بص احنا هنعمل ندوة عن المرأة المصرية بس هنتكلم بالانجليزى عشان المرأة المصرية ماتفهمناش، سورى أسرار بقي ❤️
المشهد ده فحرنى بالمنشورات وقت #الفيرمونت اللى كانت في معظمها بالانجليزية.. واللى بتحمل معنى ضمنيا ان التحرش ده مش المفروض يحصل للطبقة الغنية اللى معاها فلوس وبتدخل AUC وبتتكلم انجليزى كويس
زي ما يكون فيه تصور جمعي عام بان حقوقك كمصرى/ مصرية مرتبطة بطبقتك الاجتماعية.. انتى فقيرة في حى شعبي اه عادى انك تتمرمطى في البيت والشارع والمواصلات كل يوم.. انما احنا بنات عائلات محترمات بنسهر في الفيرمونت ازاى يحصل لنا كده!!
أؤكد هنا بس بشكل عرضي تضامنى الكامل مع ضحايا حادثة الفيرمونت .. الكلام اللى بقوله محاولة لفهم السيستم اللى ببنتج ده كله وبيحطنا في المواقف دى
الطبقة الغنية في مصر بعد ما لقت كل حاجة حولها تجتماعيا بتنهار، مفيش قانون..مفيش امن. مفيش اى خدمات ذات مستوى جيد .. اختاروا يعملوا الجيتو بتاعهم.. بيوتهم المعزولة، شوارعهم،كومباونداتهم، محلااتهم مستشفياتهم مدارسهم.. بل بعد تجربة مدينتى على استحياء حاليا بقي خلاص بيعملوا "مدنهم"
من العاصمة الادارية،للجلالة، للعلمين ، سابقا وحاليا الساحل الشمالى كمكان حتى لو حبينا نبقي في مكان عام صعب اغلاقه كشواطىء اسكندرية او غيرها فاحنا لا نعمل اقليم كامل من البلد بعيد عن الرعاع دول ويبقوا يورونا هييجوا ازاى
للاسف كل يوم بتحصل حادثة او اتنين تفكرهم ان ده مش حل.. وانتوا مش بعيد كفاية.. أينما تكون في مصر هيطولك "السرسجية" والطبقة الفقيرة بكل انتاجات الفقر والدخل المحدود وغياب الخدمات الاساسية
حادثة الفيرمونت في أساسها بتقول ان حتى لو انت غني، ومتعلم أحسن تعليم في مصر، واصحابك كلهم في نفس طبقتك المادية (ناس نضيفة/ ولاد ناس) وسهران في مكان بعيد عن كل تعفنات قاع المدينة.. الا انك للاسف بتفاجئ انه بيحصلك اعتداء بنفس بشاعة وجرم سلوكيات القاع
حتى البنت رغم كل الحقوق اللى عندها بحكم طبقتها وعيلتها وعلاقاتهم ماقدرتش تتكلم وقتها ولا سابت البلد كحل وحيد بتاخده أى بنت في اى قرية فقيرة لما حد يعتدى عليها.. تخيل اتنين على طرفي السكيل كله حلهم في الاخر يبقي نفس ذات الحل!
لما البنت اتكلمت بعد 6 سنين والموضوع اخد زخم بالسوشيال ميديا هنا حصل حاجة مختلفة عن كل مرة.. لاول مرة الجموع الغفيرة من الفقراء والنص فقراء بقي ليهم صوت، بل ولعددهم الكبير نسبيا لما تقارنهم بعدد الاغنياء لا هو صوتهم أعلى
السوشيال ميديا بتدى كل واحد صوت، وتأثيرك بيعتمد بشكل كبير على مدى انت relevant قد ايه للجمهور اللى بتخاطبه.. فلاول مرة في القضية دى البنات الفقيرة بقصصهم الكتير نظرا لانهم أكتر ناس بتتعرض لجرائم العنف الجنسي ادوا القضية زخم وعلوا صوتها..
لدرجة انه بعد شهرين من تجاهل الميديا العامة واجهزة النظام وصلت لمرحلة انه خلاص لازم تاخد فعل.. وماشاء الله اول تحرك للدولة وادواتها كانوا انهم يقبضوا على بنت ويسربوا صورها الخاصة
النظام كعادته يعني قالك ايه ده انتوا محتميين يعني بالطبقة الفقيرة دى! بتستعينى بولاد البواب يا انجى عشان تطالبي بحقك!! طب أنا بقي هوريهم السفه اللى انتوا كاغنياء عايشين فيه وكل المميزات بتاعتكم بقي، حفلات جنس جماعى وصبيان وبنات وعلاقات جنسية كااااملة
اللحظة دى كان فيها تحول غريب شوية في منشورات الصفحات اللى نشرت القضية.. يا سبحااان الله يا مؤمن بقت معظم البوستات بالعربي السهل السلس بتاعنا اللى كلنا بنفهمه. بل زبصور توضيحية كمان!!!
اه للأسف بقي معلش يا طبقة فقيرة محتاجينكم معانا في الطلعة دى
اه للأسف بقي معلش يا طبقة فقيرة محتاجينكم معانا في الطلعة دى
الغريبة كان محتوى الخطاب نفسه.. اللى هو ..عزيزي الفقير ساكن العشوائيات.. أنا عايزك تفهم ان البنت -اللى ملكش دعوة بجنسانيتها عشان دى حريتها الخاصة- من حقها تسهر حتى لو في حفلة جنس جماعى وسكرانة مش المفروض ان حد يستغل ده ويبرر ان يتم الاعتداء عليها جنسيا!!!
أنا فاهم والله ان محتوى الخطاب صح، ويعنى أتمنى والله أشوف ده اتفاق جمعي جوة الكود الاخلاقي المصري العام يعنى.. بس لحظة بس الأول.. انت ملاحظ انت بتكلم مين! ملاحظ طيب خلفية الدينية والثقافية والتعليمية ايه!!
انت بتكلم حد اتولد في العشوائيات معدومة الخدمات ولا الريف اللى مليان الفلاحين اللى بتتريق عليه كل يوم وجاى تقوله انا عايزك معلش في النقطة دى تبقي مواطن سويسري!! هل ده منطق!!
فاللى هو غالبا بدل ما تقرب من الطرف التانى ده لأ ده انت عزلته أكتر.. المحاولة كلها في مجملها كاى حاجة أنتجتها الطبقة دى في مصر، خايبة وفاشلة وعبيطة..
هو مين يا غبي اصلا اختار انه ينفصل عن باقي المجتمع! هل شفت بتوع امبابة اتظاهروا ضد انه يتعمل محور مرورى يعدى فوق بيوتهم لا الاغنياء يشوفوا بيتهم من فوق وتعجبهم حاجة فينزلوا وامبابة تتملى اغنياء بقي!! انتى اللى كل يوم بتحاول تعزل نفسك أكتر واكتر
فللاسف النظام بقي سهل يزنقك كأى أقلية ضعيفة.. اه معاك سلطة مال بس في الاخر كعدد قليل.. وفي اى وقت ممكن يهيج عليك الطبقة اللى بره كومباونداتك دى يهجموا عليك ياكلوك انت شخصيا.. وليس ما حدث بأركيديا أيام الثورة علينا ببعيد
ثم لحظة كده خلينا نتأمل هو مين هو (النظام) ده!!! صحيح في عسكرى قاعدلك فوق بس خلينا نشوف ادواته كده.. الوزراء دول كلهم ههتلاقيهم جايين من نفس الطبقة الغنية دى .. بتفاوتتها بقى .. حقيقة انت لو دققت شوية هتلاقى ان جزء كبير منهم جاى من نفس مجتمع ال AUC ده
مش بعيد اصلا لو جيت تسأل اى AUCIAN عن حلمه او تصوره لمستقبله فى مصر كده هتلاقيه نفسه فى النهاية يبقى سفير ولا وزير ولا يكبر شغل ابوه عشان فى الاخر برده يبقى فى الوزارة ويعرف يكبش من التورتة كبشة اكبر
هم نفس الناس الضحايا فى القضية دى لو بصيت للى بيقهروهم من النظام هتلاقيهم نفس الناس برده بس النسخة المستقبلية بتاعتهم ليس الا ..
ادى يا عم شوف مين مايا مرسى رئيسة المجلس القومى للمرأة.. اللى هو قالت للبنات تقدموا وهنحافظ على سرية هويتكم ومجرد البنت اللى بتنشر اتعرفت من هنا موبايلها الخاص وصورها بقت على كل مواقع الانترنت عالمشاع!! فانتوا بتهببوا ايه يعنى بتهببوا ايه!!
أتمنى الناس اللى فى الطبقة دى تاخد خطوة ورا وتقف ولو للحظة تفكر كده هي بتعمل ايه وبتتحرك ازاى.. وان محاولات النضال لمجرد كسب امتيازات خاصة بطبقتها بس لن يفيد.. النجاة فى المجال العام نجاة جماعية .. يا نعيش عيشة فل يا نموت احنا الكل للأسف
جاري تحميل الاقتراحات...