بدايه الحكاية كنت طفلة بعُمر الـ 11 بيوم من الأيام في سنه ٢٠١٥حسّيت بألم في صدري و رحت المستشفى توقعت أنه تعب زي أي تعب يمُر عالشخص و بعلاج يروح و اللي حصل لمّا وصلت طلبوا منّي إشاعه على الجهاز التنفسي ما أنسى يومها لمّا الدكتور قال لي "وقفي زين سويت الإشاعة لك ثلاث مرات و لسى..
عمودك الفقري مايل!"طبعًا بعد ما عدت الإشاعه أكثر من مره و بعد ما كتمت نفسي بكل مره على أمل ان يكون السبب إني تنفست و المفروض أكتم نفسي إلا أن فعلًا كان عندي ميلان بالعمود الفقري بنسبه ٤٠٪ تقريبًا و هنا بدت معاناتي تحولت لـ مستشفى جلست مواعيد كل بين موعد والثاني شهور كميّه إهمال..
مو طبيعيه و بكل موعد ما اطلع بنتيجه غير إني أسوي إشاعات مقطعيه و مواعيد زياده و كان هذا أكبر غلطه بحياتي إلى آخر موعد اعترف الدكتور أن حالتي كبيره على مستشفاهم و تحولت إلى مدينه الملك فهد الطبيه بالرياض هنا كانت بسنه ٢٠١٩ إيوا نعم كل هالمده كنت عندهم بدون فايده بديت بأول موعد عند
د.معاذ الغدّير أفضل جرّاح عمود فقري،اول يوم دخلت عنده قال لي" انتي نسبه ميلان العمود الفقري عندك ٩٣٪ "وهذي اول صدمه لي لأن العمود الفقري كان يزيد بالميلان و ما كنت عارفه و بعدها قال "حالتك تحتاج تدخل جراحي ما ينفع إلا عمليه" وهنا كانت الصدمه الثانيه ما توقعت بيجي اليوم اللي اسوي
فيه عمليه و بعمودي الفقري بعد! اهلي قالوا بنرجع بعد٣شهور و الدكتور كان يقول لا تطولون عليها هنا لمّا شفت النقاش بينهم حسمت الأمر و قلت"شهر و ارجع اقولك"وقتها كنت حاطه ببالي اوافق لأن هذا القرار المنطقي لان اساسًا العمود ما يوقف ميلان و قاعد يضغط على الجهاز التنفسي ويوم بعد يوم
راح يجي يوم ما راح اقدر اتنفس و اتوفى لا قدر الله ،كنت فخوره بنفسي اني تجرأت اقرر بهالسرعه ما أنسى كيف كنت أهوّن على اللي حولي و اقولهم اني بصير بخير و بتنجح العمليه و انا الشخص اللي كان يحتاج هالكلام بس ما كان فيه احد يساعد كنت شايله هم العمليه و خايفه و متوتره و بنفس الوقت اقول
بتعدّي على خير ، أنا فعلًا تعبت بس قدرت أتمالك نفسي و أكمل، بعد مواعيد و محاولات حجز سرير كنت محظوظه و حصلت سرير لعمليتي في٥/١/١٤٤١، ما انسى كان اول يوم دوام يوم الاحد ، وكنت انتظار عمليتي مو مأكده كان فيه طفل حالته حرجه بس مو محصلين له سرير وكنت ادعي له من كل قلبي ان ربي ييسر له
امره كنت صايمه من يوم السبت الساعه ١٢ الليل و بالصباح لبست لبس العمليات و تجهزت و قبل موعد العمليه بربع ساعه حصلوا للطفل سرير كان شيء يلعب بالنفسيه متخيلين كنت متجهزه بعدين فجأه تأجلت عمليتي اسبوع و كنت من جهه ثاني فرحانه للطفل و تأكدت منهم على سلامته قبل ما اطلع، يوم السبت من
الاسبوع الثاني جيت قبل موعد عمليتي بيوم تنومت و صمت اذكر وقتها جاني تبلد مو طبيعي كنت اقول ابغاء اخلص مسلسلي عشان لو صار شيء اكون اعرف النهايه 😭 بس لا تلوموني ماعرفت شسوي جاني تبلد الساعه ٧الصباح دخلت لغرفه العمليات وكان اول مره اشوفها بالمرر كنت اشوف دكتور مع التيم حقه يتناقشون
و سراير تتحرك نيرسز كان كأنه فيلم، دخلت غرفه التخدير كان شايب لطيف الدكتور وقتها كنت اقول بقلبي انتي ليه ما تبكين خلاص ابكي بيخدرونك ابكي وطلعي اللي بقلبك انتي ما تدرين بتعيشين او لا وجلست ابكي بالوقت اللي الدكتور يخدرني فيه ، نمت بين دموعي، وصحيت في غرفه الإفاقه كانت عمليه ناجحه
الحمدلله تعدل عمودي الفقري بنسبه كبيره جدًا حتى الدكتور ما توقعت تنجح لهالدرجه جلست أسبوع علاج طبيعي و مشي لين قدرت اعتمد على نفسي شوي و اتحرك طلعت و بديت في رحله الحميّه ٦ شهور "ممنوعه من الرياضه،جلسه الارض،حمل الثقيل،و اشياء كثير"وقتها كنت امر في تعب نفسي و جسدي و ضغوطات دراسية
بعد ما اخذت إجازه ٥ أسابيع من الدوام فعليًا ما اقدر اوصف لكم حجم التعب اللي مريت فيه كنت خايفه من الحميّه اللي بمر فيها بعد العمليه اكثر من العمليه نفسها بس قدرت اتخطى الضغوطات الدراسيه مع صحباتي كانوا يساعدوني في واجباتي مشاريعي يشرحون لي ألخ.. فعلًا وقتها عرفت اني اخترت الاشخاص
الصح و بالبيت كانوا اهلي مو مقصرين معاي لمّا خلصت الست شهور ما كنت متأمله مره انّي تشافيت و فعلًا الدكتور زادني حميّه ٦أشهر ثانيه ، و كنت اقول يلا ماعليه انا تحملت ٦شهور قبلها و بقدر اتخطاها بديت اتعود على وضعي بما اني كملت سنه و تقبلته لين قرب موعدي اللي كان قبل شهر إذا انتهيت
من فتره العلاج او لسى بكمل ٦ ثانيه بعد، وقتها انا تعبت نفسيًا كنت مو قادره يا اتعافى او اتعافى ما كنت مستعده لأي خيار ثاني كنت ابكي و ادعي و اللي حولي قاعدين يهون علي كنت اقول انا بخير انا احس اني بخير خلاص مو مستعده اكمل زياده حرفيًا دخلت في اكتئاب إلا شوي رحت موعدي شاف الدكتور
إشاعتي قال"إنتي متأكده كملتي سنه؟"قلت "إي كملت سنه و احس إني بخير خلاص"و انا خانقتني العبره كنت انتظره يقول كملي زياده عشان انهار عنده بس الحمدلله و أخيرًا بعد حميه ١٢شهر وتعب وهم وضغوطات قال "تقدرين ترجعين تكملين حياتك طبيعي " ما تتخيلون وش كثر السعاده اللي كانت بقلبي من هالجمله
البسيطه ما تتخيلون وش كثر كنت محتاجه هالكلام و كأنه يبشرني بالجنه فرحت فرحت فرحت و بكيت و ضحكت مشاعري اختلطت ما كنت عارفه وش اسوي وقتها و الحين قاعده اكتب لكم و انا جالسه بالارض اللي كنت محرومه منها لسنه وقاعده اسوي كل شيء ابغاه كشخص طبيعي يعيش حياته اللي انحرم منها.
أخيرًا وليس آخيرًا لا يأس مع الحياه مهما حسيتي ان الدنيا ضاقت بك صدقيني بيجي يوم و تفرج انا قررت اسوي عمليتي و لو ما تشجعت و حددت مصيري ما كنت الآن متعافيه❤️❤️الحياه صعبه بس راح نتخطاها مع الأشخاص اللي نحب ، بتجي فترات تكرهون نفسكم و تتعبون بس مجرد ما تحطين ببالك انها فتره وتعدي
بتهون كل شيء بيهون ، لا تخافون من العمليات الطب تطور أنا لآخر يوم قبل عمليتي كانوا يقولون لي "لا تسوينها انتي تدورين الموت؟" كان فيه ناس كلامهم سم بس سمعت لهم؟ لا طبعًا سويت الصح و الحين يقولون فخورين فيك بس بعد ايش ؟
و لا تحبطون اللي حولكم ترى كل شخص فيه اللي مكفيه انتم ما تدرون عن الصراعات اللي دخل فيها عشان يقرر مصيره ترى مو شيء سهل خليكم إيجابيين و هونوا عليهم و خلصت الحكايه الطويله أعتذر على التأخير ❤️
— انا مره مبسوطه بكلامكم قريت كل حرف ما تتخيلون الفرحه اللي بقلبي وقع كلامكم على قلبي غير،مره شكرًا و آسفه لـ اللي ما رديت عليهم او ما انتبهت لهم مره آسفه قاعده احاول قد ما اقدر اغرقكم كلام لطيف مثل لطافتكم معاي): و يارب اني غيرت نظرتكم للحياه للأفضل و ساعدتكم و مره احبكم ❤️❤️❤️.
ولو انه ما يهون علي بس بكتفي باللايك و مره شكرًا ):
جاري تحميل الاقتراحات...