أنا ماعرفت الشاورما إلا بأولى متوسط .. وتقريبًا المحافظة كلها ماعرفت الشاورما إلا متأخر .. كنّا نسمع فيها واللي يجونا من الرياض يتكلمون عنها وعن طعمها .. وساعبيلنا تقوطر على سوالفهم ..
في حينا بوفية صغيرة فيها عامل مصري اسمه اسماعيل .. يعرفونه الكبار أنا لحقت على آخر أيامه .. سفّره كفيله وجاب هندي اسمه صعب وسميناه إسماعيل .. أصلاً البوفية سميناها بوفية إسماعيل لأن اسمها ممسوح ولا ندري وش هو ..
كان يبيع الصبح بيض وكبدة .. ومن العصر للعشا همبرقر .. الساعة 9 ونص يقفل .. لأن الناس تعشوا خلاص ومحد جايّه .. ويفتح من بكرة بعد الفجر .. هذي الأصناف اللي يبيعها إسماعيل كانت تلبي احتياجاتنا .. صحّ إن ودنا بالشاورما بس الهمبرقر اللي يسويها مجنووونة 😋
البيض والكبدة على ريال .. والهمبرقر ب3 ريال .. سواء بجبن ولابدون جبن .. يعامل الجبن معاملة الكتشب (مجاني).. الحين المطاعم دخلها الطمع .. تقول حط جبن زاد ريالين .. يعني مايكفي الهمبرقر ب15 تزيد ريالين على مسحة جبنة؟ 🙄
وكان فيه عُرف بين عيال الحارة .. تحاسب عن خويك ببيض ولا كبدة عادي .. بس همبرقر لا! أي واحد يباشر لك بهمبرقر يدخلك في قائمة الاتهام .. وتبدأ الشكوك تدور حولك .. ويتهامس الجميع ويتضاحكون .. وفي أول هوشة مع أحد عيال الحارة مستعد يسكتك بأنّه شاف فلان يشتريلك همبرقر!
أتوقع الشباب عارفين نوعية الاتهام خخخ .. المهم .. مدري متى بدت هالفكرة .. ورثناها من جيل عيال حارتنا اللي سبقونا بالدشرة .. ونعم الورث 😓
نرجع لمحور حديثنا .. كانت البوفية جنب المسجد .. فالناس وهي طالعة من صلاة العصر تلقى زحمة قدام بوفية إسماعيل .. ينتظرون الهمبرقر .. وكل واحد فلوسه معه .. محد يدفع لأحد ومحد يسمح لأحد يدفع له خخخ
لكن حصل شيء لم يكن بالحسبان .. وحنّا طالعين من صلاة العصر .. لقينا عمال عند البوفية جالسين ينزلون عدّة الشاورما .. طبعًا أنا ماأعرفها بس اللي راحوا الرياض عرفوها وقالوا هذي حقّة (الشورمه) صحّ نسيت أقول .. كنّا نسميها (شورمه) على وزن (شوربه) 😂
صار تجمّع غير طبيعي .. صغار وكبار جالسين قدام البوفية ننتظر هذا الحدث العالمي (دخول الشورمه لبوفية إسماعيل) كان باقي بس قناة العربية والجزيرة يغطون الحدث .. حتّى اللي ماصلوا العصر وصلهم الخبر وجو يشوفون .. واللي بيوتهم قريبة طلعوا فوق السطح يراقبون هالحدث خخخ
أذكر وقتها دخلت أطلب همبرقر وكان الهدف إني أشوف كيف يركبون الشاورما من قريب .. وإسماعيل مشغول بين الطبخ وتسليم الزباين طلباتهم .. ومتابعة العمال .. وبحكم إن لغته ضعيفة مايعرف من العربية إلا الطلبات اللي تتكرر عليه والأرقام فما أفادنا عن الشورمة هذي وش وضعها؟
قبل صلاة المغرب بشوي راحوا العمال وحضر صاحب البوفية وكان أول مرة أشوفه .. ومعه مقرفون أبيض حقّ الملاعب .. وقال بصوت عالي: يا إخوان لايجي إلا اللي بيشتري .. أما الشورمه بكرة نبيع .. مافيه اليوم!
وتضايقوا الناس من هالتصريح .. وش يصبرنا لبكرة .. كلنا ودنا بالشورمه!
وتضايقوا الناس من هالتصريح .. وش يصبرنا لبكرة .. كلنا ودنا بالشورمه!
لكن رضخنا .. وكل واحد رجع لبيته يحكي لأهله عن اللي شافه .. ومن بكرة في المدرسة سوالفنا كلها عن دخول الشورمه لبوفية إسماعيل .. اللي يقول أبوه وعدهم بكرة عشاهم شورمة .. واللي مهوب متغدي وبيطلع العصر يشتريها .. أحلام اليقظة مع هالشورمة .. حتى المدرسين يسألونّا من شافها؟ 😂😂
بعد صلاة العصر تونا مسلمين .. إلا وينقزون العيال الصغار بيحجزون مكان في طابور البوفية .. وأنا انتظرت دقايق ثم طلعت .. وجلست بعيد أنتظر الزحمة تخف .. كان منظر مهيب وأنت تشوف الناس كبار وصغار .. طالعين ومعهم أكياس الشاورما .. وريحتها مالية المكان!
اللي يصلح الشاورما مسمينه أخو إسماعيل .. مع إنه مهوب أخوه .. إسماعيل هندي مدري بنقالي أسمر .. وهذا سوري أحمر .. أصلاً إسماعيل اسمه مهوب إسماعيل خخخ .. المهم .. طلعت الشورما (خبز) ب3 ريال .. و(صامولي) بريالين.. السعر يغري بالشراء ويرشحها لتكون منافسًا للهمبرقر!
وصارت الشورما بديل للهمبرقر .. نادر تقلى أحد يطلب همبرقر .. وتحوّلت جملة (شفت فلان يشتريلك هبرقر) إلى (شفته يشتريلك شورمة!) السمعة الشينة انتقلت لها خخخ إلى مادخلت الجامعة ورحت الرياض وصرت أشوف الشاورما العملاقة .. وعرفت إن أخو إسماعيل تركي مهوب سوري.. بس حنّا مانفرق بين الجنسيات
جاري تحميل الاقتراحات...