أنا عشت بعيد عن مصر 19 سنة، كانت حياتي منظمة جدا: شغلانة كويسة، دايرة معارف كبيرة، اختلاط بثقافات مختلفة، خبرة بتزيد كل يوم، خططي للحياة كانت ماشية زي ما أحب وربنا كان موفقني فوق ما كنت أحلم وأتمنى. إرادة ربنا خلتني أرجع أستقر في مصر من سنة فاتت (1)

وأقدر أقول إن الحياة في مصر لها طعم مختلف (مش كلام أفلام) ده عن تجربة
اليوم مش منظم يبتدي وقت ما يبتدي ويخلص وقت ما يخلص
ممكن تعمل على حد ناصح بس هتلاقي حد دايما أنصح منك
ممكن تشتري الحاجة بسعر كويس وتلاقي نفس الحاجة بسعر مختلف خالص في مكان تاني
العيال أكبر من سنهم بكتير (2)

مفيش في مصر قاعدة لأي حاجة حرفيا
اللي بتشوفه في الأفلام بيحصل فعليا في الواقع
مصر غنية جدا بالثقافات سواء جغرافيا أو طبقيا
ما تستغربش من أي حاجة كل شيء وارد الحدوث
هتفرح وتتنكد في نفس اليوم وممكن في نفس الساعة
كل مشكلة لها حل رخيص سريع ولها حل غالي بس محتاج تدور
(3)

اللي عايز أقوله بعد كل الهري أنا كنت عايش برا مصر حياة منظمة جدا جدا بس كانت مملة وأنا يمكن ما كنتش واخد بالي
في مصر حاسس إني عايش حياة بجد مختلفة مش رتيبة، اليوم كله أحداث أحداث أحداث
ويمكن إختلاط المشاعر المستمر ده هو سبب سحر الحياة في مصر!
اصبحت حاليا عشوائي يا مصر😂 (4)