ثريد بسيط توضيح لأهم الميزات اللي اجت مع IOS14 ، بعرف انه كثير شرحوا ونزّلوا بس عشان اللي ما شاف يشوف، وأي سؤال بخصوص اي موضوع بالتحديث الجديد اسألوا 🖤.
بدايةً، خاصية جميلة تم اضافتها وهي نقطة صغيرة باللون الأخضر بتظهر بالشاشة من فوق في حال كانت الكاميرا شغّالة ب اي تطبيق، يعني ممكن تكون قاعد تصور او اي اشي بس مش منتبه، بس تشوف الضو الاخضر اعرف انه الكاميرا فاتحة.
الكاميرا الأمامية بالايفون تقريبا ما حد كان يستعملها لأجل أكبر مشكلة فيها وهي انها بتعكس الصورة، بهالتحديث حطوا حل لهالمشكلة، بتروح عالاعدادات- الكاميرا- ومن هناك بتفعل خيار Mirror front camera لحتى تطلع بشكلها الصح.
خاصية بسيطة تم اضافتها للكيبورد وهي شريط الايموجيز اللي بسهّل عليك البحث فيهم من خلال كتابة اي كلمة بتدل عالايموجي وهو بطلعلك الاقرب فيهم.
خاصية Picture in picture واللي هي بصراحة من اجمل واكثر الاشياء المفيدة اللي ضافوها، واللي بتخليك تشغل الفيديو وتكمل تصفح بتلفونك والفيديو شغال، ونصيحة سريعة، لو بدك تطبقها عاليوتيوب ف لازم تفتحه من safari وبس تفتح الفيديو تكبس عالعلامة اللي بالصورة، من التطبيق ما حيزبط.
خاصية الback tap ، وهي ببساطة بتسمحلك بتحديد أمرين بمجرد ضغطك عالتلفون من الخلف مرتين او ثلاث مرات يتنفذ الاشي مباشرة، يعني مثلا بس اضغط مرتين يعمل سكرينشوت وهكذا، ولتفعيلها ، بنروح الاعدادات- تسهيلات او امكانية الوصول-اللمس- ونبلاقيها اخر وحدة تحت.
من زمان في خيار انك تخفي صور معينة عندك عالجهاز، بس ابدًا ما كان الها معنى لانه ببساطة ملف الصور المخفية بضل ظاهر عندك واي حد بيدخل بيقدر يشوفهم، حاليًا من الاعدادات- الصور ، رح تلاقي خيار اخفاء هالملف وبهيك صارت تُستخدم بشكل افضل.
خاصية اخفاء الصفحات على الشاشة الرئيسية، واللي بتخليك تحط برامج معينة بوحدة من الصفحات وبعدين تخفي هالصفحة لحتى ما تكون ظاهرة.
ضغطة مطوّلة على الشاشة الرئيسية وبعدها على النقاط تحت ومن هناك بتحدد ايش بدك يضل وايش يختفي.
ضغطة مطوّلة على الشاشة الرئيسية وبعدها على النقاط تحت ومن هناك بتحدد ايش بدك يضل وايش يختفي.
اضافات جديدة وبسيطة لتطبيق الملاحظات لحتى تسهّل استخدامه.
شكل siri الجديد كليًا، بحيث انه بطّل ياخذ الشاشة كاملة، مجرد دائرة صغيرة اسفل الشاشة.
وأكيد طبعًا الميزة اللي لا غنى عنها، لما اي شخص يتصل عليك بتظهر بشكل صغير فوق سواء فاتح لعبة او اي اشي، وبهيك بتقدر تكمل طبيعي لو ما بدك ترد عالمكالمة بدل ما تقعد تستنى يسكر التلفون.
اضافة خاصية تثبيت الأشخاص بتطبيق المسجات، بحيث تسهل عليك تدخل مباشرة عالأشخاص اللي بتحددهم.
اضافة الapp library، واللي من خلالها رح تلاقي البرامج مرتّبة بشكل معين وتصنيف معين بسهّل عليك الوصول الها لو عندك كثير برامج.
اضافة تطبيق المترجم الخاص ب Apple ، ومن تجربة شخصية بحكي انه افضل من ترجمة جوجل بمراحل.
وكمان تم اضافة خاصية تحديد المتصفح الافتراضي، ف لو مثلا بتحب تستخدم google chrome بتروح على التطبيق من الاعدادات، بتلاقي خيار default browser app ومن هناك بتحدد لحتى اي رابط بتضغط عليه يفتح من كروم مباشرة.
لمستخدمين الairpods تم اضافة خاصية الانتقال، بحيث لو كنت شابك السماعات عالتلفون وبعدها سكرت تلفونك ومسكت ال Ipad، تلقائي رح تشبك السماعة هناك.
وميزة اخيرة ما بتهم اي واحد فيكم على ضمانتي طبعًا، هي ميزة مفتاح السيارة واللي بتخليك ما تشيل مفتاح سيارة معك وتخليه كله عن طريق التلفون، وهالميزة حاليًا متوفرة على سيارة وحدة موديل 2021 وبالمستقبل رح تتطبق عكل السيارات الحديثة.
وللمهتمين بالميموجي، تم اضافة اشكال جديدة وحلوة.
ولتسهيل معرفة شحن اي مُلحق للجهاز سواء سماعة او ساعة ، رح يطلع تنبيه بنسبة الشحن لما تنخفض اعلى الشاشة.
جاري تحميل الاقتراحات...