عم يوسف القاضي كان مقضيها كعب داير من الاذاعة للتلفزيون لابواب المسارح بيحاول يقدم اغاني وسيناريوهات عشان بس يغطي تمن علاجه الي ابنه الفقير متحمله لكن محدش اهتم . راح وزارة الثقافة طلب منحة تفرغ بصوله كده وقالوله فوت علينا بعدين . وهو راجع سمع مذيع الراديو الي في القهوة بيقدم
+
+
اغنية لفيروز اسمها زوروني كل سنه مره المذيع قال انها من الفلكلور المصري . تراث شعبي يعني ! عم يونس كان تعبان وحس ان ريقه ناشف طلب من زبون عالقهوة بق ميه وشربه وهو بيسمع مطلع الاغنية وهز راسه وابتسم وهو عينه بتدمع وقال فلكلور 😏 ياللا مجاتش عليها وهو طالع عالسلم سمع عبد الوهاب
+
+
بيغني النيل نجاشي عند الجيران . قعد عالسلم يرتاح ويسمع ويفتكر لما قابل صبي ترزي بيغني حلو وخده من ايده يغني بين فصول المسرحيات الي كان بيكتبها زمان ولما لقى الناس معجبه بيه خده وراح لمنيره المهديه وقال لها ده البطل قدامك في المسرحيه الجايه . واتحول صبي الترزي لمعجزة اسمها
+
+
موسيقار الاجيال محمد عبد الوهاب وبدات علاقته باحمد شوقي الي كان معجب بيه بس هو كبير يعني على انه يكتب اغاني ده امير الشعراء ! لكن الشيخ يونس كان نفسه اكتشافه العجيب ده يغني لشوقي فالف اغنيتين وخلا عبد الوهاب يغنيهم لكن نزل الاسطوانه على انها تاليف احمد شوقي ونجحت جدا بعد ما عمل
+
+
دعايه كبيره لاول اغنيه من تاليف امير الشعراء . اصله كان صحفي كبير وقتها بعد كده احمد شوقي اتشجع وكتب الاغنية الي بيسمعها الشيخ يونس دي ، النيل نجاشي وبلبل حيران واغاني تانيه كتير . ضحك الشيخ يونس ودخل غير هدومه واترمي عالسرير وهو في خياله صورة فلاحه صغيره لابسه عقال كان صوتها
+
+
عجبه اوي فكتب اغنيه بتقول قال ايه حلف ميكلمنيش ده بس كلام وفعل مفيش واداها لعبد الوهاب يلحنها وجاب الفلاحة دي تغنيها فبقت سيدة الغناء العربي ام كلثوم . ضحك الشيخ يونس وقعد يغني بلادي بلادي لك حبي وفؤادي . اصلها اغنيته هو الي مألفها لما كان مصطفى كامل عايز حد يبسط خطبه للعوام
+
+
لانه كان بيقول الخطب طبعا بالفصحى واحيانا بالفرنسية كمان فجاب الشيخ يونس يترجم للناس الكلام ده فاستوحي من خطبه اغنية بلادي الي اصبحت السلام الوطني لمصر بعد ما مات والناس مبتفتكرش غير ان غناها سيد درويش . سيد درويش كان مبيض جير ومحارة غاوي يغني وهو شغال وليه واحد صاحبه يعرف
+
+
الشيخ يونس راحله وفضل يزن عليه يديله كلمات اغنية لفنان مغمور في اسكندريه والشيخ زهق من الزن اداله اي كلمتين في ورقه عشان يخلص منه . شويه ولقى الناس بتغني كلامه الي هو كتبه اي حاجه وخلاص راح على اسكندريه يسأل على سيد قالوله هربان من البوليس ! ليه كده ! اصل سيد اتخانق مع جليله
+
+
فبطحها وفتح نافوخها والبوليس بيدور عليه قعد يلف بالحنطور لحد ما صعب عالعربجي خده لقهوة العربجيه وشربوا شاي وهناك العربجي قال له سيد مستخبي فين راح جابه ونزل بيه مصر وبقى سيد درويش الي لحن وغنى سلام مصر الجمهوري حاليا من كلمات الشيخ يونس في مسرحيه حضرها طلعت باشا حرب بنفسه
+
+
كان كاتبها الشيخ يونس عن خواجه ظالم بيفتري عالعمال ويذلهم والبطله جمعت تبرعات وبنت مصنع وطني للمصريين بعيد عن ذل الاجنبي ولما خلصت المسرحية طلعت باشا حرب راح سلم عليه وقال له انا فهمت الرساله وهنفذها وخرج عمل بنك مصر و المحلة وغيرها كان مدوخ الانجليز يقفلوله مسرحيه يعمل انقح منها
والناس تخرج من المسرح عامله مظاهرات وفي عز مجده سنة 42 سحبه مخبر وعسكري ودوه الداخليه مكتب وكيل الوزاره اداله ورقه وقال له امضي هنا . امضي على ايه ؟ امضي وبعدين هنقول لك مضى على تعيينه مدير لاول اداره لمراقبة المصنفات الفنيه ووكيل الوزارة قال له منعرفش غيرك بتفهم في الحاجات دي
+
+
بس اشترطوا عليه ما يعملش اي عمل خاص عشان ده موظف عام ومش معقول هيراقب نفسه وقالوله امنع الاغاني الخليعة فاول قرار مضاه كان منع اغنية ارخي الستارة الي في ريحنا الي هو كاتبها ولما اتقال له مش خليعه قال الناس اعتبرتها خليعة لانها اتغنت بطريقة خليعة فبقت زي البنت
+
+
الس سوأوا سمعتها . الحقيقة الشيخ يونس من اول ما ظهر دمر سوق الاغاني التافهة والخليعة هو كان صحفي ومؤلف مسرح وقصاص بس زكي مراد لجأله بعد المطربين بقوا ياخدوا اغاني النجف يغنوها عشان مفيش كلمات احسن والنجف دول كانوا ناس كده بيقعدوا على ابواب الخمارات بالرق والطبله
+
+
الناس بتتلم حواليهم فيغنوا يقولوا تعاليلي يابطه والناس ترد وانا مالي هيه وهم بيسقفوا طبعا حاجه حمو بيكا عشرينات القرن 19 فالراجل اهتم وطلع الدرر الي حكينا عنها ولما مسك المصنفات منع كل ما تبقى من التفاهة دي وحدد مواصفات بدلة الرقص الي لسه ساريه لوقتنا هذا بعد ما كانت احيانا
+
+
بتبقى ورقة توت مثلا . فات وقت والراجل حن للفن حب يستقيل رفضوا فضل مسجون في الوظيفه لحد ما بقى 64 سنه وخرج يعرض شغله محدش بص فيه وفضلت فيروز تغني اغنيته زوروني كل سنه مره وينسبوها للفلكلور والتلامذه بينشدوا بلادي ويقولوا بتاعة سيد درويش لحد ما مات الشيخ يونس بحسرته مجهول فقير مريض
جاري تحميل الاقتراحات...