رتبها

كم معلومة عن الهالات تحت العين
———————————-
اول حاجه عشان نعرف الهالات هي شنو وبتحصل كيف لازم نعرف تكوين الجفون..

منطقه الجفون اول طبقة فيها او الطبقة الداخليه عبارة عن دهون ، حولها وفوقها انتشار واسسع جداً للأوعيه الدموية وتغطيهم طوالي طبقة رقيقه من الجلد..

فمشكله الهالات
يا اما تكون ناشئة من :
١-اختلال في الدهون .
٢-اختلال في الاوعية .
٣-تصبغات في الجلد البغطي المنطقة.

الاختلال في كل منطقه اسبابه مختلفه وطرق علاجه مختلفه ...
ودا معناه شنو ؟!
انو ما اي تركيبه او كريم بقولوا عنه للهالات حينفعني دايماً ، فنعرف السبب اولاً وبعداك نقرر هل ممكن نستخدم تركيبات او لا..

ثاني حاجة حوالي ٧٠٪ من الهالات السوداء سببها ورااااثي !! سببها شنو ورااااثي !!
يعني م بتتحل ١٠٠٪ ممكن فقط تخف عن طريق الميزو ثيرابي والليزر وغيرها ..

وكمان في ناس اصلاً ما بكون عندهم هالات بس بتكون عينهم غائرة لجوا ، مع انعكاسات الضوء بتظهر على شكل هالات ، زي ف الصورة ..

اخيراً انو الهالات ممكن تكون على شكل انتفاخات او لون غامق مايل للسواد ...

نبدأ نخش في موضوعنا ..
١/ اذا كان الخلل في الدهون ..
بعض الناس تبدأ ترتخي طبقة الدهون العندهم ومكان الجفون يصير غائر ويظهر كأنه هالات سوداء

النوع دا بجي مع التقدم في العمر وبداية التجاعيد ، يعني مستبعد تماماً من فئة الشباب
طيب علاجه كيف؟!
زمان كانو بعملو ليهو عمليات جراحية بشدوا فيها طبقة الدهون دي ..

لكن للاسف المنطقه دي جداً حساسة ومعظم العمليات كانت بتفشل ..
حالياً بتتعالج عن طريق الفيلر حاجة فعاله ١٠٠٪ وسريعه وما بتترك اثر .

٢/ الهالات الناتجة من خلل في الاوعية الدموية..
دا النوع الاكثررر انتشاراً واللي عشانه بنقول للعندهم هالات م يساهروا ! لكن هل سببها دايماً السهر؟ طبعاً لا

الخلل البحصل في الاوعية الدموية دي انها تتمدد والدم في المنطقه بتقل حركتو ومع عدم تبادل الاكسجين حيبقى لونه ازرق ويكون شكله ظاهر لينا باللون الغامق دا.

طيب اسباب التمدد شنو؟!
١- السهر والارهاق والاجهاد بكل انواعه وبيتضمن البنات ايام الدورة ، النظر للشاشات لفترات طويلة ..
الحاجه دي حتأثر في نسب الكرتزول وغالباً ما حيصاحبها انتفاخ كمان مش بس سواد ..

٢-التدخين والشرب والاكثار من الاملاح بشكل مفرط والنشويات .. الحاجات دي برضو بتأثر في نسب الكرتزول وفي حجم الاوعيه في تفاصيل طويله ..

٣-نقص فيتامين ك برضو ..
٤-الانيميا..
٥-امراض الكلى..
٦- التحسس والجيوب الانفية—>يزيد من افراز مواد التهابية توسع الاوعية الدموية.

اي اختلال من المذكور بيأثر في الكرتزول والاملاح واكيد في الاوعيه وبيظهر ع شكل سواد او انتفاخ او الاثنين سوا ..

طيب الحل ؟!
نعكس بس
سهر=نوم
اجهاد=راحه
بالنسبة للبنات ايام الدورة يسترخوا ويكثروا من شرب الشاي الاخضر ويعملوا كمادات بارده حول العين ، ويناموا ع مخدات عالية..

البشربو والبدخنوا الحل انهم يوقفوا الحاجات دي..
اللي اكلهم معتمد ع النشويات يزويدوا نسبة البروتين في اكلهم وياكلوا حاجات غنيه بالبوتاسيوم زي البامبي(بطاطا حلوة)، الزبادي ..

واللي عندهم انيميا يحاولوا يعوضوا عن طريق مكملات الحديد وحيلاحظوا تحسن طوالي او عن طريق الاكل ، واللي بعانوا من نقص فيتامين ك يركزوا ع الخضار الداكن زي الجرجير ..

ناس التحسس والجيوب الانفية يبعدوا عن مسببات التحسس + ياخذوا antihistamine طوالي اذا اتعرضوا للمسببات افضل من فرك العين والحك.

لجانب الحلول دي ..
في حقن ثاني اكسيد الكربون co2بتم حقنها في المنطقه والدم كاستجابة للاختناق حيبدأ حيتحرك في المنطقه والاوعيه ترجع لحجمها الطبيعي والحاجه دي جداً فعالة..

وممكن استخدام المنتجات الفيها نسبة كافيين لانو بنشط الدورة الدموية في المنطقة..

٣/ تصبغات الجلد في المنطقة ..
سببها الاول طبعاً الشمس
والمنطقه دي نظراً لرقتها بتتأثر اكثر من باقي الوجه..
السبب الثاني ضعف الكولاجين والالستين في المنطقة —> بعمل خطوط او تجاعيد—> تظهر ع شكل سواد ..

سبب ضعفهم بكون بسبب التقدم ف العمر او بسبب نقص بعد المعادن المهمه زي الزينك والمغنيسيوم والنحاس والحديد أو بسبب زياده نسب فيتامين ب٣ الناتج من زيادة الكلسترول ..

طيب العلاج كيف ؟!
اذا كان تصبغات بفعل الشمس
نستخدم منتجات للتفتيح فيها فيتامين سي او azlic acid حمض الازليك ، واغلب منتجات الهالات بتتكون منهم وفعالين جداً لو كان السبب مجرد تصبغات على الجلد ، وممكن ميزو ثيرابي وليزر اذا بسبب التجاعيد، والاهم التغذية الصح..

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة