بكرة ودي اكلمكم عن ثلاث تطبيقات واحسها مهمة مرررررة اذا بتسافر لحالك وتبغى حياه اجتماعية وناس تسولف معاها وتخرج معاها. التطبيقات لحجز الهوستلات وانا باكلمكم اليوم عن الهوستلات خاصة الناس اللي ما يعرفوها.

الهوستلات يا جماعة مو زي ما يتصوروا كثير مكان قذر ينام فيه ١٨ واحد و الحمامات قذرة ومن هذا الكلام اللي بس سمعوه ولا شافوا. لا! الهوستل عبارة عن فندق حقيقة لكن اجتماعي؛ فيه: سرير لك محد ينام فيه غيرك وفرشة سرير جديدة لك اول ما تسكن لكن في ٦ الى ١٢ في الغرفة.

الحمام كل عدد من الاشخاص يتشاركوا مجموعة من الحمامات تتنظف كل ساعة تقريباً "حسب الهوستل" وتكون منفصلة عن اماكن الترويش، برضو فيه مساحات مشتركة للأكل والجلسة عشان تتعرف على ناس ومن هناك ممكن تطلعو سوا.
وهنا تجي شطارتك في اختيار الهوستل.

الهوستل زي الفندق فيه ٥ نجوم "راقي" وفيه نجمتين"سيء". والتقييم من الزوار يصير زي الفندق كيف تعامل الموظفين و الموقع و النظافة والمرافق و الخدمات، لكن الهوستل ينضاف له عامل غير في التقييم وهوا "الأجواء الإجتماعية للمكان". وكلها واضحة في التطبيقات.

الهوستل تجربة غير جربتها مرة وصرت مقدر اغيرها حتى بعد ما الله رزقني فلوس لانو الجو الاجتماعي اللي تاخذه فيها شي رهيب وبكرة باذن الله نتكلم عن التطبيقات و الاختيار كيف يصير.👌👌