رتبها

#حدوتة_فيها_حكمة
"الوزغ الوسخ"
كان ياما كان.. في هذا العصر والآوان.. إجتمعت جميع الحيوانات في الحان.. يلعبون ويرقصون.. يمرحون ويفرحون.. يذنبون ويتوبون.. يأكلون ويشتكون..
يتمخطرون ويتهشتكون.. يصبون صباً ويشربون.. ويتغنون بالألحان‼️
فدخل عليهم الوزغ "نوع من أنوع البرص"‼️

وكان هذا الوزغ مشهور في الغابة بنتانة نفسه‼️
حيث كان يتكرع كثيراً ويخرج من فمه ودبره ريحٍ نتنة تتأفف لها الصدور..
وهو لا يبالي بالأذى الذي يسببه لباقي المخلوقات من حوله.. ولا يكترث لتراكم قاذوراته أكواماً فوق أكوام أينما حل.. فتشمئز النفوس السوية لرؤيته قادماً من بعيد..

فإذا بالملك العقرب قد أشار للكلب أن يذهب ليأمر هذا الوزغ الوسخ أن يلتزم بقواعد الحان وإلا فليطرده في التو.. لينعم باقي الزبائن بالهدوء والسكينة..
فذهب الكلب بعد أن سد أنفه!
إلى الوزغ الوسخ ليخبره أن هذه الحانة لها قواعد تحكمها وتحكم زائريها فعليه الإلتزام بها وإلا فليخرج منها..

فتكرع الوزغ الوسخ في وجه الكلب قائلاً لو أخرجتني من هنا ستخرج معي لتتحدث مع أبي"التنين المنفوخ" فأنت تعلم جيداً من هو التنين المنفوخ وما هو قادر عليه‼️
كان الكلب مذهولاً يحاول التماسك والثبات بعد أن فاجئه الوزغ الوسخ بتكريعة أخرى أتبعها برائحة كريهة خرجت من دبره عبقت أرجاء الحانة

بالفعل أظهر الكلب أنيابه مهدداً الوزغ الوسخ وركل مؤخرته ركلةً واحدة ألقت به خارج الحانة.. وخرج بعده وما كاد يفعل حتى علت أصوات تخبيط وترزيع وتكسير ودشدشة سكت بعدها نباح الكلب.. فأشار الملك العقرب إلى الذئب أن يخرج ليرى ماذا حدث أمام الحانة‼️
فإذا بنفس الأصوات تتعالى مرةً أخرى..

وسكت بعدها صوت الذئب بعد صرخةً مدوية بثت الرعب في نفوس باقي الحيوانات.. فتماسك الملك العقرب وأشار إلى الدب ليخرج من الحانة فينظر ماذا حدث للكلب وللذئب.. فتردد الدب وشعر بالقلق على نفسه.. وتباطئت خطواته وتثاقلت نحو البوابة وما كاد أن يقترب منها..

حتى اصدمت به أنف التنين المنفوخ وأطاحت به بعيداً عن البوابة فوقع أمام الملك العقرب الذي كان ثابتاً على عرشه تحيط به أركان الحانة..
ودخلت رأس التنين المنفوخ فقط من البوابة.. وملأت ساحة الحانة.. وفتح فمه ونفخ نفخةً من النار كادت أن تحرق الجميع لولا أنهم تحصنوا وراء مقاعدهم ‼️

ثم صرخ التنين المنفوخ قائلاً:
الوزغ الأوزعة ده إبني.. يعمل اللي هو عاوزه.. بأي طريقة.. أو في أي مكان.. حتى جوة بيوتكم أو أوض نومكم‼️
واللي فيكم فاكر نفسه راجل يطلعلي في الساحة قدام الحانة.. وأنا هخليه مايشوفش الأسفلت اللي واقف عليه‼️
آمين‼️يا شوية ملاعين ولا أطربقها على نافوخكم‼️

ماحدش من الحيوانات نطق بكلمة واحدة.. والتنين المنفوخ سحب راسه من بوابة الحانة والحراشيف اللي في رقبته كسرت عواميد الباب والنار اللي بخها جوة الحانة لسة دخانها معبي أرجاء المكان وأركانه‼️ وكل الحيوانات كانت مبلمة من الخضة واللي نطق منهم كان بيتحسبن في سره.. يادوب بيتمتم بشفايفه..

إلا الملك العقرب كان قاعد على عرشه ماتحركش لإن الدب لما اتنطر قدامه كان محجز عليه ومداريه بكتلة جسمه.. فقال للحيوانات يالا شدوا حيلكم وحمسهم يقوموا يرتبوا الحانة تاني ويشيلوا الردم وينضفوا أكوام الزبالة والقرف اللي الوزغ الوسخ نتره في كل حتة.. وقالهم يفتحوا الشبابيك عشان تهوي

وسألهم محتاجين وقت قد إيه عشان توضبوا الحان ويرجع نضيف ومترتب أحسن مما كان.. الدب قاله محتاجين أسبوعين يافندم..
رد الملك العقرب وقال: لأ كده كتير.. هستلم منكم الحانة نضيفة ومتوضبة في يومين.. بس يومين ‼️
وبالفعل الحيوانات ماكدبتش خبر وعملوا اللي يقدروا عليه وظبطوا حال الحانة..

وإجتمع الملك العقرب بالحيوانات بعد يومين يطمن على مسيرة الشغل والأعمال.. ويحاسب أهل التراخي والإهمال.. وبعد ما صب في مصلحة الموظفين والعمال.. طلب منهم تحديد موعد إعادة إفتتاح الحانة.. وقرب منه الوزغ الوسخ واتكرع جنبه.. فالملك العقرب زرجن وبدأ يزوم.. وبص ناحية الوزغ الوسخ وقال:

ممكن ياوزغ ياصغنن تبقى تحط إيدك على بؤك وانت بتتكرع عشان كده عيب‼️
رد الوزغ الأوزعة الوسخ وقال وإنت مالك ‼️أنا محدش يقدر يعملي حاجة ولو مش عاجبك هندهلك التنين المنفوخ ينفخك..
تماسك الملك العقرب وقال طب ممكن تروح توصل دعوتي للسيد المحترم معالي التنين المنفوخ لحضور حفل الإفتتاح‼️

الملك العقرب كان بيحاول يبعد الوزغ الوسخ عن طريقه بأي حجة عشان ما يتنرفزش عليه والدنيا تتقلب والتنين المنفوخ يجيي يخربها تاني‼️
قام الوزغ الأوزعة الوسخ قال بكل صفاقة وبجاحة وهو بيقوّر في مناخيره ويلحس صوباعه.. إذا كان كده يبقى ماشي الحال..
ومشي يفرفط في خراه لحد ما خرج من الحانة

باقي الحيوانات فضلت تبص للملك العقرب مش فاهمين اللي بيحصل.. قالوله يافندم إزاي تدعو الكائن المخيف ده في حفلة كلنا متجمعين فيها.. رد الملك العقرب ماهو أنا لازم أشوف مين التنين المنفوخ ده‼️
و ليه مش عاوز يربي إبنه كويس ونعيش كلنا في سلام؟!
يمكن لو اتكلمت معاه أقدر أقنعه..

بس في الحقيقة الملك العقرب كان متوتر من فكرة حضور التنين المنفوخ في ساحة الحانة.. وكان متوجس منه يعمل حركة كده ولا كده تهد أساس الحكم‼️
بس مش نافع معاه العافية.. يبقى نجيبه بالسياسة‼️
وبص للحيوانات وقال: وأهو كله عشان مصلحتكم.. إنتوا مش عارفين إن إنتوا نور عينينا ولا إيه 🤩

المهم جيه يوم الإفتتاح والملك العقرب متجمع مع كل الحيوانات عشان يحتفلوا بالإفتتاح وبدأوا يشموا ريحة الوزغ الأوزعة الوسخ جاية عليهم من ناحية الباب.. ودخل باب الحانة اللي بيفتح ويقفل من الناحيتين ده..
ومن غير استئذان دخل يتكرع ويطرش ويمد إيده في أي طبق يقابله ويمصمص ويرمي حواليه

والملك العقرب سأله أومال فين أبوك ما جاش معاك ليه🤷🏻‍♂️
قاله أبويا قالي روح وأنا هحصلك.. مالحقش يكمل الكلمة لقى التنين المنفوخ داخل من بوابة الحانة‼️
والوزغ الوسخ شاور عليه وقال أبويا أهو👇🏽
وإذ فجأةً 😳‼️
تعالت أصوات الحضور وكل الحيوانات فطست من الضحك لما شافوا التنين المنفوخ ‼️

أتاري التنين المنفوخ ده مجرد برص تافه اسمه برص التنين أو سحلية التنين عشان بينفخ في شلاضيمه ويهز كتافه لما يجيي يتخانق فيبان شكله مرعب.. إنما هو حتة سحلية ابن سحلية مالوش لازمة.. هو من سلالة تتغذى على الحشرات ولما استفحل واستقوى افتكر نفسه تنين بجد.. ونسي إن حجمه أقل من كف الإيد

التنين المنفوخ لما شاف الحيوانات عمالة تضحك وتتمسخر عليه.. جَعَرّ وفشخ حنكه وبدأ ينفخ رقبته وصدره عشان يهتهم ويخوفهم.. بس هما كانوا خلاص شافوا حقيقته وعرفوا حجمه فهجموا عليه وفعصوه برجليهم هو والوزغ الوسخ إبنه ودعكوهم في الأرض بحوافرهم ومخالبهم لحد ما ساووهم بالبلاط..

والملك العقرب كان فرحان بحماس الحيوانات.. وخصوصاً لما بدأوا يهتفوا بحياته ويشكروه على حكمته العظيمة لإنه صاحب فكرة إستدعاء التنين المنفوخ وكشف حقيقته على رؤوس الأشهاد..
وقام الملك العقرب يأمر بالصب في نخب المدعويين وعمت الفرحة أرجاء العباد.
⚫ تمت ⚫
#حبلظة .. من تأليفي 😅

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد