رتبها

مع قرب الدراسة عزيزي الطالب، في هذا الثريد راح اتكلم عن مشواري الجامعي بشكل مختصر وعن المذاكرة والأشياء اللي خلتني اتخرج بهالمعدل وبمرتبة الشرف الأولى والأول على الدفعة..
ما جت حظ أبد، جت بتعب وجد واجتهاد، تابع معي هذا الثريد، وسوي لايك ورتويت لعلي اقدر افيد اكبر عدد ممكن 🙏🏻❤️

بدايةً، انا ما سويت هذا الثريد عشان اهايط بمعدلي او بغيره لا اعوذ بالله، انا هنا عشان انقل لك تجربتي لعلها تفيدك وتساعدك وحطيت صورة للمعدل عشان تثق في كلامي وما تعتبره هبد بدون دليل ❤️
رتويت منك ولايك يوصل الثريد لاكبر عدد عشان تعم الفائدة..

أول شيء كنت اسويه دائماً هو “المذاكرة أول بأول” .. كنت اسمع عنها بس ما عمري طبقتها ولا سويتها إلا بالجامعة، وفعلاً سلاح فتاك يساعدك بتميزك .. راح تساعدك بحفظ المعلومات بشكل سهل وربطها بشكل سلس، لان تو الدكتور شرحها لك فلما ترجع البيت وتذاكره انت تعزز دخول المعلومة لذهنك وحفظها👏🏽

ثانياً اعطي كل مادة حقها ..
المواد الصعبة جداً والدسمة والمهمة كنت اذاكرها اول بأول واعطيها وقت اكثر من المواد السهلة والبسيطة، هنا انا اقسم جهدي بشكل منظم على حسب ترتيب المواد واولويتها من :
-عدد الساعات
-صعوبة المادة
-دسامة المحتوى
-كثرة المعلومات

“من خاف سلم”
هالجملة كانت تمشي معي بكل مادة، عشان كذا اخاف احملها واذاكرها أول بأول واشد حيلي عشان أسلم .. خل هالجملة معك كمان 💁🏻‍♂️
أحمد كيف تشتغل بإيفنتات كثير وتتطوع وتجيب درجات عالية !! <أكثر سؤال كان يجيني من أخوياي 💁🏻‍♂️
🚨 الجواب:
ذاكر أول بأول، يتنظم ويترتب كل شيء✨

لما تجي تذاكر، لا تحاول انك تحفظ من اول مرة !!
اقرأ المحاضرة كاملة وشوف محتوياتها، تعرف على العناوين الرئيسية وابدأ قراءتها بتركيز اكثر من مرة بتلقى نفسك حبة حبة بديت تحفظها! وهنا ابدأ احفظ 👏🏽
كثرة القراءة راح تخلق المعلومة مألوفة لمخك، وبالتالي راح تسهل عليك حفظها✨

-قد ما تقدر انتبه للدكتور، وارجع بيتك وذاكر، هذي تسهل عليك سالفة المذاكرة..
-اكتب، اكتب، اكتب. من أسرع الطرق للحفظ إذا انت شخص ما تحفظ بشكل سريع..
-اربط المعلومات دائماً، حتى لو كان ربط غبي عادي أهم شيء انت تتذكرها؟ وثابته بمخك؟ هذا المطلوب 👏🏽

فيه جملة سمعتها من دكتور: “التكرار يعلم الشطار”
-لما تذاكر لا تراجع مرة وحدة! راجع مرة ومرتين وثلاث وخمس، هذا اللي كنت اسويه..
والله كثرة المراجعة هي اللي خلتني اتمكن من المواد، لان المذاكرة اذا ما كانت بتركيز كامل، كثرة المراجعة تخليك تحفظ غصباً عنك 👏🏽 ((التكرار يعلم الشطار))

-ابدأ المذاكرة قبل الإختبار بمدة كافية وعلى حسب صعوبة المادة كنت ازيد المدة، فيه مواد اذاكرها قبل الاختبار ب اسبوعين! مع اني مذاكرهم اول بأول؛ الا اني ابي A+ عشان كذا اذاكره بمدة كافية واراجعه كثييير..
وفيه مواد الله حق تكون جداً سهله، بس اذاكرها قبل الاختبار ب ٥ او ٤ ايام، ليه؟

عشان اذاكر برواقه وبشويش وعشان تسهل علي المعلومات لما اذاكرها واعطيها حقها بالمذاكرة والبحث وبكذا اتمكن من المادة بشكل أكبر، أفضل من انك تحشر نفسك بمدة قصيرة قبل اختبارك لا انت اللي ترتاح نفسياً ولا اللي تقدر تذاكر وتفيد نفسك بالمعلومات وتستعد لاختبارك !! خلك ذكي 🙏🏻

خلك متعطش بالحصول على المعلومة، لا تعامل دراستك الجامعة بتخصصك على انها معلومات واختبار وخلاص! لا خل المعلومة اللي تحصل عليها لك وللزمن..
“تعلم لنفسك، لا تتعلم عشان ورقة الإختبار”📝
الفرق بين الدرجات العالية والمنخفضة هي (الإهتمام)، إهتمامك يحدد وجهتك ..

والله العظيم تجي أيام يكون بكرة عندي إختبار وصعب جداً، العيال يراجعون بس أحمد قاعد يتطوع أو يشتغل بإيفنت!!
مذاكرتي أول بأول منقذتني، وكمان بالإيفنت أساساً أذاكر بوقت الفراغ اللي أحصله💁🏻‍♂️
خلك شخص متعدد المهام، حتفلح!! 👏🏽

والحمدلله، بالتخصص درجاتي جداً عالية بكل المواد وأقل مادة وأسوء مادة حصلت عليها بحياتي الجامعية هي B ..
“وها أنا اليوم ولله الحمد احقق مبتغاي🎓”
صعب جداً انك تحصل درجات عالية، لكن ابداً موب مستحيلة! ما جتني هدية هالدرجات والمعدل، جاء بإهتمام ورغبة قوية للتميز..
متخرج A+ 👏🏽❤️

أخيراً..
أنا انسان، وانت انسان.!
قدراتي ممكن تقول أقل منك حتى، لكني شخص مهتم وشغوف بالتميز، ف حصلت اللي ابيه ..
باقي دورك أنت، الموضوع كله بيدك والقرار قرارك، وتذكر إنك قوي وتقدر زي ما انا وغيري قدرنا..
شدوا حيلكم، وتذكروا يا اصدقائي:
“التعب يزول، والإنجاز يبقى” !!
❤️❤️

المزيد من هذا الكاتب

مواضيع ذات صلة

الأكثر اعجابا

المزيد من هذا الكاتب

مواضيع ذات صلة

الأكثر اعجابا

نسخ سلسلة