الإثنين ٢١ تشرين الأول ٢٠١٩ حوالي الساعة ٤ بعد الظهر توجهّت على مصرف لبنان بعد ٣ إيام اعتصام برياض الصلح، آخر نهار كان الأحد ومن بعد ما شفت تحوّل الغضب بشكل تدريجي من الخميس لجو عائلي الأحد،قلت بيني وبين حالي انو هيدا آخر نهار بنزل فيه لتحت.يا بقعد بالبيت يا بشوف مطرح خرج اعتصام
التنين الصبح بلاقي دعوة من شاب اسمه محمد نحلة للتوجه على مصرف لبنان،بحمل حالي وبنزل عالوقت المحدد وبلاقي هل مشهد امامي، بعدين عرفت أسماؤهم نحلة واللحام وعليا وباسل. وجنبهم ابراهيم مشورب وابراهيم يونس وسحر غدار وكم شاب وصبية ما متذكر اسماؤهم
وبيجي اعلامي على الموتو ليغطي الحدث بس كان رئيس الحكومة سعد الحريري طالع بخطاب الخطة الإصلاحية وتسمعنا عليها على راديو سحر غدار بسيارتها، بس خلص الخطاب هيدا الاعلامي (المناهض لسعد الحريري) بقلنا بالحرف "شو بدكن احسن من هيك خطة،انت برأيي هيدا أفضل شي،خلص طلعوا وبلا هل اعتصامات"
حمل حالو عالموتو وفل، بقينا تحت واجت كم محطة وغطت رجعت اجت الصحافية ايلدا غصين من الأخبار وأخدت أراء من بينهم رأيي، ومن وقتها لمدة حوالي الشهر ونصف كل يوم داوم على مصرف لبنان من دون ما قطّع نهار. وشاركت رجعت بشكل كثيف بمعظم الفعاليات من اقتحام مصارف لمظاهرات
لليلة المصارف (أجمل شعور تحطيم واجهة مصرف من بعد ما تكون آكل قتلة من المكافحة) للاشتباك مع الدوك تاني نهار ع ثكنة الحلو لكتير محطات.
شو حققت؟ يمكن مش كتير ويمكن فشلت وفشلنا لهلأ بالتوعية اللازمة للناس عن وحوش الأحزاب الحاكمة والمصارف
شو حققت؟ يمكن مش كتير ويمكن فشلت وفشلنا لهلأ بالتوعية اللازمة للناس عن وحوش الأحزاب الحاكمة والمصارف
بس الأكيد إني مش ندمان ولا على ثانية كنت فيها تحت، اذا ما قدرت أعمل شي للشعب وللوطن،عملت شي لإلي أنا،بس تروح وتجي الإيام وتسوء الأوضاع أكتر أو يصير تسوية على حسابنا،بكل فخر وراحة ضمير بخبّر ولادي بس يسألوني وين كنت،بقلهم كنت العلكة الملتصقة بحذاء السلطة والمصارف ويلي زعجتهم
ويلي حاولوا يتخلصوا منها ويمكن قدروا بس المهم زعجتهم وعكرتلهم مزاجهم.
جاري تحميل الاقتراحات...