مرة في فندق في العين السخنة في يوم خريفي حبتين،اتجمعت الأسر بعد العشاء في الحفلة الاشتغالة اللي بتتعمل للنزلاء في الأوبن إيير، وهم عندهم انتفاخ وعيالهم عاملين دوشة وبيرازوا في المطربة اللي لابسة جيبة وكعب عالي ومعاها مطرب شاب من السويس جواه فنان بس قدره رماه على أسوأ أنواع العروض
العروض دي بيبقى جمهورها هدفه الأسمى إن العيال تقعد تتنطط وتفرك عشان تيجي عشرة ونص يبقوا بيتطوحوا ويطلعوا يناموا. وأكتر فئة بيطلع دينها هم الكام مراهق ومراهقة الأجانب اللي جايين من شرق أوروبا بتوع فريق الانيميشن، واللي بالليل مضطرين يعملوا عروض لأطفالنا الكيوت، ثم حصلت المفاجأة 🤦🏻♂️
فجأة الدنيا مطرت، وطبعا شو الأطفال لو اتلغى فالعيال هتعمل مناحة وكدة هيسهروا أكتر ومفيش سبيل للسيطرةعليهم غير بصاعق كهرباء، وطبعا الصواعق غير متوفرة في الفندق، فـ "اتفتقت"في ذهن إدارة الفندق فكرةإنهم ياخدوا الأسر بالعيال بفريق الانيميشن هيلا بيلا على جوة يعملوا الحفلة في البار 😀
الموضوع كان كوميدي جدا، انت واخد طقم الأمهات، والجدات، والحوامل، وموظفي القطاع الخاص اللي بكروش، وأصحاب المعاشات اللي بدقون ومدخلهم في بار، والأكثر غرابة إنك شايف عيال كتير مسيطرة على البار وبيشدوا مقدمي العروض من هدومهم وسط أغاني أطفال أجنبية صاخبة تدنس هذا المكان الهادىء الجميل
طبعا المكان ضيق على العدد ده، فالأهالي اتكوموا على بعض في جنب وسابوا العيال تنهش في فريق الانيميشن بتاع أوكرانيا، وطبعا العيل اللزج من دول كل شويةيبص لعيلته من بعيد نظرة كلها سعادة وهو عمال يهبل ويتنطط ويتحرش،فأبوه يرد بابتسامةصفرا زي بتاعة نادر بكار وبيقول جواه أنا ايه جابني هنا
تكويمة الأهالي دي مع بعض كانت ميكس غريب في البار، يعني تلاقي الحاج مهندس على المعاش وقاعد بدقن وقور وهادي، والحاجة مراته عمالة تسقف وفرحانة بالبنات الاجانب اللي بيلاعبوا أحفادها، وإسلام بتاع الآي تي عمال يصور عياله عبد الرحمن ورودينا ومركز على الاوكرانيات خلسة ..
وسلمى موظفة البنك المحجبة اللي بتعمل سبانش في المصيف، عمالة كل شوية تروح تكلم عيالها بالانجليزي وهم بيرقصوا مع الاوكرانيات وتديهم باقي ساندوتش الكفتة عشان مكملوش عشاهم وطلعوا على صوت الحفلة.
وسارة بتاعة الاتش آر اللي مبتعينش غير ناس شبهها ونفس أفكارها وتوجهاتها، قاعدة مكلضمة وبتوزع سمومها على المحيطين، والواد اللي على البار طالع ميتينه في طلبات غريبة واملالي دي مية سخنة وهاتلي نص كباية لبن ونفسه الشيفت يخلص والعالم ينتهي
والواد ماركو وميرا اللي جايين يقضوا شهر العسل بس مستخسرين يسيبوا الحفلة بما انهم دافعين بقى،فواخدين جنب كدة وعمالين يتوشوشوا ويبتسموا،وياعيني ميرا أول مرة تلبس كت وقصير فمكسوفةومش واخدة راحتها بس متسمرة مكانها ومش ممتعضة.
سيب الزحمة والدوشة يا مارك وخدها وامشي ببنتاكورك ده يا عم
سيب الزحمة والدوشة يا مارك وخدها وامشي ببنتاكورك ده يا عم
المهم بقى عشان مطولش عليكم😀 كنت عايز أقولكم إن كان صعبان عليا الراجل الأجنبي اللي كان في البار،راجل خمسيني كدة شاف تجربة عمره ما كان يتخيلها. كنت عايز أقوله أغاني الأطفال دي والعيال دي كلها بالحاجة ليلى مديرةالمشتريات في التضامن الاجتماعي، حقيقة مش تأثير الكحوليات المحليةبتاعتنا
طبعا الراجل ده لما هيرجع رومانيا ويحكي لأصحابه عن اللي شافه في البار في مصر محدش هيصدقه أو هيسفوا عليه ويفتكروه أڤور في الشرب، فالخلاصة يعني لو شاف التويتس دي وكان عايز إثبات للي حصل فحابب أقوله إن صور اليوم ده عندي 🤚
انتهى 🏃🏿♂️
انتهى 🏃🏿♂️
جاري تحميل الاقتراحات...