سيدتي الفاضلة ، انا بتاع تاريخ ويمكن مش بفهم في السياسة او بفهم فيها وعامل مش بفهم علشان مش حابب اتكلم فيها لكن لما حضرتك تحطي مصر في جملة مفيدة فده كافي اني ارد على حضرتك .
مصر هي اكتر دولة عربية اذ لم تكن الدولة الوحيدة اللي وقفت اودام اسرائيل الند بالند ، مصر هي الدولة العربية الوحيدة اللي دخلت مع اسرائيل في مواجهات عسكرية مباشرة وحروب واتعرضت للهزيمة و رجعت قامت وانتصرت .
مصر هي الدولة العربية اللي لم تطلب التطبيع اصلا بل طلبت السلام ولم تكن مهزومة ومحتل ارضها وعرضها ، مصر لما قالت يا سلام قالتها وهي منتصرة و مرجعة ارضها و رافعة راسها والعالم كله يشهد على ذلك ، هي دي مصر .
مصر هي الدولة اللي سافر رئيسها لقلب اسرائيل وهو منتصر ولاخر لحظة وطائرة الرئاسة بتهبط ارض المطار كان الكل متخيل ان هيخرج منها قوات مصرية تفتك بكل الموجودين و ده مش كلامي ولا شعارات ، مصر هي الدولة العربية الوحيدة اللي عندها تاريخ بيكسر عين اسرائيل وشعب اسرائيل وهو ٦ أكتوبر ١٩٧٣
مصر عملت معاهدة سلام بينها وبين اسرائيل و لم يكن تطبيع ، طابا و دهب وبعض مناطق سيناء والسياحة اللي حضرتك بتتكلمي عنها من ضمن بنود معاهدة السلام ، تقدري ترجعي للمعاهدة وتقرأيها كويس وانتي تفهمي ، التطبيع جاي من كلمة الطبيعي ، والطبيعي لم يحدث بين شعب مصر واسرائيل ابدا
مصر عملت علاقات سياسية فقط لكن مصر معملتش مطاعم اسرائيلية في قلب القاهرة ، مصر معملتش اغاني ولا يجرؤ فنان واحد انه يعمل اغنية لاسرائيل ، مصر معملتش نشيد مشترك بينها وبين اسرائيل ، اطفال شعب مصر لم ولن يحملوا الاعلام المصرية والاسرائيلية ويرقصوا ويغنوا بيها .
مصر يمكن فقيرة ماديا مقارنة بدول عربية كتير ، ومعندهاش فلوس تشتري بيها الامن والامان ولا معاها فلوس تدفعها لدول علشان تحميها لكن مصر عندها جيش بيتقال عنه انه جيش الكفتة والجمبري صح ؟
بس دي شيء مبيزعلناش لان ده نفس الجيش اللي وقف في ضهر دول عربية كتير وساعدها .
بس دي شيء مبيزعلناش لان ده نفس الجيش اللي وقف في ضهر دول عربية كتير وساعدها .
وغصب عني وعن حضرتك وعن الكل جيش الجمبري ده هو اقوى جيش في المنطقة العربية كلها بلا منازع وده كمان مش كلامي ، وغصب عني وعن حضرتك هو الجيش المصنف رقم ٩ عالميا بين ١٣٩ جيش ، مصر معندهاش فلوس لكن عندها شعب و جيش ما الشعب هو الجيش والجيش من الشعب برده .
دول كتير لو فلوسها خلصت هيندعس عليها من طوب الأرض لكن مصر عندها جيش و شعب فوق ال ١٠٠ مليون قادر ياكل اي حد يقرب منها والتاريخ شاهد على كلامي واكيد حضرتك عارفاه كويس ولو مش عارفاه تقدري تقرأيه واكيد بتفتخري بحاجة زي كده لان ده المفروض يشرف اي عربي .
التاريخ اللي بيقول ان مصر هي الدولة العربية الوحيدة اللي اتعرضت لكل انواع الاستعمار وياما عدى عليها امبراطوريات و عصور و ممالك من كل جنس ولون وكلهم رحلوا ومصر لسه موجودة وكل اللي عملوه انهم بدل ما يضروها بالعكس زادوا من صفحات تاريخها .
مصر هي رمانة الميزان للشرق الاوسط كله ، مصر اه فيها الراقصات والطبالين والنصابين واللصوص وفيها كمان عاهرات لكن كمان فيها علماء واطباء ومهندسين و شيوخ و ادباء وشعراء وغيرهم وغيرهم ، مصر عمرها ما كانت منافقة ولا شعبها كان منافق ، بالعكس كل حاجة بنعملها في النور ، الحلو والوحش .
بالعكس ، عمرنا ما قلنا احنا بتوع دين وفي لحظة غيرنا مبادئنا وقلنا حرية وانفتاح ، طول عمرنا عندنا المسلم والمسيحي عندنا المحجبة والمتحررة عندنا المسجد والكازينو عندنا اذاعة القرآن و اذاعة الاغاني ، عندنا اعلام وصحافة بينقل كل حاجة واي حاجة عكس دول كتييييرة بتعمل بس في الضلمة.
مصر هي البلد اللي كانت بعض الشعوب العربية لما ميقدروش ياخدوا حريتهم في بلادهم كانوا يركبوا طياراتهم ويتجهوا لمصر واول ما يسمعوا في الطائرة انهم دخلوا الاجواء المصرية يقلعوا عباياتهم و الطرح بكل سعادة .
ده النفاق يا فندم ، ومش تقليل منهم بالعكس ، لانهم عارفين انهم داخلين بلد بتقبل كل الناس بكل التوجهات وكل الاطياف وكل الاعراق وكل الافكار اكتر من بلادهم نفسها ، مصر هي البلد اللي دايما ابوابها مفتوحة للجميع إلا اعدائها ...
شعب مصر بيختلف كتير وده طبيعي ومش عيب ، فيها ناس زعلانة من مصر وفيها ناس مختلفة مع مصر ، بس كام ؟ ١٠ ، ٢٠ ، الف ، الفين ، مليون ، ١٠ مليون ، ٢٠ مليون ؟ لسه في ٨٠ مليون غيرهم لو حسوا بالخطر منهم مستعدين ياكلوهم أكل .
شعب مصر مهما اختلف مع بعضه عنده امثلة حلوة اوي زي مثلا انا واخويا على ابن عمي وانا ابن عمي على الغريب ، و مثل تاني بيقولك أدعي على ابني واكره اللي يقول امين ، شعب مصر صبور اوي بس للصبر حدود.
شعب مصر لما بتفيض بيه بيغير انظمة ، بيغير حكومات ، بيمشي ملوك ، وبيقاوم امبراطوريات ، و بيطرد جيوش ، ده مش كلامي يافندم ، ده التاريخ بيقول كده ،
علشان مطولش على حضرتك ، من الظلم انك تحطي مصر في جملة مفيدة مع اي دولة اخرى وده مش تقليل من باقي الدول ابدا لكنه إحقاقا للحق ..
علشان مطولش على حضرتك ، من الظلم انك تحطي مصر في جملة مفيدة مع اي دولة اخرى وده مش تقليل من باقي الدول ابدا لكنه إحقاقا للحق ..
ومحدش بيزعل من الحق واعتبريه كلام واحد غيور على بلده .
تحياتي 😊
تحياتي 😊
جاري تحميل الاقتراحات...