رتبها

ذكاء يورجن كلوب قصاد أرسنال ماكنش بس في كيفية تطبيقه للضغط العالي، بل كان كمان في كيفية خروجه بالكوره تحت ضغط أرسنال وده اللي هنتكلم عليه في الثريد ده..

كلوب كان عارف أن أرسنال بيلعبوا بـ٥٤١ في الحاله الدفاعيه، وبيكون عندهم لاعبين اتنين في محور ارتكاز بيقابلوا لاعيبة وسط الخصم وثلاثي هجومي بيضغط على المدافعين..

ومن هنا كلوب قرر أن في حالة البناء يتواجد فابينو وفينالدوم على خط واحد على مقربه من قلبين الدفاع قدام النيني وتشاكا محاور أرسنال وفي نفس الوقت يكونوا كيتا وفيرمينو موجودين في ضهر تشاكا والنيني..

وجود فابينو وفينالدوم على نفس الخط كان بيسحب النيني وتشاكا للضغط عليهم من فوق وبالتالي تظهر مساحه في ضهرهم بين الخطوط لـ كيتا وفيرمينو..

أرتيتا حاول أنه يتغلب على مشكلة وجود لاعيبه من ليفربول بين الخطوط فـ قرر أنه يدّخل مايتلاند نايلز الوينج باك الشمال في إتجاه قلب الملعب علشان يقابل كيتا بين الخطوط ويغطي ضهر تشاكا..

وده خلا أرنولد عنده وقت ع الكوره في التلت الأول، لأن مايتلاند نايلز اللي كان مفروض يطلع ويضغط عليه أصبح منشغل أكتر برقابة كيتا بين الخطوط، وبالتالي أرنولد أصبح عنده وقت ومساحه على الكوره..

وفي نفس الوقت كلوب طلب من صلاح أنه يتمركز دايماً بالقرب من خط التماس عشان يوسع الملعب قدر الإمكان ويسحب معاه تيرني قلب دفاع أرسنال الشمال..

وبعد سحب صلاح لـ تيرني يتحرك كيتا في المساحه اللي في ضهر تيرني، وبالتالي هيضطر دافيد لويز أنه يغطي ضهر تيرني ويروح مع كيتا ومن هنا هتظهر مساحه في عمق دفاع أرسنال لـ دافيد لويز وهي دي المساحه اللي هيتحرك فيها فيرمينو..

الجول الاول جه من التحركات دي، فـ كانت تمريره قطريه مباشره من أرنولد في المساحه اللي في ضهر دافيد لويز وفيرمينو بيوصل للكوره وبعد كده بيلعبها لصلاح قبل مايسجل مانيه الجول الأول..

ليفربول كان مميز كمان في تطبيق الضغط العالي في مناطق أرسنال عن ماكان عليه في ماتش الدرع الخيري، إللي كان بيعتمد فيه ليفربول على ضغط الثلاثي الهجومي فقط على قلبي دفاع أرسنال اللي كانوا بتتم مساندتهم من قِبَل محوري الارتكاز

وهنا كان بيحقق أرسنال تفوق عددي بـ حالة ٤/٣ وكان بيقدر يخرج بالكوره لأن فيرمينو ماكنش بيقدر يقفل زوايا التمرير على محوري الارتكاز..

في ماتش إمبارح كلوب قرر أنه يزق واحد من لاعيبة الوسط خطوات لفوق جنب فيرمينو عشان يقفل معاه زوايا التمرير لمحاور وسط أرسنال، وبالتالي يضغط على أرسنال من فوق بـ أربع لاعيبه وتتحقق حالة ٤/٤ ويتغلب على التفوق العددي لأرسنال..

وكان هو ده شكل ليفربول اثناء الضغط اللي كان بيتحول تقريباً لـ٤٢٤

واستكمالاً لضمان نجاح عملية الضغط كان دايماً فينالدوم بيرجع خطوات لورا ويقف على نفس خط فابينو عشان يقفلوا زوايا التمرير على أوباميانج وويليان بين الخطوط، وفي نفس الوقت يوفروا حمايه لـ أرنولد وروبيرتسون في ظل ضغطهم على الوينج باكس بتوع أرسنال..

لأن فابينو وفينالدوم كانوا بيقوموا بتحركات عرضيه ذكيه جداً علشان يحموا ضهر أرنولد وروبيرتسون..
وفي نفس الوقت كان دفاع ليفربول بيحقق حالة ٢/١ من قلبي الدفاع على لاكازيت مهاجم أرسنال الوحيد..