هي كذا ؟ متى بتقول نفسي نفسي ؟
مااذكر اي نجاح او اي نقطة تحول بحياتي كانت خاليه من الوالده، اثناء السواليف معها لو قلنا شي نحصلها من بكره تساعد فيه، كلنا نقدر نقول اننا ماننوم الليل ونشيل هم ولكن ماقد شفت زي الوالده اللي اصبح طبع فيها، لدرجة صرنا نفلتر الحكي اذا حينا نتكلم عشان مانخليها تشتق ..
الوالده ماعندها نظام اولدي بسلك له او منيب ضاغطه عليه في اي شي يتعلق في (الالتزام) انت قلت كلمه خلك قدها وتحمل نتيجة قراراتك وهذا الشي خلاني مهنياً واسرياً وشخصياً ملتزم بشكل تلقائي واكره التقصير، طبعاً من العدل لو غلطنا اتجاه الاخرين توقف مع الحق عشان نتعلم نحسب حساب لأي شي ..
الوالده ماعندها نظام التصرف مع المواقف والاشياء بشكل غير مباشر او غير واضح، هنا تعلمت مهنياً واسرياً وشخصياً اخلص اي شي بشكل مباشر (بدون لكاعه) ولف ودوران، وتونا ماجينا لموضوع الاعتذار، الشكر، الامتنان اتجاه الله والاخرين فتعلمت مايكون بنفسي شي ..
الوالده مستغرب منها انها تشيل هم (وش بيصير) لو سوت اي شي في الحياة لكن حنا عيالها تذكرنا بالتفائل مع الله وانك ماتتعشم وتبالغ اتجاه الامور فكل شي خير وماله داعي تشيل هم، موب قلت لكم صار طبع فيها ؟ فالوالده قائد وموب مدير واي شي نسويه بدونها يصير صعب جداً !
كلامي هذا يمثل 0.01% من مدرسة الوالدة، للامانه مدري ليه قاعد اكتب كل هالكلام الشخصي لكن ودي مره وحده بحياتي مايكون الشكر والامتنان لها بشكل شخصي (بيني وبينها) وودي اوضح اشياء مقدر اقولها قدامها وعالاقل ابين لها الاثر اللي سوته لنا وللكوكب ..
قد تستغربون من طريقة كلامي عن الوالده وكأني اتعامل مع حاله بدون عاطفة، لكن فعلياً قاعد افهم واتعلم كل يوم منها سواء قدمت هالتعليم بشكل مباشر او غير مباشر، العاطفة موجودة لكن من وجهة نظري افضل هدية تقدمها لوالدتك هي النتائج، توضيح فضلها بعد الله واثبات ماتعلمته من مدرستها ..
طريقة سردي للـ #ثريد ازعم انها مختلفة عن السائد لانها تستحق هذا الاختلاف بجدارة، احمد ربي واشكره اني مابالغت في اي تغريدة اللي البعض بيعتقد انها مبالغه لان فعلياً انا قاعد اشوف شي خارق للعادة ماشاء الله تبارك الله ..
ماشاء الله تبارك الله حنا محظوظين بهذي الام اللي تدهشني دايم لان اللي قاعده تسويه مايستحمله كائن بشري، لازم يكون كائن خارق للعاده، ماودي اوقف الـ #ثريد لكن لازم احسمه لأن لو بستمر اتكلم عن المواقف والاشياء اللي تعلمتها بستمر مدى الحياة ..
كلمة "شكراً" قليله في حقها وودي اخترع مفردات تخصها وتميزها عن كل الكائنات البشرية، لان التكرار او الموجود لا يليق فيها فهي يليق فيها شي تتميز فيه ولا يمكن يكون مع اي شخص ثاني، في الختام لولا الله ثم الوالده ماكنت هذا الرجل اليوم، ماشاء الله، الله يحفظها ويطول بعمرها.
جاري تحميل الاقتراحات...