رتبها

#ثريد عن :
كيف أقدر اقرأ أقل بس بذكاء واحصل على نتايج احسن ؟ ..
ثريد دسم ومليان بيتكلم عن كيف تقدر تقرا معلومات كتيرة وتترسخ وتتحفظ بذاكرتك في زمن قليل وبدون ما تزهج من القراية وتمل منها
( لو ما بتحب الكلام الكتير في ملخص وزيت للثريد في الأخر )

فكرة أنك تقرأ أقل وتحصل على نتايج اكتر واحسن بتحس بيها خيالية بس الحاجة دي قابلة للتحقيق وواقعية جدا ودة الحتكلم عنو في الثريد وهو ملخص لمحاضرات ومقاطع طويلة شفتها وحبيت اختصرها ليكم في ثريد على شكل نقاط معاها الشرح
اتمنى تستفيدو 🙌..

1- فترات الاستراحة والمكافئات ( Break & Rewards)
أول نقطة حتكلم عنها هي فكرة الاستراحة بين الجلسات وليه هي مهمة؟
كلنا أول ما نبدأ القراية بنكون بكامل تركيزنا وأغلب البنقراهو في أول نص ساعة بنستوعبو بالكامل بس المشكلة أنه مع مرور الوقت تركيزنا بيقل بصورة كبيرة واستيعابنا بيقل

لغاية مانلقى روحنا وصلنا مرحلة أننا بنقرا بس ما فاهمين أي شي اللهم بنقرا في الكلام وبنحفظ لكن مامستوعبين ومافاهمين اي حاجة وبنكون طاشين والكلام مابيخش راسنا ، المهم العلماء الأجانب ربنا يجزاهم بالخير عملو تجارب واختبارات عشان يفهمو الحكاية ويقدرو يحددو الوقت المناسب للجلسة

" الجلسة بقصد بيها القعدة الواحدة قبل ال Break " ولقو أنه انسب وقت للجلسة يكون بين 25-30 دقيقة ما اكتر من كدة، يعني تقرأ نص ساعة وبعدها تاخد Break لمدة 5 دقايق وال Break بتعمل فيهو تغير بيها جو وترفه عن نفسك عشان تقدر ترجع بكامل تركيزك من أول وجديد

ويفضل في ال Break دة أنك تتجنب الحاجات الممكن تسرق منك الزمن بدون ما تحس او البتاخذ زمن طوييل ( زي الميديا أو التلفون عموما ) ممكن في الفترة دي تقوم تلف تشم هواء وتجي راجع للقراية تاني المهم اي شي مابيسرق منك الزمن

فحكاية أنك تقعد تقرأ ل 3 ساعات متواصلة دي حاول اتجنبها لأنها ما عملية أبدا ومامنطقية وماحتديك نتايج فعالة.

2- مكان المذاكرة ( Studying Area )
لازم يكون عندك مكان معين مخصص للقراية والمكان دة مابتعمل فيهو أي حاجة غير أنك بتقرا فيهو وبس وعليك الله ماتقرا في سريرك البتنوم فيهو والله ساعة بالكتير وحتلقى روحك نمت حتى لو كنت صاحي قبل ساعة حتلقى روحك نعست وحتنوم تاني

أي القراية مملة وبتنعسك بس دة ما السبب الاساسي ، السبب الاساسي هو أنه دماغنا بيربط بين الحاجات ووظائفها ، بمعنى لمن ترقد في السرير دماغك تلقائيا بيتذكر النوم ف وأنت بتقرا انت بتقاوم رغبتك في النوم وأنت ممكن تقرأ في الاماكن دي عادي بس حتلقى روحك بتستهلك تركيز كبير ومجهود كبير

في أنك تقاوم رغباتك التانية ، ف أنسب حل للموضوع دة وعشان تركيزك ما يتشتت أنك تخصص مكان محدد تقرأ فيهو مثلا مكتبة صغيرة أو كرسي و طربيزة وعود نفسك دايما تجي تقرأ في المكان دة وماتعمل فيهو أي حاجة غير أنك تقرأ فيهو وبس يعني يكون مكان مقدس للقراية

3- التعلم الفعال ( النقطة دي معقدة شوية بس مهمة فركزو فيها )
في استراتيجية أسمها SQ3R
S > Survey
Q> Questions
3 R> Read- Recite- Review
طيب مفهوم الاستراتيجية دي هو أنه لمن تبدا قراية أي مادة أو أي درس أول خطوة تعملها هي أنك تتصفح المادة دي أو الدرس دة بصورة عامة

لغرض تاخد فكرة عن الدرس وتعرف هو بيتكلم عن شنو وفيهو شنو وتقعد تعاين للصور والعنوانين على أساس أنك تقدر تاخد صورة مسبقة عن الدرس قبل ماتبدا تحفظو وتكون عارف روحك بتقرا في شنو وفاهم الدرس وعارف العناوين

الحاجة دي بتسهل عليك الموضوع واحسن من أنك تقرأ كلام كتير أنت اساسا ما عارف عنو شي وما فاهمو وممكن اغلبو يكون حشو ساي وما مهم،
وأتذكر دايما انه أهم قاعدة في القراية أنك تفهم الكلام الانت بتقراهو وما بس تحفظو لأنه الفهم بيساعدك تتذكر المعلومات لفترة أطول

4- اقرأ مع جماعة Group
في مقولة معروفة بتقول أنه أحسن طريقة عشان تتعلم حاجة هي أنك تعلمها وتشرحها للناس، فلو قدرت مع مجموعة كلكم مع بعض سوا وتشرحو لبعض بيكون أحسن ب كتير بس بشرط تكونو جادين لأنه معروف أي قعدة بتاعت أصحاب بتتحول من جلسة قراية ل جلسة ونسة ولعب وضحك

مامشكلة اتونسو واضحكو والعبو بس بعد ما تخلصو القراية قسمو زمنكم على أنه تدو الاولوية للقراية وبعد ما تخلصو منها بتقدر تعملو اي حاجة انتو عاوزنها واتذكر دايمآ البتتعلمو علمو للناس

5- فن الاستذكار
المفهوم دة بيعني انك تحاول تربط الحاجة الانت بتقراهو أو الكلام ب حاجة تانية بتخليك تقدر تتذكرها بصورة مرسوخة داخل عقلك ونفس الفهم لو عاوز تحفظ بيت شعر مثلا ممكن تلحنو ل أي اغنية بتحبها وحتقدر تحفظ بصورة أسهل

6- آخر وأهم نقطة النوم الكافي كل يوم
دماغك بيسجل الحاجات الحفظتها والقريتها دي كلها في الفترة الانت بتكون نايم فيها، فلو أنت ما نمت كويس كأنك ماقريت أي حاجة وعموما النوم مهم ل أي حاجة تقريبا ل صحتك وعشان تقدر تكمل يومك بنشاط ولازم أقل شي تنوم في اليوم أقل شي مابين 7-8 ساعات

اتذكرو دايمآ أنه القراية المن غير رغبة ما بتفيدكم ابدا وبتخرب ليكم الذاكرة ولمن تقرأ وأنت ماعندك رغبة غالبا ما حتستوعب حاجة من الانت قريتو فلازم تكون عارف أنت بتقرا ليه؟ وعاوز تقرأ عشان تصل لشنو؟ وهدفك شنو؟
الرغبة مهمة جدا عشان تديك دافع تكمل دايمآ

ختاما
بتمنى أنه الثريد ما كان طويل عليكم 😂 و تكونو استفدتو من النقاط الاساسية الفيهو ويساعدكم في القراية فتقدرو تستمتعو بيها اكتر " عارف موضوع المتعة في القراية صعب بس ما مستحيل " أو ع الأقل تقدرو تقرو بصورة أقل بس بفاعلية اكتر وتحصلو نتايج أحسن.
الملخص 👇

زيت الثريد :
• حدد زمن معين ل جلسة القراية الواحد ولازم ماتزيد عن 30 دقيقة عشان تركيزك يكون كامل واخد Break كمكافأة بين كل جلستين قراية مدتو 5 دقايق
•ماتقرأ لمدة طويلة ساعتين واكتر بدون ما تاخد استراحة في النص لأنه تركيزك حيقل وماحتستوعب البتقراهو

• خصص مكان معين للقراية واعتبرو مكان مقدس مابتعمل فيهو أي حاجة غير أنك بتقرا فيهو وبس
• اقرأ ب استراتيجية SQ3R "شرحها فوق" مفهوم الاستراتيجية بصورة مختصرة هي أنك لازم تتصفح المادة أو الدرس البتقراهو أول قبل ماتحفظ وتحدد العنوانين الرئيسة المهمة وتفصلها عن المامهم

• أهم قاعدة في القراية أنك تفهم الكلام الانت بتقراهو وما بس تحفظو لأنه الفهم بيساعدك تتذكر المعلومات لفترة أطول من أنك بس بتحفظ
• اقرأ مع جماعة
• أحسن طريقة عشان تتعلم حاجة هي أنك تعلمها وتشرحها للناس
• لازم يكون عندك رغبة وهدف من القراية والرغبة مهمة عشان تديك دافع تكمل

• القراية المن غير رغبة ما بتفيدك ابدا وبتخرب ليك الذاكرة فلازم تكون عارف أنت بتقرا ليه ؟ وعاوز تقرأ عشان تصل لشنو ؟
• أربط الحاجات الانت بتقراها أو الكلام ب حاجات تانية بتخليك تقدر تتذكرها بصورة مرسوخة داخل عقلك
• النوم لازم تنوم في اليوم أقل شي 7-8 ساعات

لو عجبك الثريد لايك + ريتويت + متابعة عشان ماتفوتك باقي الثريدات 🙌

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد