رتبها

طييييب نبدأ الثريد المرتقب ؟؟
تحول" بيت الرعب "إلى" أرض الأحلام ".
هذي اللافته كانت معلقه لأكثر من ٥~٦ سنوات ..
ايش السالفة ؟ وين معلقتها ؟ و ليه معلقتها ؟ وليه ما شلتها ؟
كملوا الثريد الممتع و بتعرفون .

طيب ، نبدأ في المكان :
الحمام .
حمام جانحنا انا وحصه كان شبه مهجور حرفياً وأي شخص يدخله أعطيه نظرة ( سكر الباب لا أفقّع وجهك الحين ) ..
بسبب الحشرات بنية اللون المتدهنة( بزيت الخروع ؟ )
الوكاد انه مستحيل اشوف الباب مفتوح الا والليلة اللي انفتح به الباب احس بوسوسة انه فيه

صرصور هرب من مستعمرته بحثاً عن سريري .
الحمد لله ما قد صارت ولكن الوساوس موجودة ..
وبحكم الدراسة وابتعادي عن الحمام ما قد فكرت اسوي فيه شيء ابداً اصلاً فكّه ..
للأمانه حاولت مرات كثيره اتخلص منهن لكن ما ودي اعترف انهن اقوى من محاولاتي 😔💔..ف تجاهلت الحمام وصار مكان مهجور.

بعد الحجر ، اشتريت غسالة الأحلام و المكان الأنسب له كان حمامنا ، الحمام المهجور صار لابد من استخدامه وصرت ادخل خلسة احط الملابس ، وأدخل خلسة اطلع الملابس .. ومع الاستخدام المتكرر للغسالة والنشافه توقعنا انه لا مزيد من الأعداء لأن ما يقدرون يتنفسون من الصابون والحرارة .. ولكن ...

الأمر المرير انهم تمادوا وصاروا يطلعون من أي مكان في الوجود وكل السبل الطبيعية فشلت ..
طبعاً يأس و حزن شديد ..
بؤرة الصراصير كانت المرحاض العربي ، وكنا حاطين الغسالة فوقها للتصريف وعلى اساس تقتلهم ( مدرّعه على غفله ) ..
ما فلح شيء معهن كما هو واضح :( ..

المهم نتجاهل فقرة الصراصير ، الحمام بحد ذاته مع معالم الهجر صار كأنه حمام محطه .. وأصلاً هو قديم شوي ، والأشياء بدت تخرب لذات السبب .. السخانة ، المرحاض ، كل شيء تقريباً مصدي وهو بالأصل قديم ..
المهم، الحمام عبارة عن كابوس قديم ملازم لي ..
فقلت لأخوي إذا نقدر نغير كذا و كذا ووو

قال لي اخوي ، اذا بنصلح شيء لازم نمسك الأساس نصلحه ..
غير كذا ماله معنى ، كل سنة بيخرب شيء و بنجلس نخرب شغلنا عشان نصلحه .
صراحة انا اعجبتن فكرة ( نبدأ من الصفر ) ..
وكون الحمام مافيه شيء صاحي ، ما حسيت بالندم لتفكيك كل شيء و تغيير الحمام تماماً ،
هذا الشيء عطان شعور لا يوصف!

ومن هنا بديت انا وأخوي نخطط للحمام وكيف نغيره و عصف ذهني ماله اول ولا اخر .
وعشان تكونون بالصورة هذا صورة الحمام اللي كان كاسر خاطري ..
كما هو ملاحظ فيه بودرة صراصير بكل مكان على اساس ما راح يطلعن ، ويطلعن رغم هذا ويموتن برا بس حق اتنكد انه فيه صرصور ..
المشكلة الحجم كبير :(

بعد ما قررنا تغيير الحمام ، صرت ابحث عن الاشياء والأسعار واسأل اخوي و نبحث عن المعلومات المطلوبة ووش نحتاج و اخوي دائماً يطلع بأفكار ما توقعتها ونتحمس ونوصل للإكستريم و نترك الفكرة ونبدأ بثانيه وهكذا لين تشبعنا أفكار ..
وبنفس الوقت رحنا لمحلات المستلزمات الصحية نتفرج عالأشياء.

وناخذ الأسعار والأشكال ونصور الشيء اللي يعجبنا شكله / سعره او كلهم .. ونحتفظ بالمعلومات لين وقت القرار ..
بعد كذا رحت أخذت قياسات الحمام و دخلت على برنامجي المفضل home planner و رسمت فيه التصميم الأولي ..
طبعاً عشان اعرف وش اختار مقاسات او أشكال ...

بعدين رحنا نبحث عن الأغراض وتقريباً صار عندنا توجه لإختيارات معينة .. لكن كنا نبي نختار البلاط اللي مقاسه يناسب أبعاد الحمام .. وللأمانه كان صعب مره اختيار بلاط بهالمواضفات لأن البلاط الموجود حجمه كبير وأبعاده مختلفه ..
فبيوم اخوي اخذن لبيت الإباء وقال " خلاص اليوم راح نشتري "

لأن الوقت ضاع ما بين الهواجيس والتفكير وخلاص انتهينا من فقرة التفكير ..
مع سواليفي مع حصة قبل عن الحمام كانت تبي الجدران سيراميك على شكل خشب .. فكنت حاطة هالاختيار براسي والبلاط رخام ابيض او رمادي مربعات صغار ..
لكن يوم رحنا للمحل فجأه لفت انتباهي شيء وحرفياً ما قدرت أتخطاه !!

سرق عيني حرفياً لكن حسيت ( الشيء اللي اول مره تشوفه بيعجبك لكن راح تمل منه بعدين ) وغير كذا هذا الشي ما يمثل ذوقي المعتاد اللي يميل لعدم المخاطرة .. لكن جد الشكل يجذب ويحمس مرة !! اللمعة العميقة مع السواد فخامة لا توصف !! انا تجاهلت هالجمال عشان ما يضحك اخوي مدري حسيت ذوقي شاطح

انا تخطيته الا واخوي يقول هيلة شوفي هذا !!!
و يأشر هالبلاط نفسه اللي خقيت عليه .
طبعاً هنا ثبت الأمر وخلاص اقتنعت انه افضل بلاط بالوجود وخلاص اخترناه وعيوني قلوب الارض ما تشيلن من الوناسة ..
بقى الجدران ههههههههعع .. وشلون نشري شيء حلو وفخم و ما يطلع لط ؟ ويناسب الاكسسوارات

ويصلح حمام بنات ؟ للأمانة بلاط الأرضيه مسح بفكرة حمام بنات الأرض ودخلنا مود " فخم " ههههههه ..
ورحنا نمر عالبلاط نطقم بلاط جدران ..
المهم هنا تذكرت ان حصه تبي خشب ولو تدري اني جايبه بلاط رخام اسود مذهّب كان انتهيت عالأقل فيه خشب .. وقفنا نص ساعه عند الخشب نبحث عن لون يناسب :(

انا اقول ابيض ( تفكر بحصه ) و اخوي يقول رمادي ( يفكر بالبلاط ) ..
وهكذا لين ناظرنا الجدار المقابل للخشب اللي بنحتارهن وشفنا نقشه حاطينه بالغلط ..
انا اناظر اخوي ، ( تفكر باللي افكر فيه ؟ ) ..
وكذا قررنا نشتري ٤ ألوان و نحط الجدار خشب ملون .. منها ما يطغى الرمادي ويصير الحمام

ومنها تتناسق الألوان مع بعض وتصير خامات طبيعيه ..
للأمانه فكرة دمج الخشب الملون مع البلاط الأسود المذهّب كانت تبدو فكرة جنونية وغير واقعية . حتى انا بنفسي مرات احس ( طيب لو طلع شين ؟ ) وثقتي بالتناسق مهزوزة قليلاً .. رغم انه كانت براسي فكرة حلوة ومميزة .. لكن يوم رجعت البيت

وسمعت الآراء حسيت ( فكرة مجنونة وممكن ما تضبط ) ..
وطبعاً حصة انصدمت من البلاط الأسود وكانت ردة الفعل الاولى لا تبشر بالخير .. لكن قالت ( يمكن يطلع حلو وأحبه ) وهنا حسيت بالمسؤولية صدق وصرت خايفه يطلع خياس و اوفر و لطوط بس اخوي معجبه شغلي مره وواثق بالتناسق وهو اللي عزز الثقة ..

خاصة واننا شفنا الخامات بعيوننا و شفنا الأسعار و كان اختيارنا افضل شيء بالوجود من الاشياء اللي شفناها و بسعر المعتاد اذا مب اقل !
المهم كانت عندنا مشكلة رسمة البلاط الملون .. كنت ابيه عشوائي و كأنه كوخ خشبي .. مدري كيف ارسمه وكيف اوزعه و فتحت صور وبحثت وما لقيت احد منزل رسمة

عشوائية اقدر استخدمها للجدار فقررت اسويها انا بالإكسل ..
مسكت الألوان و حسبت عدد البلاط و رسمتهم على العدد بالتمام والكمال و قسمنا الرسمة على الجدران الاربعه ..
الدش والاكسسوارات الثانويه ( الشطاف و الخلاط ( البزبوز ) وخلاط الدش ) .. اخذناهم طقم بسعر حلو لأن ما حسيت فيه معنى

انه نشتري شيء بشكل مميز ما راح يبين بالنهاية .. المغسلة كنت ابي شيء فيه دواليب و بحثنا ايكيا كانت الاسعار مرتفعة صراحة .. كنا ندور لشهور واخر شيء قررنا ناخذ وحدة من الدواليب اللي اعجبتنا بالبداية ، لكن انصدمنا ان القطعة خلصت ( اسوأ شعور ) .. اخوي سألهم اذا موجود بأي فرع وما لقينا

شيء :( والبضايع الحلوة خلصت وباقي اشكال لا تمت لذوقنا بصله .. المهم فيه مغسلة ثانيه كانت عاجبتن بس مب مره مع حصه ، بس للأمانه انه افضل من الموجود كله ههههههه .. قلت لاخوي خلاص اسأله عنه .. طلعت مخلصه هي بعد .. انا هنا تحطمت صدق لأن ما ابي اشتري شيء ما ابيه وادفع عليه مبلغ !

مره يقهر الشعور :( ..
لكن اخوي لزّم عليه شوي و قال ( هممم مافيه الا اللي بالعرض ، عادي عندك ؟ )
انا هنا انبسططططت صدق .. معليش حتى لو مغبره من العرض ، مقارنة بالموجود افضل !! والمكان مافيه بزران وملاقيف يعني القطعه غالباً مافيها عيوب .. خاصة وانها انباعت كلها بوقت قصير يعني

ما يمديه يصير عليها شيء !
وفوق هذا بيعطينا خصم عشانها معروضة بالمعرض .. حسيت اوكي مش بطّال !!
وأخذتها بسعر خرافييي .. صح بداخلي قلت ( يمكن فيها مشكله او مخدوشه او شيء ) لكن السعر والجودة حلوة مره !!
+ خشبيه بتطلع كيوت مع البلاط !
والموجود صدق مب ذوقي .. =_= ..

بقينا عالمرحاض .. طبعاً انا احب الاشياء الشاطحة والغريبة ( احد قال اني اتمنى اعيش ببيت العجائب والمتاهات ؟؟ )
وحنا ندور عالمراحيض لقينا مرحاض يرشق موية من داخل نفس المرحاض الياباني ، هنا انا واخوي وقفنا .. اخوي ، تبينه ؟ وهو طبعاً جازم اني بقول ايه بس ينتظر ردي !!
انا ! ايييييه

وخلاص اخذناه ( احد قال ان الارض مش سايعاني ؟ ) ..
ترانا درنا نفس المحل قبل لكن لقينا هالاشياء بروحتنا حقت الشراء ..
طبعاً كنا مقررين نشتري دش كبير منفصل لكن الأسعار مولعة مره فكنسلناه لأن معليش منب مليارديره سوري يعني ..
وكنا مقررين البانيو نشتريه من محل قريب من بيتنا بضاعته

ارخص لأن بنبني عليه وبيكلف هو والبناء حقه .. فندور حلول معقوله ، لكن وحنا ندور بمحل البلاط الحلو لقينا بانيوات أكريليك ( كنت خاقة عليهن وما توقعت وفروهن بالموقع ) .. بس مرينا عليهز ورحنا على اساس المحل القريب يكفي ..
يوم شرينا كل شيء ورجعنا البيت .. فكرنا بالبانيو .. طبعا السعر

دبل سعر البانيو العادي لكن دام كل شيء فخم ١٠٠٠ زيادة بتصنع فارق كبير ، والاكريليك متحرك يعني يمدي اخذه معي لو ابي اغير مكانه بعدين ف مرة منطقي السعر !
الاكريليك عندهم منتجين فقط واحد يجيب الصياح من جماله وجمال إنسيابيته ،والثاني حلو لكن ساده مافيه ميزه كنه بلكّه .. يوم جينا

نشتريه قال حق المحل آسف خلص ..
كيف خلص وهو توه جاي !!! شوي واصيح 😭 خلاص تعلقت به مره !!
نحاول فيه . ازعجه اخوي مره .. طيب مب مشكله حق العرض فيه ؟؟
لا حتى اللي بالمعارض محجوزة !!
ولا نتفة بانيو موجودة !!
قال له اخوي اذا بيجيبون دفعه ثانيه ، وكما يبدو ان الموضوع بيطول لين

يوفرونه .. انا كنت رافضه الشكل الثاني لأن معليش وش جاب السماء للأرض !!
لكن الأمل انقطع وخلاص الحمام بنشتغل فيه قريب ومب معقولة نأخره اكثر من كذا ومع الوقت تجاهلت جمال هذاك لأنه مستحيل وبديت ألاحظ مميزات البانيو الثاني .. وكيف انه راكب مع الصفة وحجمه اكبر وكيوت مع الطقم لأنه ساده

+ بيطلع انعكاسه عالبلاط الاسود أحلى ..
بالنسبة للصفاية ( فتحة التصريف ) اخترنا صفاية مستطيله طويلة ، الفكرة شاطحه ومكانه غلط ويمكن اللي يشتغلون بالحمامات بيرفضون الفكرة قطعاً لكن حمامي وبأختار الحلو بنظري 😌.
المهم وشرينا سخانه وشرينا التفاصيل الصغيره مثل مفاتيح الماء والليات

تقريباً خلصنا من استعدادات الحمام ، الحين باقي نتأكد من التصميم عشان خلاص العمال يبي يجون ويشتغلون عالحمام لازم كل شيء جاهز .. رسمت التصميم بالبرنامج بالاشكال المتوقعه .. طبعاً كنا بنغطي الشباك البشع المغبر بستارة اغديه تستر بشاعته..
كنت حاطة هنا البانيو المدور نفس حبيب القلب :(

الجدران بالتصميم عاموديه ولونها غير شوي لكن قريبة من اللون العام للحمام الابعاد مب متطابقة مع الابعاد لكنها قريبه مره منها .. كنت ابي الغسالة عند الباب عشان فتحة باب الغسالة يصير ما يعيقها شيء وسهل اطلع الاغراض منها للدولاب او اجيبهم لها .. نفس الشي المرحاض يسده الباب عشان اذا

احد فتح الباب بالغلط على احد يصير الباب حاجب فيتدارك الوضع ، والبانيو عند الشباك عشان النور يدخل و يكون بعيد عن الغسالة ما يطشر عليها والمغسلة تكون تحجب الماء عن الغسالة+ اذا مستعجله ابي اغسل شعري يمدي افك الدش واغسله بالمغسله اسرع ( لصبغه شعر مثلا او اي شيء ) رشاش الدش يكون قريب

ورسمت رسمة الجدار بعد ، كنت ابيه عشوائي مره بحيث مافيه رتم لأني اكره منظر التكرر في الجدران ما احسه طبيعي وكنت ابيه عشوائي و حُر مو مربوط بشي ، بنفس الوقت عدد البلاطات وتقسيمتهم كانت تحدن مره .. ففتحت الاكسل وجلست احسب كل صف وكم بلاطه وكم لون لين توصلت لتطابق حلو بالأعداد وعشوائي

الشكل بالملف كان سيء لأني نقّعت الالوان عشان اقدر اميزهم ( بالحقيقه الألوان متقاربه وباهته ) ..
اخوي عرض الشكل على حق المبلط وكان مب مقتنع فيه يقول لا بسوي ١٢٣٤ بعدين ١٢٣٤ .. طبعاً جان مغص من التفكير بالنمط المتكرر بيطلع يععععع صدق .. انا كنت رافضه قطعاً ولا ودي اناقش بتغيير

الرسمة ، المبلط يحس اننا نهوجس ونبي نتعبه بس لأن بيبحل بالألوان .. فقال اخوي لي ، نرسم جدار من البلاط عشان يشوف العامل بعينه ويحكم على الشكل لأن الملف ما راح يوضح له الفكره ، ومسكناه ورسمنا اول جدار بالحوش بالبلاط و احس اول مرة اشوف تطبيق لخيالي عالواقع خاصة وان الوان الملف تنعى

طبعاً الفكرة كانت اننا نرسم فكرنا وبكرا يجي العامل يرسم فكرته ويا يقنعنا يا نقنعه ( طبعاً صدقوا اني بقتنع :) ! ) ..
المهم ان العامل ( مدير كبير حق المبلطين ) .. جاء و اعجبته مرة وحتى ما ورانا شغله اللي يقصده ( شفت شلون قصدي !! مب نمط استغفر الله ! :/ )
جينا على العمال اللي

يبلطون ، هنا كانت فيه مشكلة كبيره ،كيف يفهمون العمال الرسمة + كيف يضبطون الأبعاد و كيف ما يخربطون الألوان .. البيج والأبيض كان لونين متقاربات مره .. وعشان ما يحوسون الشغل صرت كل شوي اشوف وش يسوون وأشرف عليهم لأن حرفياً زبدة الحمام هو الرسمة اذا حاسوه خرب كل شيء !!
طبعاً دققنا

عليهم من ناحية البلاط ما يكسرونه ويبذرون فيه لأنه على العدد تقريباً .. اول جدار كانوا متململين ويحسون اني استقعد عليهم وانه فعلياً البيج والأبيض لون واحد بس اتزنطر عليهم وانه عادي هنا يحطون لون غير مافيه مشكله ويحاولون يلقون رتم يسرع لهم الشغل ولكن لا يوجد .. كانت حايمة كبدهم ..

بنظرهم انا النفسية اللي ادقق على سفاسف الامور تسلط عليهم بس ..
يوم خلص الجدار !! وشافوا ان اللونين لونين فعلاً !! والرسمة خرافيه تغييييير التعامل !!! صاروا حماااااس و بدوا يلقون رتم .. اسمه عشوائي !! اذا حسيت ان لون تكرر ما جاء توقعه هنا ! وفعلاً بدوا يفهمون الرسمة اكثر من حتى!

بني صح ؟؟ يسألن ! ويطلع صح !
هنا صاروا حماسيين مره وخلصوا جدار كامل وهم مبسوطيييييين وفخورين بشغلهم وصدق شغلهم كان حلووووووو.. توقعت بيحوسونه ولا بيخربون شيء لكن جد هم بنفسهم صاروا يبون يضبطونه لأنفسهم لأنه شغلهم وبإسمهم ..
والرسمة تسوى التعب جد !! لأن ما قد سوو مثله من قبل !

هنا انا حسيت مهمتي انتهت تقريباً اللهم اراقب الوضع من بعيد .. انتهوا الجدران الأربعه و زاد بلاط كثييييير ٤ كراتين تقريباً من كل لون لأن ما استخدموا بلاط الباب والفتحات .. ( العمال نفسهم كانوا يقولون البلاط ما راح يكفي ، سبراااايز ! )
بقي بلاط الارض وخلاص ما يحتاج اراقب عليهم

لأنه مافيه شغل بس حط وقص الزايد ..
طبعاً يوم خلصوا العمال الجدران جا المعلّم حقهم وقعدا يهايطون عنده ، اخخخخ شعور انهم مبسوطين عليه يثلج الصدر ( كان السيناريو المتوقع انهم يكسرون البلاط ويخربطون الرسمه وشغل اي كلام عشان يخلصون بسرعه ) .. والمعلم يقول ايه حنا ناس فاهمين ونتعامل

مع ناس راقيه ونزين قصور وحركات ( جلس يرسل لاخوي بعد ما خلصوا اعمالهم السابقة .. طبعاً بعد ما خلصنا هههههه )
وكانوا فخورين ومبسوطين صدق بالشغل .. وانا اكثررررر ..
خاصة يوم خلصوا الارضية وشفت تناسق البلاط العجيب مع الجدران !!!! وحسيت ( يسسس ) !! ذوقي كان خرافي !!!!
شافته حصه

ومدحت ذوقي و حسيت اخيراً حبت البلاط الاسود !!!!!
طبعاً بعد ما حطينا البانيو و المرحاض و كل شيء .. هنا كل شيء صار بمكانه الصحيح .. وتلونت الرسمة كله !
الدولاب حق المغسلة اللي شريته صار نفس لون البلاط وكأنهم طقم !! والبانيو و كل شيء !!
ايه صح و شريت الدش الكول بعدين بالمحل

القريب الرخيص هههههههه بدل ما ندفع ٢٠٠٠ دفعت ٧٠٠ 😋❤ وأفضل منه بالنسبة لي ....
وشلنا فكرة الستادة لأن يوم يبلطون فكوا الدريشة فحطينا وحده بيضاء جديده وخليناه عميقة تصير رف ..
هنا صورة للبلاط مع الخشب ..

هنا صور مقتطفات أثناء العمل :
تكسير الجدران واعمال السباكة ..

تكملة ...

هنا ليصو الشغل وسدو الفتحات ..

صبوا رمل عالأرضية وواسوه ..

اليوم الاول للتبليط خلصوا جدارين و نص ..

السباك السبيكة ، كسر الماصورة اللي حاطه بنفسه و صلحه بنفسه و رقعنا للبلاط بالبلاط الجديد اللي ما ضيعناه ..
ذالسباك أغبى سباك بالوجود يرفع الضغط صدق ..
مالك يومين مركب الماصورة وانت حاطه على قياساتك انت .. تخرقه شلون 🙂!! ، لكن تدارك الموقف .. مره يقهر كنت متحمسه للحمام لكن

اخذ ساعتين اذا مب اكثر على ذالماصورة اللي كسره وركبه والمهمة المطلوبة منه للحين ما خلصه .. ضيع يوم كامل بغبائه صدق .. يجلط ترا مقهورة منه مره لكن دام النتيجة حلوة نتغاضى ..

وهنا خللللص الحمااااااام !!
للأمانة بالنسبة لي ، افضل من حمامات الفنادق .. لأنه مصبوب على ذوقي الخالص ..
ومن بعد هالحمام رسمياً اذا خلصت دارسة علوم حاسب بأخذ دبلوم تصميم داخلي واعيش هالمتعة مع الآخرين ..
لأن كل هالجمال بتكلفة متوقعه وعاديه !!
ونفس الاسعار يوم كنا بناخذه عادي !

وهنا تصوير حصه الكيوت للحمام :
المرحاض ابو رشّاق
البانيو الكيوتي
المغسلة الملونة
الشباك الرف
التفاصيل الصغيرة صنعت لمسة للحمام ..

للأمانة باقي تفاصيل ما خلصت مثل رف المناشف وسلال الغسيل و بسوي DIY خشبة بانيو و اشياء كثيره ناقصه لكن مره مبسوطة فيه وراضية عنه بدون هالكماليات حتى .. وأحس هالمكان قطعة من الجنة بالأرض .. وكل تفصيل فيه عشت معه قصة و سالفة .

طيب نرجع للعنوان الاساسي ، الحمد لله قبل نشتغل بالحمام جاب اخوي عمال يفلتون و انتهت الحرب مع الصراصير بعد ٥~٦ سنوات ونزلنا لافتة بيت الرعب لأن نو مور رعب .. وحالياً لو ودي انام بالحمام نمت براحة .. انتهى ..
احس بالفخر بشكل ما تتصورونه ، وكيف ان الكل بلا إستثناء راضي بالنتيجة

ويحس ان الحمام من جماله ما يناسبه البيت ههههههه ..
احس تحمست اصمم غرفتي الحين وأشوف كيف اصنع جنَّة اخرى بأشياء عادية لكن اختياري هو اللي يخليها masterpiece..
أشكر اخوي و بقوة على تحقيقه حُلم ما فكرت فيه حتى و تعبه معي طول الأيام هذي وبالأخص انه ألهمن وما حدن بأي فكره بالعكس كان

يأخذن لأفكار مستحيله ويخلين اتمادى فيها لين توصلت لهذي النتيجة ، احس اني كنت ذات خيال واسع معه وما حديت نفسي بشيء ، الشيء الثاني اني اخذت شغل الحمام لحالي فكنت حرفياً اختار على ذوقي وما كنت متردده مره باختيار شيء مع حصوص لأن مسكته لحالي ، ولا كان الجدار والبلاط زبدة الحمام بح ..

للأمانه اخوي هذا احسه مطابق لي فكرياً وخيالياً ، لذلك كانت رحلة تصليح الحمام ممتعه لأقصى مراحلها ( اكثر من لو زينته لحالي حتى ) وكان يعطين اقتراحات كثيره انصدم منها وأحس ( واو ) < طبعاً حصة تضحك علينا بالزاوية مره نروح لأقصى الشيء ..
لكن زي ما قال اخوي " حلو ان الواحد يفكر بكل

شيء عشان ما يجي بعدين ويقول ليتي حطيت كذا ، يكون فكر بكل الجوانب حقته ويرضى بقراره النهائي بشكل تام " . خذا الشيء هو اللي ما خلان اغير البلاط لأن حرفياً كان الأفضل .
وأحس اني محظوظة اني عشت هالتجربة الحلوة ومحظوظة بهذي النتيجة ومحظوظة بعد بأخوي 😆💗..

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة