رتبها

اليوم يوافق الذكرى السنوية الثانية للرحلة اللي غيرت نمط سفري كليا وغيرتني انا شخصياً. والله تجربة قد ما اتكلم عن مرمطتها وجمالها في الوقت نفسه اتعب.
خط الرحلة كان: باريس -برشلونة -فالنسيا -قرطبه - غرناطه -اشبيلية -مالقا -مدريد
المدة: ٢٤ يوم
الميزانية الكاملة الشاملة: ٧٠٠٠ ريال

بدت الفكرة بإني في سنتي الأخيرة بالجامعة وكنت راح اخلص تدريب بعد شهرين واعرف انه بيكون عندي مبلغ طيب. كنت اقلب في سنابات أحد الرحالة وكان يتكلم عن تجربة السفر لحالك ما اقتنعت في البداية وجلست اقول شوف السباك هذا نفسية يسافر لحاله!!

المهم جلست بعدها اكمل في البحث عن اصحاب سفريتي الجاية والله بلاني بمجموعة طفرانين الله لا يشتكر فضلهم وبدأت اقلق، مو معقول ما اسافر قبل فصلي الاخير. والوقت بدأ يقصر. بدأت الفكرة اللي استحقرتها تدخل بالي شوي شوي كل ما قرب الوقت، وفي غضون ايام حسمت الموضوع وقررت أقدِم واروح لحالي

بدأت اعد العدة وابحث عن ارخص رحلة وايش الأساسيات اللي احتاج اعرفها عشان اسافر لحالي وبديت اجمع معلومات من مصادر مختلفة منها صديق لي سافر قبل لحاله كانت المعلومات باختصار وين اسكن وكيف احصل مجتمع اتعرف فيه على ناس عشان ما اقعد لحالي وكيف احمي نفسي من المتوحشين و الحرامية 🤷🏻‍♂️😂

بناء على تجارب اللي قبلي.
لقيت مجموعة طيبة من المعلومات وخلالها تعرفت على كثير تطبيقات وعرفت عن الهوستلات اللي وفرت فلوس ومكان اجتماعي بنفس الوقت.

استغرق الإعداد شهر ونص حتى وصل الموضوع اني عملت جدول حطيت فيه ميزانيتي باليوم وكل نقل راح اركبه وكل يورو بيروح فين وكيف بينصرف وحطيت احتياطي ٤٠٠ ريال ذيك الرحلة. (من هنا ما باتكلم عن تفاصيل الرحلة لكن بذكر نقاط مهمة فيها)

جاء اليوم الموعود وركبت الطيارة موجّه لباريس اللي هي وجهتي الأولى -الله لا يبارك في من دلني عليها🙂- اسوء وجهة مريت عليها في حياتي ومن أغلى الأماكن. كنت عزابي مسكين و كل زول بالحرمه بتاعو 💔الا انا!!طبعاً اول مرة كانت اسافر لحالي فمني عارف كيف افتح كلام مع الناس وكيف ادخل معاهم.

فجلست لحالي اول يومين في باريس مستوحش وكاره للفكرة وندمان عليها. وفي آخر يوم من شدة القرف وفي محاولة يائسة شفت واحد كان شكله لاتيني وطلع فعلا من تشيلي 🤷🏻‍♂️فرميت هرجه ضعيفة -قلك انها إثارة وغموض- :ياخي ما عمرك فكرت ليش احنا موجودين؟ "ومسوي نظرة كونان بوجهي"🤣

العجيب انه فك سالفة جيدة من حماسها طلعت امشي معاه لين الريف زي الأهبل 😂من الفرح مدة ٨ ساعات وكان اول واحد وفق الله بيني وبينه وعلمني كيف اتشجع وادخل مع الناس ورحلتي بدأت تصير تحفه. انتهى اليوم معه في باريس وكان اول يوم جميل لي هناك اذا شملنا أحلى المخبوزات كنت اكلها بحياتي.

ووجهتي التالية كانت برشلونة
في برشلونة كان الهوستل مميز وأفضل مجتمع عشت فيه لان الهوستل كان ما يقبل الا ١٦ زائر في الوقت الواحد فهو صغير ومبدأهم قائم على خلق جو عائلي بين السكان فكان تجربة مثالية لا تنسى لمدة ٤ ايام نزلنا فيها أماكن تجمعات شعبية ورقصات فلامينغو باماكن شعبية

ومن البرامج كان زيارة واحد من سكان البلد في بيته يعرفنا على ثقافة كاتالونية. موضوع مهم اني في برشلونة ذقت الباييا -اكلة اسبانية- وبدون تفكير وما اعرف ليش قررت اتعلم كيف تنطبخ فسألت الشايب ودلني على طباخ معروف في فالنسيا وللي ما يعرف فالنسيا بيت الباييا فقررت اروحلها واتعلم الطبخ

فعلاً توجهت لفالنسيا "المملة" كانت كانها القنفذه مطورة شويه 😂 -لا يزعلون اهل القنفذه-. وزرت الشيف وقضيت يومين معاه اتعلم الطبخة مع مجموعة كانت حاضره وتعرفت على المجموعة وصرت اطلع معهم اقضي وقتي بعد الحصة وهم اللي خلو المدينة تذكر.

وبالتحديد في فالنسيا بدأت الحفلة. في آخر ليلة سهرنا انا و المجموعة على البحر وكانت ليلة ما انساها لدرجة نستني انو رحلتي اليوم الثاني قطار على قرطبه والساعة ٨:١٥ 😰. نمت ٤ وقلت يلا الله يسهل ٤ ساعات ان شاء الله تكفي.
الحمد لله قمت وتوجهت لمحطة القطار...

بس اللي حصل تأخر المترو عليا خمس دقائق وكانت كفيلة انو رحلتي تضيع واشوف باب القطار يتقفل في وجهي الشيء اللي خلاني الف في شوارع فالنسيا مني عارف ايش اسوي ولا عندي مكان اروح له. جلست بدون مبالغة ٧ ساعات مني عارف اتصرف اصيح كأني بزر غثيث يبي كندر😓.

أخيراً قررت أطلع بالباص واتحمل ٩ ساعات الى غرناطه اللي ما كان عندي اي فكرة فين راح اروح لمن اوصل ولا ايش راح اسوي. كانت رحلة هادئة عكس ما توقعت.
وصلت غرناطة الساعة ٢ الفجر وكان كل شي مقفل وما عندي بيت لاني فوت تسجيل الدخول للهوستل وقفل الاستقبال جلست مني عارف ايش اسوي...

و التعب قاتلني ومافي بيت ولا فلوس تسكني في فندق🙂 قررت احط شنطتي واطلع السليب باق وانام بحديقة قريبة من سكني لين تفرج. صارت حفلات كثير ذيك الليلة مع سكرانين بس لحسن الحظ عندي معرفة كيف اتعامل معهم من تجارب لي في امريكا لكن اقواها ما ينقال لكن يكفي اقول مخلوق قضى حاجته قريب راسي🤢

حمد لله فتح الهوستل الساعة ٨ وكانوا متعاونين ودخلوني الهوستل قبل موعد التشيك ان من كثر ما تحلطمت على الاستقبال😭 بعدها مشت الرحلة روعة في كل مدن الأندلس من بعد كل الألم ووصلت الى وجهتي الأخيرة مدريد مدينة فريقي المفضل ونجحت أحقق احد الأحلام واحضر مبارة لمدريد في السانتياغو.

الشاهد موقف أخير حصل لي في مدريد. طبعا غلطة باريس انها طلعت اغلى بكثير من حسبتي وغلطة القطار اللي فاتني ضيع الاحتياطي وخرب خطة الصرف. آخر يومين في مدريد شريت طبق بيض وكيلو بطاطس وصرت اطبخ اكله اسبانية اسمها "بوتيتو تورتيا" ١٧ مرة باليوم عشان اعيش😂😂 ومويتي من الهوستل أو بزبوز

جا يوم عودتي وعلى حضي كان يوم ماطر في غير موعد مطر -اسبانيا تبكي على حالي- المهن كان لازم اروح المطار. يعيب مطار مدريد انه بعيد ما يمديك تروح الا تكسي او مترو وكان معايا ٤ يورو كل اللي املكه وناقصني ٢ يورو عشان اطلع المترو. مني عارف ايش اسوي وما ابغى اشحذ

مع انو كان يمديني اكلم الوالد يحولي لكن انا طبعي احب اعتمد على نفسي لآخر قطره. فسويت حركة اسطورية، طلعت قلم خط كان معايا ودورت شوية ورق من الموجودين حولي وناديت
You can have your name In Arabic here for 1€
😂جوني ثلاث كتبت اسماءهم بالخط العربي واخذت منهم ٣ يورو ودفعت تذكرتي...

وطلعت وتخارجت من الورطه مع يورو زياده😎
تعلمت من الرحله هذه كثير واستمتعت فيها كثير وتمرمطت فيها كثير لكن تخيلو من بعدها كيف ادمنت السفر لحالي وقد ايش أثرت هذه الرحلة على حياتي الشخصية وطريقتي في بناء علاقاتي وتواصلي مع الناس. فالحمد لله🙏🏼❤️

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد