عاوزة اقولكم نصيحة حبوا ولادكم وعبروا عن حبكم ليهم بالفعل والقول احضنوهم وقدروا واحترموا اهتمامتهم التافهة لانها كل حاجة بالنسبة ليهم وساووا بين البنات والصبيان بلاش التفرقة وللذكر حظ الانثيين والقرف ده وعلموهم انهم متساويين في الحقوق والواجبات اكسبوا ثواب فيهم وف ولادهم
احنا ٣بنات ورا بعض وولد ديك البرابر آخر العنقود وبالرغم من مستوى أمي وأبويا التعليمي والمادي كان مرتفع بابا دكتورجامعة وماما مدرسة وحاصلة عل ماچستير تاريخ الا انهم فرقوا بينا ف التربية ف كل حاجة والولد طلع هارون الرشيد وحقيقي أنا بأسف علي اللي وصله ف حياته بسبب التربية دي
المهم أمي وأبويا كانوا ف منتهي العنف معانا ومابينهما لمستوى لا أتمنى حتي إن افتكره وكانوا ضد الإختلاط وكمية كلاكيع وتزمت وقرف وتفرقة مابين الولد والبنات وبين البنات وبعضهم بسبب الحجاب وصدقوني انا مش لاقية وصف للعلاقة بينا النهاردة احنا ال٦ ازاي غير انها شبه رمي الجمرات بس عل بعض
ولحد النهاردة ابويا ٨٢ وامي ٧٣بعد ماشربوا وطفحوا الخل من أخويا ييجوا ف أي موقف او خلاف مابينا وتيجي سيرة حبظلم افندي حامل اللقب وإسم العيلة ديك البرابر ياخدوا صفه وصف الظلم عل طول الخط وأخوكم ده الحيلة والنيلة والزفتة والطينة بابقا عاوزه اولع في الكوكب وفيهم ..ماتعملوش كده ارجوكم
كمية العنف والترهيب الل أختي الكبيرة بتعمله مع بناتها ده كان سبب رئيسي ان أنا وأختي الأصغر بقينا أعداءها وقطعتنا وماشتوفتش بناتها١٠سنين غير يوم دفن بباهم بقوا اطول مني حبايبي ودخلوا الجامعة وماعرفش عنهم حاجة تاني من ساعتها من سنتين وزيادة عشان هي مجنونة لان ابوها وأمها مجانين🤷🏽♀️
أختي الأصغر مني بسنة ماكناش من كمية العنف الل في التعامل مابيننا مابنطيقش بعض ويادوب يادوب لسه باديين من أقل من سنة انا ٤٣ وهي ٤٢ نحط قواعد للتعامل باحترام مع بعض وممكن احياناً مانقفلش السكة في وش بعض وده حقيقي وبدون هزار يمكن يكون من أهم الachievements ف حياتي مؤخراً
ياجدعان انا مش قادرة اوصفلكم أثر الجفاء والعنف الأسري والتصحر العاطفي اللي الاطفال ببتربى فيه ده بيطلعهم زومبيز والله مهما اتصرف عليها ومهما كان تعليمها غالي احنا ال٤ تلاتة مننا مهندسين وأنا الفاشلة business administration والكلية الرخيصة الل فينا كانت فنون تطبيقية
ومثلاً أنا بأخاف علي بناتي من الإرث المريض بتاع اهلي ومش مخالياهم يعرفوا ولايشوفوا جدتهم ولاخالهم لان هم مصممين عل الطريقة الزفت الل طول عمرنا فيها ومش بيحترموا حدودي ولا اختياراتي ولا لبسي ولاشكلي ومش بيتلموا ولا بيراعوا ده قدام البنات وانا مش عاوزة بناتي يعرفوا ويشوفوا القرف ده
ونفسي كل جوز بنيآدمين قرروا يخلفوا ياريت يتقوا الله وهم بيربوا عشان عيالهم وحوش بشرية تنهش ف نفسها وغيرها وتطلعلنا الشخصيات الخرائية الل مطفحانا الدم ف حياتنا فين مانروح احترموا نفسكم واحترموا ولادكم واحترموا اختلاف الزمن والتجربة والشخصيةمابينكم مش لازم يطلعوا كربونة منكم
مش قادرة أقولكم قد إيه أنا باكره نفسي لما المحني باستخدم كلمة من كلام أمي ولا باحب حاجة ولا حتي لون هي كانت بتحبه وباتمنى الموت لما ابص ف المراية أشوف لمحة من ملامحها ف وشي ونفسي بناتي لما يكبروا مايحسوش بالزفت والألم ده ونفسي يترحموا عليا واوحشهم ويفتكروني بالطيب لما أموت
وأحب أقولكم إن من كتر مانا مش مدخلة أمي ف حياتي كمية العداء الل كانت ومازالت بينا حتي ف فرحي جت بالعافية عل آخر لحظة ماتعرفش عنوان بيتي نمرتها مجرد ماتظهر عل موبايل باتعصب صوتها رصاص ف ودني ومش قادرة أتخطى لحد النهاردة الل حصل زمان وأنا معدية ال٤٠
ياجدعان انا لحد ماخلصت الجامعة صحابي كانوا فاكريني يتيمة وأمي ميته من كتر ماباجبيش سيرتها🙄 ولا بيجولي البيت ولا بيشوفوها ولا الهوا اقولكم ايه والله 🙄ياجدعان ماتطفحوش عيالكم القرف في الصغر عشان هايطلعوه عل جتتكم اجوازاً وافراداً في الكبر محدش هايفضل يستسلم للزفت بتاعكم طول عمره
أحب أقولكم أنا مش ناسية أي كلمة ولا فعل ولاحرف اتقالي وحش منهم ومش عارفة اسامح الاتنين لحد النهاردة وباتفادى التعامل معاهم علي قد ما اقدر ومش مسامحة الاتنين ومشفقة عل موقفهم قدام ربنا من اللي عملوه
جيل أمهاتنا ده من أبأس الأجيال في معظمه والله
والله عيالكم اللي بتكتموهم وبتقرفوهم بجنانكم وامراضكم النفسية هايكبروا وهايتفوا ف وشكم ومش هايحضروا دفنتكم ولا هايترحموا عليكم عادي عشان "كما ربياني صغيراً" هاتلف وتضرب ف وشكم وبدون ذرة احساس بالذنب منهم عادي عشان انتو بتجنوا زرع ايديكم بالهنا والشفا إطفحوا وإنتو ساكتين 🤷🏽♀️
علي فكرة انا اتربيت ف ڤيلا وأهلي أكتر ميسورين وكان بدل الفليبينية اتنين ف البيت+السيريلانكية وسواق و٤عربيات واحنا أطفال ونوادي ومدارس أمريكية وجامعات خاصة وجينا مصر عل الجامعة بس التفرقة كانت ف المعاملة والمصروف والاحترام وكل التفاصيل وطلعنا بالمنظر ده اتقوا بقا الله ف ولادكم
جاري تحميل الاقتراحات...