تم التعاقد مع بوجبا بـ120 مليون من يوفنتوس، فلازم يتباع بسعر مقارب للسعر ده، كل الكلام ده مفهوم، لكن مش هيكون عندي أزمة كبيرة لو خرج لريال مدريد مجانًا، لأن هي دي قيمته، إنه يكون ببلاش.
ثريد..
ثريد..
دي خيا في عِز ما كان عايز يمشي لريال مدريد وحصل موقف الفاكس بتاع فان جال اللي منعه من الخروج وإستمر مع مانشستر يونايتد، اللاعب إحترم ناديه وجماهير فريقه، في ظل ما ريال مدريد توج بعد الموقف ده بـ3 دوري أبطال بحارس أقل منه،
وحتى لم يحاول الخروج بعدها أو يقول كلام حلو عن مدريد، كان كل مرة يتسأل عن الموضوع ده يقول أنا سعيد في مانشستر يونايتد، رغم إنه كان معاه سمولينج وجونز ودارميان وبليند أمامه، والفريق بيمر بأسوء فتراته لحد دلوقتي.
أوباميانج في عِز ما إحتمالات خروجه من أرسنال كانت أقرب من إحتمالات بقاءه، وفي الوقت اللي فرق زي ريال مدريد وبرشلونة وغيرهم كانوا بيفاوضوه حتى لو مش بشكل جاد،
اللاعب إحترم النادي اللي هو فيه وجماهيره ومحاولش يقول "أتمنى اللعب لريال مدريد أو برشلونة"، رغم إنه مهما كان بيحب أرسنال يظل لاعب موظف. هي دي المواقف اللي بيتقال عليها "الإحترافية".
بعد المواقف دي وغيرها كتير، بتيجي تشوف بوجبا بيعمل ايه وبيقول ايه، بتفهم ليه مورينيو -رغم كرهي له- وصفه بـ"الفيرس"، لاعب لا يملك 2 جنيه إحترافية ولا نضوج ولا شخصية حتى في ظل ما هو بطل عالم مع فرنسا.
النقطة التانية، جملة "بوجبا علق لكن إمكانياته مميزة" اللي بتتقال بعد كل فشل لبوجبا كأنها سلاح سحري دي جملة لا تمت للواقع بصلة، بوجبا إمكانياته جيدة لكن فيه لاعب ممتاز مش بيعرف يحتفظ بالكورة 5 ثواني على بعض؟ حتى لو قرر يمرر بسرعة، فيه لاعب ممتاز بيمرر تمريرة صح كل 10 تمريرات مثلا؟
دي شامب عرف يخرَّج نسخة من بوجبا قريبة من نسخة يوفنتوس، لأنه كان بيفتقر للاعب الفردي والمهاري، بالتالي لعب معاه بماتويدي ماتور الجري، وبكانتي اللاعب السريع في تغطية المساحات أمام الخصوم، دي بيئة ساعدت بوجبا إنه يمرر طوليات للجناح ويتحط في وضع 1 ضد 1، لكن غير كده؟ هو حرفيًا عادي.
حتى مع يوفنتوس، بوجبا كان بيلعب معاه فيدال وبيرلو وماركيزيو، بالتالي كان مخدوم، في موسم 2015 لما حصلت إصابات كتير لبيرلو وفيدال كان ماركيزيو هو الرجل الأول لفريقه وبوجبا إختفى،
ماركيزيو الإرتكاز وفي ظل وجود بوجبا كان أكتر لاعب صنع أهداف الموسم ده (6 أهداف)، والأعلى في صناعة الفرص في فريقه (49 فرصة)، وفي عدد التمريرات الإجمالية (2065)،
أما في إفساد وتعطيل الهجمات للخصوم خلال الموسم، فكان ماركيزيو هو الأعلى (70 هجمة)، 47 لفيدال، 29 لبيرلو، وبوجبا في المرتبة الأخيرة برصيد 12 هجمة فقط.
في الوقت اللي دي بروين صانع اللعب في 2017 كان أكتر لاعب قطع كرات على دائرة الوسط في البريميرليج مناصفة مع كانتي، بوجبا كان مش من أول 10 لاعبين قطعًا كرات، أقولك الكبيرة؟ ولا أول 20 لاعب كمان.
حتى في الجزء المهاري اللي هي ميزته الأكبر، حسب Utd Arena، بوجبا منذ إنضمامه لليونايتد مش من أول 5 لاعبين في الدوري في كلًا من.. "دقة التمريرات، صناعة لعب مفتوح، مراوغة المدافعين ولاعبي الوسط، دقة التسديد، معدلات الجري بالكورة، وطبعًا الأهداف والأسيستات، وغير كل ده كتير كمان".
بوجبا أكتر لاعب فقد كورة في البريميرليج من ساعة ما تم التعاقد معاه مناصفة مع جونجو شيلفي متوسط ميدان ونيوكاسل يونايتد. و ده لأنه أكتر لاعب سبب بُطئ للهجمة وسرعتها، بالتالي معظم التحولات الهجومية كان بيخسرها دائمًا اليونايتد في وجوده لأن الخصم بيعرف يتمركز وينتشر بسرعة.
بوجبا لاعب منفوخ، بكل إختصار.
جاري تحميل الاقتراحات...