بأكتب لكم تجربة عن مشكلة صحية نعتقد انها بسيطة لولدي سببت له تأخر بالنطق بسم الله نبدأ :
لازم المستشفى اللي تختارينه للولادة يكون ممتاز في التوليد و ممتاز في العناية بالرضع لكن للاسف انا كنت احسب انه الممتازين في التوليد عادة يكونون ممتازين في العناية بالرضع فأول ما ولدت كنت مرهقة و ابر بيديني و لا قدرت ارضع ولدي رضاعة طبيعية فأعطوه حليب بقري صناعي
انا طبعا واثقه فيهم لانهم أطباء و كذا جابوا لي ولدي و فجأة ولدي صار يستفرغ دم طبعا طلبت الدكتور و جاء قال هذا بس شرب دم بالولادة و انا قلبي مو مرتاح و لا مطمن فجأة جاني اتصال على غرفتي الساعه 4 الفجر يطلبون ملابس لولدي لانه استفرغ دم انا هنا اتجننت قلت لهم انتم ما اعطيتوه فتامين
فتامين k بالفم قالوا لا طبعا انا على بالي انهم اطباء و يعرفون واجباتهم طلعوا اخرطي لازم تعلمينهم شغلهم المهم حللوا دمه طلع عنده تكسر بالصفائح الدموية بسبب نقص فتامين k هذا اللي كنت اعتقده اعطوه سيروم و نومه بالحضانه يمكن مدة اسبوع وصارت صحته تمام بعدين اخذت ولدي ورجعنا للبيت
كنت الاحظ اذا رضعت ولدي طبيعي ما يشرق بس اذا رضعته صناعي حليب بقر يشرق و احسه بيموت و مرات يستفرغ الحليب ما كنت افهم اللي يصير و بحثت و اخذته عند دكاتره الكل كان يقولي ولدك وضعه طبيعي و عادي يصير انه يشرق لين يتعلم يرضع و يكبر ما كنت مرتاحة لهذا الكلام بس كل المستشفيات تقول كذا
خاص و حكومي استسلمت و بدأت اتعايش مع المشكلة هذي و اغير له الحليب و اشوف اش الوضع طبعا غير احساسه بالمغص و الصراخ المستمر و لا يرضع الا هو نايم عشان ما يحس بالالم غير الاسهال او الامساك اللي يصير تعبت كنت اسهر و ما كان ينام و اهلي يخافون يتعاملون معاه من كثر ما يشرق يموت بيدهم
بعد 4 شهور صار عنده التهاب رئوي و انا اتسائل ليش كيف صار كذا؟! المهم الدكاتره عندنا بس يصرفون علاجات لكن ما يبحثون عن سبب المشكلة الرئيسية بعدين من بحثي فهمت ان ولدي لما يشرق الحليب يروح اجزاء منه للرئة و سببت التهاب للرئة طيب على قد ما غيرت له الحليب ما نفع و يشرق
المفروض اني ارضعه طبيعي لكن لمشاكل بحياتي اثرت على الهرمونات عندي فالحليب عندي انقطع مهما اكل وكنت اروح العيادة و اقولهم حليبي انقطع و ولدي مو متقبل الحليب الصناعي طبعا ذي العيادة ما صرفت لي حبوب مدرة للحليب و انا ما كنت اعرف انه فيه حبوب تدر الحليب فالذلك البحث و القراءة مهمة
طبعا بالعيادة الخاصة قالت لي عادي اعطيه حليب صناعي هم في البداية يتحسسون و بعدين يتعودون هذا الكلام انقال لي بأكثر من مستشفى سواء حكومي او اهلي صرت على هذا الوضع لين صار 6 شهور و جينا للسيريلاك حسيت المشكلة قلت لكن ما انتهت تماما فدائما يعاني من نزلات معوية و اسهال او امساك حاد
ما كنت مرتاحه للوضع كنت احاول أأكله خضروات و فواكه طبيعية لكن كانت تزيد حساسية بخدوده كانت موجوده من يوم ما ولد و كنت اقولهم عليها بعيادة الاطفال يصرفون لي كريمات و يقولون لي لا احد يبوسه و انا اقولهم ما احد يبوسه احترت وغير كذا يستفرغ الاطعمة الجديدة
قلت خلاص ماعاد بستمر الا على السيريلاك و تستمر الالتهابات الداخلية من الاستفراغ و الاسهال لدرجة رفض الاكل و يوصل للجفاف و ابر مغذية و انا كل اسبوع او اسبوعين منرزعه بالمستشفى احس ان ولدي فيه شيء بس انا ماني فاهمته و الاطباء بس يصرفون علاجات يسألوني اش يأكل و اقولهم و اقولهم احسه
متحسس من الحليب يقولون لي طبيعي كل الرضع كذا يتحسسون و انا ماني مرتاحة بعد مرور سنتين من المعاناة هذي ولدي ما ينطق ما احسه يدرك زي اللي بعمره وزنه تمام بس انا احسه مختلف قلت خلاص لازم ادربه على الاكل و اتفقت مع الجميع سيريلاك مافيه المهم من الصدف اللي رب ضارة نافعة ان اختي لحسته
شكولاته بالفول السوداني طبعا انا ولدي مختلف ما ينجذب للشكولاته و لا اي حلاوة و لا كيك مختلف عن اللي بعمره و كنت استغرب المهم فجأة ولدي جفونه انتفخت و يده اللي مسح فيها الفول السوداني حمرت كان شكله مخيف ما عرفت اش اللي صاير معاه و اختي ما قالت لي انها لحسته شكولاته بالفول السوداني
انا قلت يمكن حساسية غبار و لا شيء و رحت غسلت له وجهه و يده و احس الانتفاخ يزيد المهم جات اختي من غرفتها تصيح تقولي يلا على المستشفى انا اكلته شكولاته بالفول السوداني وهذي حساسية اصلا انا اول مره بحياتي اعرف انه فيه شيء اسمه حساسية من الاكل رحنا المستشفى و اعطوه ابرة الحساسية
جلس الدكتور يتكلم معاية يقولي اللي بعمر ولدك المفروض ينطق و قالي اش يأكل ولدك قلت له عن كل المعاناة اللي اعانيها معاه بالاكل المهم قالي لازم تروحين لعيادة الحساسية و المناعة اكيد عند ولدك تحسس من اطعمة كثيرة وهذا اللي يخليه يرفض الاكل و قالي انه الاستفراغ و الامساك و الالتهابات
الداخلية و الاسهال هذي كلها مظاهر تحسس من الاطعمة و فهمني قد ايش حساسية الفول السوداني قاتله حتى لو لامست جلده تنتفخ الحنجرة عنده و يموت مختنق المهم انا الحقيقة اختنقت و اخذت ولدي لعيادة الحساسية و المناعة و سويت له تحليل دم لجميع الاطعمة اللي تسبب حساسية المهم الصدمة انها كانت
اطعمة كثيرة ما كنت ادري عنها من ضمنها الحليب البقري اللي كان يشرق فيه وهو صغير لان الحنجرة عنده تنتفخ و يشرق و انا يا غافل لكم الله طبعا منعنا من السريلاك لانه فيه حليب بقري بنسبة بسيطة و اي اطعمة فيها حليب زي الشكولاته و غيرها الان الصدمة اش اعطيه وهو رافض يأكل
طبعا اعطاني بدائل حليب جوز الهند وحليب الصويا و حليب الارز و حليب الصنوبر و حليب الابل التراث و الشوفان قريب للسيريلاك و قالي انت اخترعي خلطتك و من اليوم تغيرين له جدول اكله لان حساسية الاطعمة جالسة تضعف عضلات البلع و بالتالي تأثر على المضغ و النطق و يصير مع الاطعمة الصلبة يتهاوع
يعني يبغى يرجع و ما يقدر يبلع الاكل الصلب لان عضلات البلع ضعيفة بسبب التحسس من الالبان الان فهمت انه سبب تأخر النطق عند ولدي هو ضعف عضلات البلع ورفض الاكل الصلب هو ضعف عضلات البلع
الخلاصة: اول مايولد ولدك تأكدي انه تطعم فتامين kاول مايولدولدك رضعيه طبيعي ولاتسمحين لهم يعطونه صناعي ابدالانه ان كان معاه حساسيةحليب يمكن يسبب له نزيف بالمعدة مع نقص فتامين ك حتى لوبتموتين من التعب والالم اول مايولدحللي له دم حساسيةحليب بقري ومكسرات وجوزالهند ولاتتعايشي مع فكرة
انه حساسية الالبان عادية بل على العكس قاتله و مميته لمن يعانون منها الرضاعة الطبيعية مهمة بس لو انت مرأة عاملة لازم فيه بدائل مناسبة ما تسبب لطفلك لا شرقه و لا اسهال و لا امساك و لا مغص و لا استفراغ او صارت ظروف و انقطع حليبك خذي حبوب المدره للحليب لان حساسية الاطعمة تسبب تأخر
نطق و رفض للاكل بسبب المغص و الامساك و الاسهال و هلم جر و تسبب له عقده من الاكل و بالتالي تأثر على نموه و ادراكه
وهذا رابط مهم
kidscareclinics.com
kidscareclinics.com
حساسية الاطعمة و الاكل ممكن تسبب التهابات بالمعدة و ممكن تتحول لسرطان المعدة لا قدر الله لذلك اللي يعاني من القولون لايهمل تحليل حساسية الاطعمة
رابط اضافي
youtu.be
youtu.be
جاري تحميل الاقتراحات...