كتير مننا عارف لما بتيجي تشطب شقة بنسأل على الانشاءات والسباكة والكهربا، لحد المحارة والدهان والرخام ..معرفة متوافرة بالأسعار والأنواع وخبرة الناس حواليك بتقدر تحكم على جودة الشغل اللي معمول ده مقابل التكلفة.. في صناعة ال IT وتسليم الحلول والنظم الموضوع أصعب شوية، تعالوا نشوف ليه
في الواقع في تقارب ما بين مشروع تشطيب شقة وما بين تصميم حلول ونظم معلومات لدرجة أن حتى وقت قريب كانوا الاتنين بيتبعوا نفس أسلوب إدارة المشروعات حتى ظهور مفهوم ال Agile (المنهجية الرشيقة) والتحول من ال Waterfall (منهجية الشلال).
تظل الثقة في تسعير وتحديد جودة المنتج واختيار الحلول والمنفذ من السهل التلاعب فيه لتعدد الأدوات وتفاوت أسعار الخدمات بشكل كبير ودايما الClient عايز أعلى جودة بأقل Budget. وهناك اعتقاد أن برمجة نظام أو تطبيق شيء أسهل مما يبدو عليه من تشطيب شقة مع أن الاتنين مش سهلين وهنشرح ليه
لما بتيجي تشطب شقة بتشوف مراحل التنفيذ وتقييمها قبل التسليم، لما بتيجي تبني نظام أو تطبيق مش بتبقى شايف غير اللي أنت تقدر تجربه اللي هي الخصائص اللي تم تسليمها، لو معندكش ناس مسئولة عن ال Quality فاهمين تقنيا كفاية هتبقى كأنك بتستلم شقة من غير ما تعرف حاجة عن المواسير
لو اعتبرنا أن تنفيذ حلول معلوماتية هو تشطيب شقة، فشغل الانشاءات والأحمال والطوب الأحمر ومكان البناء بيندرج تحت الInfrastructure البنية التحتية، في البنية التحتية المعلوماتية هي خدمة استضافة التطبيق Hosting وتأمينها وتكلفة استهلاكها وقدرتها على تحمل التطبيقات والمستخدمين عليها
وزي النقاش ما بين المهندس المدني والمعماري اللي عايز ينفذ تصميمات بشكل معين والمدني اللي مهتم بقدرة الإنشاء على التحمل والبنية التحتية، فتصميم الحلول فيه نفس النقاش ما بين مصممين الخدمة وخاصة شكلها (Front-End) وما بين مصممين النظام اللي وراها وقواعد البيانات والبرمجة (Back-End).
أيضا الصيانة Maintainability فلو مفيش خرائط بالتصميمات الداخلية في شقة وباظت بعد الاستهلاك حتى ولو شكل التشطيب النهائي حلو هتواجه مشكلة صيانتها وتجيب مهندسين يحللوا لحد ما يكتشفوا العطل، نفس الموضوع في تصميم النظم لو مفيش Documentation هتواجه مشكلة في صيانتها
برضه في مفهوم ال Scalability أو التوسع في تقديم الخدمة، في تشطيب الشقة لو لوحة الكهربا 1 فاز بس عشان تسترخص والأحمال عدت الفيوزات هتضرب، نفس الفكرة في تصميم النظم وقواعد البيانات ممكن يتم تصميمها بشكل رخيص يخليها تشتغل لحد احتمال معين وبعدين الخدمة تتوقف أو تتعطل
من الحاجات المهمة برضه اسلوب ال Testing أو أختبار الشقة، لو جالك كهربائي وسلمك الشغل من غير ما تشوف كل فيشة ومفتاح هتتعب بعد كده لو حاجة باظت، نفس الموضوع في النظم واختبارها بتمر بأنواع مختلفة زي اختبار الخصائص Functional Test واختبار التكامل Integration Test والPerformance Test
وأخيرا تأمين نظم المعلومات وهو الأخطر، لو حضرتك بتشطب شقة وجايب باب تعبان بمفتاح سهل يتقلد ماتزعلش لما البيت يتسرق، نفس الموضوع في انشاء نظم المعلومات تأمين البيانات وخاصة في الوقت اللي أحنا فيه من الأشياء اللي بتفرق جدا في جودة المنتج النهائي
يعني حبيت أوضح لكم شوية باستخدام التشبيه Analogy أيه اللي بيخلي تصميم نظم وبرمجتها بيختلف سعره بشكل كبير وأيه مواطن القوة والضعف في الجودة اللي من خلالها ممكن لو استرخصت مشاكل في استخدامك للنظام ده تبقا كبيرة وغير قابلة للصيانة، زي بالضبط ما لو شطبت شقة غلط هتواجه مشاكل كتيرة.
نسيت أقول أن فيه مصطلحات مشتركة ما بين انشاء نظام معلومات وانشاء المباني، الاتنين فيهم Engineering والاتنين فيهم Architecture وInfrastructure وحتى Contractor أو المقاول والاستشاري Consultant وغيرها وده ممكن يبقا راجع زي ما قلت أن الاتنين اتبعوا منهجية ادارة مشروع واحدة في البداية
جاري تحميل الاقتراحات...