في المجال الرياضي"الكروي "الخلاف الأزلي والمستمر هو مين افضل ميسي او كرستيانو؟ النصر او الهلال؟في المجال المالي (الاسهم)فيه خلاف دائما مايكون اشبه بفريقين مختلفين ودائما النقاش يكون قوي عن التحليل الأساسي والتحليل الفني ومين الصح ,خلوني اشرح لكم بشكل بسيط النوعيين ومين أفضل
التحليل الأساسي:تحليل مبني على تحليل البيانات المالية والرقمية للشركة, تخيل معي نحلل شركة العثيم,اولا لازم نجمع بيانات تخص الشركة مثل القوائم المالية, ارقام قطاع التجزئة, ارقام المؤشرات الاقتصادية, وبعد مايكون عندك هذي المجموعة من البيانات تبدا تحاول ان تجاوب بعض الاسألة مثل:
وش نشاط الشركة ؟مصادر دخل الشركة ؟قوتها المالية في تجاوز الازمات المستقبلية؟كفاءة ادارتها ؟من البيانات تستطيع ان تقارنها بالمنافسين في القطاع واستنتاج هل هي افضل من غيرها او لا. ومن ثم تحدد مستقبل نمو الشركة اللي تتوقعه من خلال الارقام واستنتاج اهم معيار وهو هل سعرها مناسب او لا
طبعا المسالة موب سهلة وبسيطة لان الارقام وتحليلها يحتاج له وقت وتعمق في الشركة, وبعد ماتحلل البيانات تقارن السعر اللي قيمته واستنتجته مع السعر الحالي بالسوق, وتشوف هل سعر السوق اعلى او اقل او نفس سعر السوق, ثم تتخذ القرار بشراء او بيع سهم الشركة اللي حللتها بالتحليل الاساسي.
التحليل الفني: هو التحليل اللي يعتمد على التنبؤ وتوقع اتجاه السهم من خلال الاسلوب والنمط في الماضي, بمعنى اخر انك تحلل السهم بطريقة تتوقع وش راح يصير في المستقبل من خلال الاحداث الماضية اللي حصلت للسهم ويتم تحليل نمط واسلوب السهم من خلال رسوم بيانية.وحدة من الأمثلة في الصورة:
اللي يتبعون هذا الاسلوب من التحليل يحاججون ان التاريخ يعيد نفسه,وان نمط واسلوب المستثمرين دائما متكرر,وان الاسعار ماتنزل او تصعد عشوائيا بل انها تتبع اتجاه معين. من يستعمل هذا الاسلوب من التحليل لا يهتم بنشاط الشركة او نمو ارباحها. ويعتمدون بشكل كبير على نمط الرسوم البيانيه للسهم
هذي صورة توضح بعض الاشارات اللي يحاول المحلل الفني معرفة اسلوب سعر السهم من خلالها. فمثلا من خلال تكون هذي الاشارات لسهم معين, يقدر هو يستنتج قرار بيع او شراء السهم اللي يحلله اذا رسمت نفس الاشارة. فيتخذ القرار بناء عليه حتى من دون معرفة وفهم مكانه الشركة وخطورة الاستثمار فيها.
نوصل للموضوع المهم وهو وش افضل أسلوب؟طبعا لكل أسلوب له ايجابيات وسلبيات, مع التحليل الأساسي والاهتمام الكبير بمجال الشركة وارباحها ,التقييم ممكن يكون اكثر واقعية, الا ان من عيوبه عدم امتلاك قاعدة بيانية جيدة احيانا,فما تستطيع ان تحلل بشكل دقيق,ناهيك عن الوقت الطويل لعملية التحليل
اما التحليل الفني طبعا اسهل واسرع من التحليل الاساسي, وايضا يعطيك انطباع عن اتجاه السوق والمستثمرين على المدى القصير. بما يخص عيوب التحليل الفني هو اختلاف قرائات المحلليل, فممكن من نفس الرسم البياني انت تحلل و تقرر ان السعر يستمر بالصعود اما المحلل الاخر يتوقع بنزول السعر!
وايضا من اكثر العيوب في التحليل الفني هو ان بعض المؤشرات تعطيك اشارة شراء, وفي نفس الوقت بعض المؤشرات تعطيك اشارة بيع! فيكون عندك عدم قدرة على تحديد الاستراتيجيه الدقيقه في اتخاذ قرارك الاستثماري باستعمال هذ التحليل.
بعض المستثمرين يؤمنون بمنهجية واسلوب واحد, وبعض المستثمرين وجدوا اسلوب جديد وهو التحليل الكمي:ويكون عن طريق دمج الأسلوبين في اتخاذ قرارهم الاستثماري, فمثلا يقدر يشوف نجاح الشركة ويقيم سعرها, ويستعمل الرسوم البيانيه لاستدراك نمط واتجاه السعر ومعرفة الوقت المناسب لشراء او بيع السهم
في الختام, لكل اسلوب ايجابيات وسلبيات,من المهم ان الشخص يحاول ان يكون غير منحاز لاسلوب معين فقط لانه يحبه او يعتبره هو الصح والاسلوب الاخر سيء وغير مجدي, واهم شيء لا تسمع لكلام او توصيات اي شخص وتتبعه في اي قرار الا بعد ما تتأكد من نفسك عشان ما ينلعب عليك . اشوفكم على خير.
جاري تحميل الاقتراحات...