كلنا مع الإصلاح واتحملنا ٥ سنين وكله بيشد الحزام الغنى والفقير عشان منرجعش لايام سودة مرت علينا وكلنا عشناها. بس أما توصل لداري اللى سترانى انا واهلى مش هيبقي فى باقية. صوت الفلاح الجبار اللى الكل شايفه مفتري ومغتصب بأرضه ومش حقه يبنى بيت بمليون أو يقعد ولاده فى شقق زى البهوات.
اللى مستكترين أنه يبقي عنده بيت بمليون أو يسافر ويجيب فلوس محدش عاوز يبص للغربة والذل ولا يبص للدخل اللى بيبعته للبلد. لا ازاى يقعد جنب أرضه ازاى ميروحش مدن جديدة. هو اصلا كان فى مدن جديدة هو اصلا كان فى تخطيط عمرانى هو فى اصلا فلاح يعيش بعيد عن أرضه. طب هو فى اصلا شغل فى المدن
كل اللي بيحللوا جايبين صور بكام عمارة شكلهم معفن وكان فيلا وقصر وبيدونا بيهم دروس وعبر ومش عارفين يشوفوا بيوت الفلاحين اللى بتتزال. ولا القهر اللى الناس عايشه فيه من يوم القرار وازاى يديروا الفلوس. ليه العنصرية دى. ليه الاسلوب دا.
فجأة كدا اكتشفتوا المخالفات وشفتوها طب فين المسؤولين من وقتها ليه مؤدوهاش من قبل ما تطلع ليه دفعتوا الشباب شقي عمرهم فى شقه تسترهم. على قد فلوسه خد مكان يلمه وبعد عن المرخص عشان سعره. مين وفرله اللى على قد ظروفه
كلنا مع دولة القانون اللى تحل لى مشكلتى مش تزود نسب الفقر وترمى الناس فى الشارع او تبيع اللى حيلتها أو تاخد فلوس بالربا عشان تسدد للدولة اللى مخصمانى وعاوزة تتصالح معايا بشقايا. الدولة اللى انا وناسي نفديها بروحنا وبولادنا. عاوزين متشفوش العشوائيات اوك بديل لهم.
عاوزين توقفوا مبانى على أرض زراعية برضة بديل لهم. والأهم تشغل الناس المسؤولين يوقفوا كل حاجه غلط من يوم ورايح مش تحاسبنى من عشر سنين فاتوا.
الحل توقيته خاطىء بعد سنة مريرة العالم كله حاله واقف فيها. اخواتنا فى الخليج مقبضوش اربع شهور وأهلنا فى الأقاليم مافيش دخل ومطلوب منه يتصرف عشان يدفع لداره اللى عملها بدون خدمات زى اللى متوفرة إلى فى المدن. مطلوب بقي يبيع بهايمه أو يتصرف يستلف أو ياخد قرض أو حتى لو محوشهم لنفسه
لا مطلوب منه يدفعهم عشان نتصالح. طب اشمعنى انا اللى اتصالح والفاسد اتصالح! طب اللى بيقول العمارات المخالفة وأنهم تحروا الدقه ومشتروش مخالف. طب يا فندم كل واحد وعلامه يعنى حضرتك عارف الصح وبتعمله غيرك ميعرفوش لقي شقه فيها عداد مياة وكهرباء كدا بالنسبة له قانونى. طب هقول أنه عارف
طب هو شغال اية ويجيب ازاى بيت يستره ويتجوز فيه اكيد هيدور على اقل تكلفه عشان تناسب دخله. مش هيتجه المرخص لانه عالى عليه. الحل كان ايه. يدفع عن المقاول والمالك اللى قبضوا وطاروا؟ ولا بتوع الحى مسؤولين يجيبوهم من قفاهم يتحاسبوا مش يعاقب الساكن
طب اللى بقي مستكتر أن الفلاح يكون عنده فدان أو عشره ما تبص للى مليونيرات هنا ولا هى حلال لناس وناس لا. واللى مستكترة أنه يعيش مع ولاده كل واحد فى شقه لا ازاى كدا يبقي غنى مش غلبان المفروض يعيش فى اوضه وبقولها يا ست هانم ويا سعادة البيه عشان تحس أنه غلبان
اساليبكم فى العرض كلها مقيته وعنصريه ومتنمرة وللاسف انتوا اللى بتخلوا الناس تكره الدولة باقوالكم. جيتوا تحكلوها عميتوها
دولة القانون تقنن الوضع الحالى بما يتناسب مع ظروف المواطن اللى عايش فى ظروفه مش على ظروف بتوع تويتر ومن يوم ورايح تطبق القانون دا اللى اعرفه
على فكره يا سادة معظم اللى مطلوب منهم تصالح دافعين اضعاف اضعاف لتوصيل المرافق. وواخدين احكام محكمة بالبراءة أو بالغرامات. سؤال بقي مطلوب من المواطن ايه بعد ما حكمله قاضي فى محكمة بدولته ومسؤل دفعه اضعاف اضعاف عشان يوصله الخدمات. تفتكروا بقي هو كدا مجرم؟!
بالنسبة بقي بطولة اللسان على الفلاحين واللى بيقولوا انهم عالة على المجتمع أو بيتعلموا ببلاش دول عندى اسوء ما ظهر من جوف الأزمة لانهم بيقيؤو قرف وعنصريه وغباء. الفلاح مش عالة عليكم يا سادة الفلاح هو اللى بيزرع فى الدولة اللى اقتصادها الأساسي قائم على الزراعة يا بهوات. بيزرع فاهمين
الفلاح بيتعلم فى المدرسة المتاحة له فى منطقته ملقاش قطاع خاص يعمله مدارس مستواها أعلى واصلا اصلا الفلاحين همه لللى طلعوا القامات اللى بتتشرف بيها دولتنا. انتوا روحتوا للمدارس الدولية والخاصة بفلوسكم لية؟ مش عشان مش عاجبك الحكومى الوحش وسيبتوه للغلابه؟ ولا دلوقتي بقي حلو وببلاش!
انتوا كلكم اتطورتوا واتنقلتوا من مكان لمكان ومنصب لمنصب انما بقي ازاى الفلاحين يبقي عندهم بيوت ويعلموا ولادهم. فعلا المجتمع اللى قسم التعليم قسم الطبقات وخلى ناس تبص لناس يا بقرف يا بشفقة يا بمنه يا بحقد هو اللى أفرز الاصوات دى.
جاري تحميل الاقتراحات...