أمس الموافق 18/8 واقف في صف بنزين في محطة بشائر_ شارع الستين والوضع كان طبيعي جداً إضافة لي إنو الطرمبة فيها صفين والاتنين ماشين كويس وأنا واقف صح وماف اصلا زول احتج على وقفتي بعد مسافة من الزمن جاء عسكري من عساكر الدعم السريع ومن غير سبب قال لي ارجع آخر زول في الصف أو أطلع عديل.
رديت عليهو بي كل أسلوب رغم أسلوبو الكعب وفهمتو إني واقف في الصف صح وماف زول محتج وفي عربات وراي وقفت معاي في نفس الزمن.. قال لي الصف دا عملتو أنا وبعد نقاش طويل لقيت نفسي حصلت مسدس البنزين وقال لي انزل من العربية ومعاي صحبي في العربية وفعلاً نزلت ولقيت قدامي 13 عسكري وكلهم دعم ..
بقت دق من طرف بسطونة وسير وضرب باليدين وقالو إلا نطلع فوق في نفس المحطة وشالو مفاتيح العربية والتلفونات وودونا فوق في أوضة ما فيها شباك ساي ولا تهوية حتى ولا إضاءة لحدي ما وصلناها نحن كنا اتدقينا دق شديد وجوا الأوضة نبذ وكانو بكرروا ( انتو قايلننا جياشة ولا شرطة ) .
وبمسك الشعار وبقولو لينا اقرو دا شنو وبيضربوا فينا بالسير والبسطونة وما تنسوا إنو دا كلو في صف بنزين وبعداك قفلو الأوضة ما عديت الزمن القعدناهو في الأوضة لأنو ما معانا تلفون ولا ساعة لكن غالبآ 4 ساعات ومافي تهوية النفس بالعافية لحدي ما جو بي نفس أسلوب الدق والتهديد والنبذ والسب
بعد مسافة جابو المقص وحلقوا لينا شعرنا بي كل حقد مع الدق والنبذ المستمر وقالو تخت شعرك جوا جيبك بالنسبة للإصابات آثار الجلد في ضهري ويديني ورجلي اتفكت وصحبي نفس الشي وما قادر يحرك يدو وأنا حقي ما بخليو وبحاول مع إنو ماف زول بجيب حقو من قطاع الطرق ديل بس داير اعرف في شنو تاني ؟
جاري تحميل الاقتراحات...