رتبها

• بِسّم الله❤️: عشان نجاوب هالإشكالية إلي عند الكثير حتىٰ أهل التخصص .. خل نفترض افتراض مع بعض و نقول : هل إذا جريمة صارت و كان المشتبه به عنده توأم متطابق، هل الـ DNA بيعلن استسلامه و بنضطر ندور شي بديل و دليل آخر بسبب تطابق حتىٰ الـ DNA بينهم و لا الـ DNA بيظل محتفظ بتفرده!🤔:

- بس قبلها بقول شي .. تقريبًا نصكم بعدد يوصل ٤٧٠ تقريبُا يحمل فكرة خاطئة تمامًا🤐🤯 و لٰكن يسعدني جدًا إني أعدلها🤝🧬!

• عشان نبدي نجاوب بشكل مرتب📄، خل نرد ورا منذ بداية تكوين الإنسان و نقول أول📽: شنو الفرق بين التوأم المتطابق 👦🏻👦🏻 و الغير متطابق 👦🏻🧒🏻 أصلاً؟ يعني شمعنىٰ اللوية و النقاش عالمتطابق فقط و ليس الغير متطابق ..

- أول شي نقول نقول شنو الغير متطابق؟ أهما التوأم إلي كان أصلهم [ بويضتين ] و كل بويضة استقبلت [ حيوان منوي ] مختلف لكل وحدة فيهم حلو؟ فشنو الحين؟ كل بويضة تحمل معلومات وراثية خاصة فيه غير✅عن اختها البويضة الثانية و نفس الشي بالنسبة حق الحيوان المنوي معلومات تختلف عن الآخر ..

- النتيجة؟ إن التوأم الغير متطابق = كل واحد أصله من بويضة و حيوان منوي مختلف عن الثاني بمعلومات وراثية مختلفة = راح يعطينا بالنهاية أكيد DNA مختلف لكل فرد فيهم🧬🔍.. هٰذا الي يخليهم ما يبين إنهم توائم أصلاً👭

- تخيلوا المعلومات الوراثية كتاب كل طبعة بتكون مصدرها كاتب واحد✍🏻 و لٰكن ممكن يتغير المحتوىٰ و يصير موضوع آخر 📑📚📕.. نفس الشي البويضة أصلها واحد:الأم و لٰكن كل بويضة راح تاخذ نسخة و طبعة مختلفة من الأحرف ACGT نفس الشي الحيوان المنوي من الأب مصدر واحد و لٰكن:بنسختين مختلفتين🧬!

الحين التوأم المتطابق الي مسبب أزمة🤦🏻‍♀️في سؤالنا الأساسي⁉️.. خل نبدي أول نقول شلون تكوَن و شنو بداياته إلي سببت هٰذا التعقيد .. هني الموضوع غير كان أصل التوأم : بويضة وحدة + حيوان منوي واحد [ و لٰكن ] عقب قررت الخلية المخصبة تنقسم لي ثنتين ! يعني هني شنو مفروض إيي في بالكم؟📄

• يعني هالمرة دام المصدر فقط شي واحد .. يعني المعلومات الوراثية إلي بعد الإنقسام بنسأل نفسنا إهيا بالضبط نفس الشي صح؟ لأني انا مجرد إني قسمت الأساس لي شيين لا أكثر ماكو شي أثر عالمعلومات الوراثية بحد ذاتها؟ اثنينهم يحملون نفس النسخة بكل المعلومات الوراثية الي فيها دون اختلاف؟⁉️

• قبل لا أجاوبكم و أكمل توضيح و مقارنة للفرق بين التوأم المتطابق و الغير متطابق‼️

- الإجابة: في "بدايات" الإنقسامات التطابق مع نسبة = ١٠٠٪ وارد و لٰكن؟ فيما بعد تصبح هالنسبة مستحيلة ! لا يمكن أبدًا نقول تطابق [ تام ] أبدًا بتكون غلطة جدًا كبيرة بحق الـ DNA .. الـ DNA ما يقبل التشابه التام إهوا چذي جزيء الله خلقه يسعىٰ لأن يتميز و يتفرد بس السؤال يقول شلون🤯!

• الـ DNA المشترك بعد الإنقسام ما راح يطيق فكرة إن يتطابق مع الفرد الآخر راح يحاول يغير من نفسه " شوي " لدرجة إن يلغي كلمة تطابق بكلمة أكثر دقة = [ يكاد ] يكون الـ DNA بينهم متطابق لاحظوا؟ يكاد يعني تشابه كبير جدًا جدًا جدًا جدًا و لكن الاختلاف البسيط الي بيتكون بيلغي كلمة تطابق

لفيت و درت وايد مو🙄؟ خل أقولكم شلون الكتابين بيصيرون متشابهين جدًا دون تطابق ١٠٠٪ بس أول بقولكم تشبيه: تخيلوا عندكم كتاب لازم تنسخونه📖أكثر من مرة، هل في احتمال إن وحدة من المرات تغلطون بحرف؟انزين النسخ الثاني📠هل ممكن حرف آخر يخص كلمة و صفحة غير يتغير لأن الغلطة أساسًا عشوائية؟

• مفروض بعد التساؤل يخطر في بالكم : أكيد بغلط بدون ما أحس الكتاب صفحاته وايد📚📑و أكيد في حرف باستبدله بحرف بدون ما أحس🖋💬 .. بس السؤال الأهم شلون الـ DNA يسوي نفس هالفعل علىٰ المستوىٰ البيولوجي و ليس تشبيهي حقه بالكتاب و الأخطاء اللغوية؟🧐

• أول شي : الـ DNA = 🧬📖 يحتوي علىٰ تقريبًا 3200000000 حرف ! تخيلوا العدد المهول هذا بجزيء واحد من الـ DNA بس بالخلية الوحدة فقط .. شنو الأشياء الي ممكن تصير و تخلي هالأحرف يتغيرون ؟

• الحين نرد ورا لأن بنينا المعلومات .. شفتوا بداية تكون الجنين و أول انقاسامات حقه؟ بحالة التوأم بيكون عندي بويضتين فكل وحدة بتنقسم انقسامات خاصة فيها صح؟ لازم تعرفون شي إن بكل انقسام الـ DNA يسوي نسخة من نفسه عشان يعطيها الخلية اليديدة و هكذا لي آخر انقسام بحياتنا🧬🤝..

السالفة معظمها سببها الإنقسام بس شنو السبب و شقاعد يصير تحديدًا؟ آنا أقولكم بس أول إذا عندكم فضول🤓شوفوا هالڤيديو🎥الي يمثل شلون يصير عندي نسخة أخرىٰ من الـ DNA عشان النسخة اليديدة تكون من نصيب الخلية اليديدة حزة الإنقسام📽:

• العملية الي طافت تصير بدقة عظيمة و ترتيب يخلينا نقول سبحان الله و لٰكن ! دقتها مو مثالية و ما تصل لدرجة الكمال لدرجة إنها تكون دايمًا و أبدًا صحيحة🤨شنو أقصد؟ يعني لما نبي نركب أحرف نكمل القالب مو كل مرة الجزيئات المساعدة بالعملية تركب الحرف (الصح) !🧩🤹🏻‍♂️

• بالحالة الطبيعية راح ينضاف حرف غلط🧩 و التدقيق اللغوي🔍 تبع الـ DNA راح يعيد تعديل الحرف ما تطوف عليه😎يشبه بهالفعل خاصية موجودة مثل الكيبورد⌨️📱الي عندنا لما يتأكد من الكلمة أو يعدلها بكيفه إذا حس إن شي غلط فيها !

- بس مع الانقسامات و كراف الشغل ممكن شيصير؟ خاصية تعديل الحرف🧩🔠الي تركب و اهوا غلط❌" راح تمشي علىٰ الأفراد الي شغالين بالعملية " = فيأدي حق حرف تركب غلط بدون تصحيح حقه🤨📑، بالحالة الطبيعية دايمًا C مع G أما A مع T .. الخطوة إذا ما تصححت راح تأدي مثلاً حق C مع A و هٰذا خاطىء !

- فشيصير بهالحالة اذا ما تصحح الخطأ و الجنين في بداية انقسامات🤰🏻؟ و كل بويضة انقساماتها بروح🧐.. راح تزيد الانقسامات و تصير هالغلطة بخلاياه و هالغلطة مكانها مميز بصفحة معينة بكتاب التوأم الأول .. أما الثاني ممكن تصير بمكان ثاني تمامًا و فصل مختلف!📑🧬📚📕

فهٰذا الخلل الفني " البيولوجي " = ممكن يتكرر حتىٰ و إن كانت عدد مرات حدوثه مو مهولة مقارنة بعدد الأحرف الكلية بس حدوثها لعشرات المرات كفيل إن نقول لا مو نفس الشي يعني مثلاً كلمة : مطر و فطر مختلفين بحرف بس هالحرف كفيل إن يفرقلي كلمتين فما نستهين حتىٰ بالحرف الواحد !📑

هٰذا بالنسبة حق الإنقسامات في بداية الحياة و شلون تتأثر حتىٰ في بيئة الرحم، ممكن تتراكم أكثر هالأخطاء مع العمر بسبب عوامل بيئية تزيد هالأخطاء و تحفزها .. مثلاً التوأم حياتهم مختلفة فطبيعة العوامل الي يتعرضون لها و ستايل حياتهم راح يأدي بطريقة ما لحدوث تغيرات أكثر بأماكن مختلفة⌨️!

• يمكن إييكم سؤال هل كل التغيرات الي قاعد تصير الأحرف الي ما تصلحت يعني يحملون طفرة ضارة؟ راح أقولكم لا مو شرط كلش و للعلم احنا هالشي هم يصير لنا مو بس اهما، السبب؟ الـ DNA كتاب ينقسم فصلين : فصل بعنوان Coding region = مناطق مشفرة و فصل بعنوان non-coding region =مناطق غير مشفرة

شنو يعني؟ الفصل المشفر📑🔠📖 = اهوا الفصل الي فيه محتوىٰ له معنىٰ📘🔍كلماته لها ترجمة فعلية و هالجمل تتحول لي بروتين💙فيما بعد بينما الفصل الغير مشفر تخيلوه چذي: نثنبنبرنقنقتقتثربمبممبمب فصل ماله معنىٰ و لا له ترجمة بيولوجية شنو نفهم من هالفرق؟

- يعني الغلطة إذا صارت بمنطقة مشفرة في احتمال إنها تكون ضارة أكثر لأن ممكن تأثر عالبروتين الي بيتكون و للعلم هم مو شرط إن الطفرة يكون لها تأثير إذا بهالمنطقة ساعات تصير بدون تأثير ضار لها .. المهم و إذا الغلطة صارت بمنطقة غير مشفرة؟ مافي تأثير مجرد حرف تغير 🔠🧩

• معلومة لكم أكثر : ترىٰ تقريبًا ٩٨-٩٩٪ من الـ DNA مناطق مالها ترجمة لي بروتين🤫🤭فقط الجزء الشغال يمثل ١-٢٪ .. شي عظيم مو؟ إن النسبة الشغالة طفيفة جدًا أما المناطق الأكثر بالنسبة📈🔼عبارة صحراء قاحلة !💡

• المهم نرد الحين النتيجة = توأم أصلهم بويضة وحدة انقسمت مع أخطاء جينية و عوامل بيئية راح تأدي = DNA يحتوي علىٰ حروف متغيرة في مناطق عشوائية ما راح تكون نفسها إلي بالفرد الآخر = النتيجة = استحالة حدوث تطابق !❌🔍😎

- انزين بالأدلة الجنائية🔍.. إذا طلع المشتبه به عند أخو توأم أقدر أحل هالموضوع و أطلع هالأخطاء الي تفرق بينهم بين ملايين الملايين من الأحرف؟📄⛓

• أول شي لازم تعرفون إن التست المعتاد المتمثل بالـ STR🧬💕= ما راح يقدر يفرق لنا بينهم❌ لأن مو تست معتمد علىٰ كل الأحرف مالت الـ DNA إنما فقط مناطق محددة بخصائص معينة🔍 و هذا راح يخلي الطريقة غير كافية للفصل تفاصيله أكثر بالثريد إذا ودكم تفهمونه .. فـ؟ لازم ندور بديل شالحل؟🤔

• راح نستخدم طريقة أشوف فيها كل حروف الكتاب🧬📖✅ الي نقول عنها Next generation sequencing او اختصارًا لها NGS يندرج تحتها عدة طرق منها نقدر نسوي مسح كامل عالـ DNA و نصيد التغيرات البسيطة الي في كل فرد و منه نقدر نفرق التوائم😏🔍!

فإذا أحد قالكم لازم ندور دليل ثاني و الـ DNA بيكون ماله قيمة لأن متطابق و نحتاج شي بديل يعوض النقص قولوا لهم : لا الـ DNA يظل دايمًا و أبدًا متفرد ما يقبل بالبديل في حال وجوده😏! -القيمة المستفادة :
• تطابق تام ❌
• تشابه كبير جدًا " يكاد " يكون أقرب للتطابق✅

• الرفرنس الي يأكد الكلام شخصيًا: الصورة اليمين تمثل جوابي لسؤال قبل سنة إذا متطابقين و لا لا يه التأكيد من شخص يشتغل بمختبرات الأدلة الجنائية/ أما اليسار كانت الإجابة البيرفكت المختصرة حق سؤالي حقكم أمس إذا متطابقين أو لا هم من شخص هم يشتغل بالأدلة الجنائية ..
🇸🇦🇰🇼👨🏻‍🔬🧬:

• References📄:
- fsigenetics.com…
- ncbi.nlm.nih.gov…
- genetics.thetech.org
- ncbi.nlm.nih.gov
- medlineplus.gov…

fsigenetics.com/article/S1872-

medlineplus.gov/genetics/under

ncbi.nlm.nih.gov/books/NBK21134/

The Human Genome

When you have read Chapter 1, you should be able to:

ncbi.nlm.nih.gov/pmc/articles/P

genetics.thetech.org/ask/ask68

- و هٰكذا عالجنا مشكلة فكرة التطابق التام ١٠٠٪ و فهمتكم خللها و بدلناها بكلمة أصح " تشابه كبير " + ردينا حق الـ DNA هيبته كدليل بالأدلة الجنائية و شلنا فكرة إن راح نحتاج بديل .. خصوصًا لما نتكلم عن جريمة ما كان فيها غير أثر DNA يعني شلون نتخلىٰ عن الـ DNA ? طبعًا لا😌🔍🖤