رتبها

زي ما وعدتكم حكتب #ثريد عن تجربة نجاحي في امتحان ال #PMP ححاول أجاوب فيهو عن كل تساؤلات الناس عن الإمتحان والتقديم والمتطلبات وكل شي إن شاء الله.. فلكل زول مهتم بال Pmp تابع الثريد دا وساعدونا بال #ريتويت عشان يصل لي أكبر شريحة من الناس ❤️🙏

قصتي مع الموضوع بدت في رمضان وفترة الكورونا.. الواحد كان فاضي والشغل واقف.. ف بالصدفة قابلني إعلان ليpmp preparation course للإستاذ المبدع ناصر المحيميد @PMPTrainer79 فدخلتا الكورس واستفدتا منو إستفادة كبيرة في التحضير وأخدتا شهادة الكورس

بعدها كسلتا من الموضوع شوية مع الشغل لفترة.. وأخذتا قرار بداية شهر ٨ إني أبدا تحضير وختيت target شهرين لي إني أمتحن.. وفعلا بديت دراسة لمدة ساعتين او ٣ ساعات في اليوم.

متطلبات الإمتحان :
* شهادة بكلاريوس.
* خبرة أقلاها ٣ سنين في مجال إدارة المشاريع.
* تكون ماخذ كورس تحضيري للإمتحان وعندك شهادة للكورس.
بعدها حتقدم ال Application في موقع ال pmi وحياخد ٥ أيام مراجعة وبعدها حيردوليك بي قبول أو رفض لي دخول الإمتحان.

بالنسبة لل Application :
بتكتب فيهو كل معلوماتك الشخصية وبطلبو منك شهادة البكالوريوس وشهادة الكورس وجوازك وتكتب زي summary عن خبرتك في مجال إدارة المشاريع
ادخلو على العنوان الفي الصورة في اليوتيوب وحتلقو شرح كامل عن كيف تعمل الأبلكيشن وتقدم للإمتحان.

بعد قدمتا الأبلكيشن وجاك القبول حتدفع رسوم الإمتحان تقريبا 555 دولار.. ومرات بكون في كوبونات تخفيض عاملنها بتخفضليك زي 80 دولار كدا.. فقبل ما تدفع إتأكد لو في كوبون تخفيض عشان تستفيد منو 👍
بعد ما تكمل دفع الرسوم حيفتحليك نافذة بتاعت schedule exam ودي من خلالها حتحجز للإمتحان

وتحدد اليوم والبلد العايز تمتحن فيها.. ممكن تمتحن في سنتر أو تمتحن أونلاين من بيتك.
بالنسبة لينا كسودانين عشان العقوبات الأمريكية المفروضة علينا ما بنقدر نمتحن أونلاين من السودان فما عندك غير واحد من خيارين..

الخيار الأول :
إنك زيي مستقر وموجود في السودان فما عندك حل غير تمتحن في سنتر برا السودان وما بتقدر تمتحن أونلاين.
الخيار الثاني :
إنك سوداني مغترب في دولة برا..فكدا بكون عندك خيار إنو تمتحن في سنتر أو تمتحن أونلاين بي جوازك + id للبلد الإنتا مستقر فيها (رخصة أو إقامة مثلا).

مصادر الدراسة الإعتمدتا عليها شخصيا :
* كتاب PMBOK 📚
* كتاب ال Green book وهو عبارة عن مجموعة من الإمتحانات القديمة📚.
* فيديوهات الشرح للباش مهندس سيد محسن ودي بتلقوها في اليوتيوب + عندو باكيج فيها فيديوهات وإمتحانات موجودة على موقعه الإلكتروني 👇
Pm-tricks.com

Pm-tricks.com

نجي لي تجربتي مع الإمتحان :
وصلتا السنتر قبل الإمتحان بي نص ساعة.. عملولي تفتيش كامل وما خلوني أدخل بي أي حاجه ولا قلم ولا حتى موية..!!
سلموني ورقة وقلم منهم وال calculator قالو موجودة في الجهاز.
دخلتا وبديت الإمتحان.. زمن الإمتحان 4 ساعات.. بعد السؤال ال 90 بدوك راحة 10 دقايق.

ودي مسموح ليك فيها تشرب موية وترتاح شوية.. بعد ال 10 دقايق حتكمل باقي ال 110 سؤال.
خلصتا الامتحان كامل في حوالي ٣ ساعات ونص وبعدها راجعتا شوية في بعض الأسئلة وعملتا submit.
ودي طبعا أصعب لحظة لأنو بعدها بي كم ثانية بتظهرليك النتيجة 😂😂
وظهرتلي نجاح الحمدلله ❤️🙏

بعدها إنتظرتا شوية في المركز وطلعولي ال report بتاع النتيجة وبعد تقريبا ٣ ساعات وصلني ال report + الشهادة في حسابي في الموقع.
ال report + الشهادة 👇