زمان أول ما اشتغلت طوارئ
جالنا مريض شاب في أواخر العشرينات في حالة هياج عصبي وسلوك عدواني وبه آثاراعتداء جسدي على هيئة كدمات وسحجات بالوجه والذراعين والفخذين
ثم ما لبث أن دخل في غيبوبة لبضع ساعات وتوفى
أهله لما شافوه وشافوا الكدمات اللي فيه هاجوا وغضبوا وضربوا وكسروا المستشفى

وراحوا جابوا بلطجية وحاصروا المستشفى
طلبت استعجال للتحاليل وطلع أن فيه شبهة تعاطي مادة مخدرة .. الامفيتامين ..
رحت كاتب تقرير الوفاة اشتباه وفاة جنائية واشتباه تعاطي مادة مخدرة وتوضع الجثة تحت تصرف النيابة
وفعلا بعد تشريح الجثة تبين أن سبب الوفاة جرعة زائدة قاتلة من الامفيتامين

وتبين لاحقا ان هذا الشاب كان مروج او ديلر
واتعكش في كمين فخاف لما يتفتش يلاقوا المخدرات معاه راح بالعها
ولما الظابط شك فيه وركبه البوكس
طلع يجري وهرب منهم وطبعا لإن الامفيتامين بيدي طاقة رهيبة في أول تعاطيه فعلااستطاع الهروب رغم أنهم ضربوه للسيطرة عليه
ثم بعدذلك ظهرت أعراض التسمم

طب انا باحكي الكلام ده ليه بقى
لإن اللي يشوف منظر الجثة بالكدمات والسحجات اللي فيها يفتكر ده مات من الضرب
لكن لما ظهرت نتيجة التشريح وبان المستخبي
ظهرت الحقيقة
وظهر انه لا مظلوم ولا شهيد ولا حد داس له على طرف
..
واللي هيفهم الاسقاط اللي انا أقصده
له عندي بوسة
والرجال يمتنعون طبعا