سئمت من وكالة السيارة اللي تاخذ على كل زيارة 600 الى 800 ريال عشان تشييكات وعلبتين زيت وقررت أتمرد على المجتمع وأخرج من ذمة ولي أمرها

ماراح أقول انهم نصابين بس تأكد أن كل جهة ربحية تسعى للربح قبل كل شيء ولا تعطيك عرض ضمان لسواد عيونك ولا تعطيك شيء بدون ربح أو حتى بدون مقابل .. لذا بعد التحليل والتدقيق والأكل على الأفا استمع لي بارك الله فيك حتى لا تصير سلعة سهلة للإستهداف

بحسبة بسيطة إقتصادية:
هم معطينك ضمان خمس سنوات أو ١٥٠ الف أو أيهما أقرب مقابل الضمان على القير والمكينة ولو خرجت برا تشييكات الوكالة بيروح الضمان طيب حلو كم نسبة تخبيط القير أو المكينة لاسمح الله ؟ خلينا نقول ١٠٪ طيب لو خربت كم سعرها ؟ خلينا نقول ١٠ آلاف إلى 15 ألف

طيب هل تعلم أنك لو تلتزم معهم بالصيانات الدورية لمدة ٥ سنوات ياخذون منك ٢٠ ألف وأكثر ؟ شف خطة الصيانة الدورية اللي عندهم بتلاقي كل عشر آلاف مع التشيكيات توصل الى ٨٠٠ واذا فيها تغير قير يوصل ١٢٠٠ فوق إنك لازم تحجز موعد ولازم تجيهم الصبح بوقت الدوام وممكن تكون الوكالة بعيدة ووو

لذلك اذا معك موتر جديد تعوذ من ابليس وخليك من سالفة الصيانة الدورية وشف لك بنشري شغله ممتاز وزيته وكالة أصلي وبتوفر عليك وحتى لو صار شيء وكان الخطأ مصنعي الشركة ملزمه بالضمان حسب وزارة التجارة