كعزاب وعازبات أكيد تجي لكم لحظات الوحدة هذيك الي تتمنوا فيها تتزوجوا ويكون معكم شخص تتشاركوا معه الحياة
العزوبية هي الحرية ، مسؤل عن نفسك بس ، الوقت الي تقدر تركز فيه على المستقبل الي تطمح له ، لما تفكر بالزواج لازم تعرف أيش بتخسر وعشان أيش
في ناس يتزوجوا عشان الناس وفي ناس يتزوجوا عشان يجيب جهال وفي ناس يتزوجوا عشان وحدة تطبخ له وفي ناس يتزوجوا عشان أهله قالوا بنزوجك لاتكون حمار مثلهم
وفي بنات يتزوجوا عشان خلاص تكون أسرة وتستقر وفي بنات يتزوجوا عشان صاحبتها الي اصغر منها تزوجت وفي بنات يتزوجوا عشان يهربوا من اهلهم ، وهذولا مكانهن حمير ، وفي بنات يتزوجوا غصب عنهم وهذولا الي ماكان لهن أي يد بالموضوع
لاتزوجت هكذا بترجع تقول الله يلعن الزواجه وتجلس تقول لاي شخص يشتي يتزوج أنتبه أنه فخ وتحذرهم مراراً وتكراراً ..
إذا بتتزوج أو بتتزوجي لازم تعرف الشخص قبل هذا أهم حاجة ، ولما تعرفه تفكر هل هذا الشخص يستاهل اترك كل شيء عشانه ، الاعتماد على المشاعر بس مايكفي
اول حاجة هل الشخص هذا تقدر تتناقش معه باي حاجة ، وهل لوفي نقاش يتقبل رايك أو لا ، بتشوفوا هذا الموضوع بسيط بس هو أساس كل حاجة هذا أهم شيء لازم يكون شربك حياتك شخص تقدر تتكلم معه بكل حاجة
الثقة ، مش الثقة أنه لاخرج مايخونك أو أن أنها لاخرجت ماتخونك هذا شك وهذا الشيء مرض ولازم تتعالج ، الثقة شيء مختلف
الثقة أنك تقدري تقولي له أي حاجة تخطر ببالك وواثقه أنك بيتقبلها منك ، الثقة أنك لو حصل معك أي حاجة تكون هي ملجاك بدون ماتفكر تقفز لعندها ..
الاحترام : لازم تحس بشريكك أنه يحترمك بتصرفاته ، تصرفات الحب نابعه من مشاعر وتنتهي بانتهاء المشاعر نفسها ، الاحترام سلوك إجتماعي تحسه حتى لو وقع أختلاف بينكم بيكون الاحترام سيد الموقف وبيكون التفاهم والنقاش ممكن
التنازلات : لازم تعرفوا هل شريكك بيقدم تنازلات لك لوفي اشياء تحبها وهو مايحبها ، بكذا تستمر الحياة لو الواحد يجلس يقول مش حتنازل ابداً مهما يكون ، بترجع الحياة تعيسة جربه هكذا وشوف لو قال لا ابداً مستحيل أهرب
الشكل شيء نسبي لأنه يتغير بمنظورك للشخص نفسه ، لو جلست تشوف لشريكك أنه مش حلو مهما جلست معه فالموضوع مش بشكله الموضوع أنك مو قادر تتقبله فاهرب
لما تعجب بشخص وتحب شخصيته بيكون بمنظورك حاجة جميلة حتى لو الناس يشوفوا وجهه يسد النفس عشان كذا اقولكم الشكل يتغير بنظرتك للشخص نفسه ..
مش ضروري يحب الأشياء الي تحبها ولاضروري يكره الأشياء الي تكرها كذا بتتزوج نفسك ، المهم أنه يكون متقبلها والجميل لما يكون في شخص هكذا لأنه بيعرفك على أشياء ماتعرفها ويمكن تحبها بالمستقبل معه
الناس الي فجاة حصلوا نفسهم متزوجين وماوصلوا لكل هذا ، أجلوا موضوع الخلفة شوية وشوفوا بعض ، لأنه لاقد جو الأطفال بيجلس الكل يضحي من أجلهم ، والرجال بيدور له مرة ثانية او يوقع شوقر دادي ، والمرة ياتدور حب ياتجلس تبكي كل يوم
واستمتعوا بعزوبيتكم لأقصى حد ، لين ماتحصلوا الشخص الي يستاهل تتركوا الحرية ويكون فكرة التواجد معه هي السعادة بحد ذاتها .. أتمنى لكم حياة سعيدة
جاري تحميل الاقتراحات...