من بعد ١٢ سنة علم بالجامعة ومن بعد كل الشهادات يللي أخدتها...
قررت السنة الماضية إبقى بلبنان. قلت منطقتي بحاجة إلي و أهلي بحاجة إلي. كل الناس يللي بحبها كانوا هون. قلت ما بيهمني المصاري. بدي بس عيش مبسوط وبكرامة.

بلشت مصايب البلد وبلشوا الناس يللي بحبها يفلوا. صار الطبيب يللي بعده مبلش مسيرته بيقبض ٤٠٠$ بالشهر...هيدا إذا كان شاطر...المستشفيات يللي كنت إشتغل فيها اتدمرت بالإنفجار. خسرت كثير ناس بحبها. رفقاتي كلهن بلشوا دواء للأعصاب. كل المطارح يللي بحبها اتدمرت. بيتي اتدمر. فقدت الأمل.

الماما يللي بتتمنى كانت إنه عيش قريب منها صارت مش مصدقة فل. فالل يا ماما. رايح على بلد في أمان وسلام. بلد رح يقدملي شي أهم من المصاري. بلد رح يرجع يحسسني إني إنسان وإنه كل هالتعب يللي تعبته بحياتي إله قيمة.

في كثير ناس بحبها تاركها هون. أهلي وإختي وأولاد إختي وناس كثير بحبها. فالل وعم صلي إنه يصرلن فرصة مثلي ويفلوا.
كرهت بلدي. عم إمشي بالطرقات وعم اتمنى ما ارجع. هيدي مش بلد. هيدي مقبرة. مقبرة الأحلام. مقبرة الأمان. مقبرة الطموح. مقبرة شعبها بأغلبيته بلا مخ.

شعب طائفي غبي. شعب مستعد يندعس بالصرماية كرمال زعيم بيسوى صرماية. خليكن مدعوسين. مبروك إلكن المقبرة ومبروك إلي الحياة الجديدة.