كانت شرذمة شاذة من سفهاء القبيلة وسفلتها تهمس "أنت برقاوي.. ليش توقف مع الروقي بالفرعي"..
ويوم وقفنا مع فيصل المسلم بـ ٢٠٠٦، عاتبونا من ورا الظهر -لأنهم أخس وأجبن من الملاقاة- "ليش توقف مع العصيمي وأنت نفيعي"!! ..

وقلنا أن فيصل مواقفه وطنية وتبيض الوجه، والنفعة والعصمة واحد واللي بينهم دم ورحم أكبر من السياسة والانتخابات.
والحين وصلت أنهم يقولون: "ليش توقف مع خالد مونس، أنت زيادي وهو فليت"
يعني حتى الزوّد والفلتة اللي من وقت قريب ما يغزونرإلا تحت بيرق واحد، يبون يفرقون بينهم الرخوم..

أقسم بالله أن القبلية مو بس عدوة الوطن، القبلية العدو الأول للقبيلة، وعدوة المرجلة
يا كم واحد تردى في قبيلته وعيال عمه بداعي القبلية النتنة،وقبلها تردى في وطنه وعيال وطنه
من أول، القبيلة تجتمع على الحياة والموت وما تفرقها البنادق والسيوف، والحين يبون يفرقونها عشان كراسي وصناديق

ومن أول الفرسان والحكماء هم اللي يسوسون القبيلة.. فلمّا ماتت الفروسية وجات الشيلات، شاغبوها الجهّال والصعاليك
ومن أول القبيلة كانت تشرف لأن رياجيلها إذا شافت الرخمة والنذل منهم يوقفونه عند حده، والحين يسكتون عنه طمعًا باللي عنده..
القبيلة من غير شرف وأخلاق تصبح عصابة من اللصوص

لا يصلح الناس فوضى لا سراة لهم
ولا سراة إِذا جهّالهم سادوا
تُهدى الأمور بأهل الرأي ما صلحت
فإن تولّوا فبالأشرار تنقادُ