أنا مش مؤمنة بالحسد كقوة ميتافيزيقية قادرة على التأثير بالسلب على حياة الناس وأذيتهم
من فترة صديقة ليا أختها خلفت بنت جميلة، ومن المعروف إن نسبة كبيرة من الأطفال بيجيلهم الصفرا الفسيولوچية من رابع أو خامس يوم وبتكون حاجة بسيطة بتروح مع التغذية الكويسة، 👇

يصادف أن واحدة قريبتهم كانت عندهم قبلها بيوم وأثنت على جمال البنت، تاني يوم البنت بدأت تظهر عليها الصفرا، فصديقتي سألتني هل ممكن تكون اتحسدت؟
وده بالظبط نشأة الخرافة بتيجي من هنا: قلة الوعي وجهل الإنسان مع حدوث الصدفة، ورغبة الإنسان الدائمة في تفسير الأشياء، 👇

فبيبدأ يربط بين السبب العابر الظاهري لجهله بالسبب الحقيقي ويتم ترسيخ ده في الوعي الجمعي للناس في ثقافة ما
البنت كده كده كانت هتصفر سواء حصل الموقف ده أو لأ، والست ماطلعش من عينها شعاع سحري أثر على البنت، بالمثل برضه لما عربيتك الجديدة اتخبطت أو رجلك اتكسرت أو خسرت فلوس في شغل،👇

كل ده مالوش علاقة بالحسد، له علاقة بسبب منطقي زي إنك مابتعرفش تسوق كويس أو ماكنتش واخد بالك،إن عندك هشاشة عظام أو إن ده نتيجة منطقية إنك وقعت أو اتخبطت زي ما نتخبط ونقع كل شوية وكل يوم، أو إن البيزنس قائم على الربح والخسارة والمضاربة ومتطلبات السوق وفهم معطياته ومش تكسب على طول👇

الحسد اللي مؤمنة بيه هو الناتج عن فعل بشري، نتيجة لمشاعر كره أو حقد بتحرك إنسان إنه يؤذيك أو يعطلّك شغل أو يسرق بيتك أو يقتلك وهكذا
لكن ماتصحاش من النوم تلاقي شعرك بيقع وانت عندك أنيميا والعيلة متوارثة الصلع وبتغسل شعرك كل يوم بصابون وتقوللي اتحسدت.
@Rattibha