رتبها

بعلمكم اليوم كيف تطلبون من ابل او اي موقع امريكي(مايشحن للسعودية) بس بركز على ابل اكثر لأن اغلبكم يبغى ايباد او ماك بوك ومو قادرين نحصله هنا او نحصله بسعر مره مرتفع✨

اول شيء لازم تحطونه ببالكم انه لما تطلبون من ابل بيتأخر الطلب انا جلست طلبيتي عشان توصلني شهر وزياده طلبت ب١٦ جون ووصلني ب٣٠ جولاي

الحين انتم تحتاجون تسوون بريد امريكي وهذا اول شيء لازم تسوونه بقترح لكم موقعين وانتم اختارو الي يناسبكم وبذكر العيوب والمزايا(بحكم تجربتي الشخصية) وكلها مجانية! وكلها بمناطق مافيها ضرايب يعني ماتدفعون ولا ريال زياده على الجهاز(ماعدى الشحن طبعًا)

اول موقع هو MyUS
استخدمته بموقع ابل لأنه تسجل عنواني بأبل بسرعه واعتمدت عليه عكس الموقع الثاني كل شوي يرفض العنوان
عيبه الوحيد انه لما توصل شحنتك عندهم تتسجبل بعد ١٠ ايام او اسبوع
التغليف والحماية مافي احسن منها
توصل شحنتك للسعودية بعد ٥ او ٤ ايام
عطوني ٢٠ دولار هديه👈🏻👉🏻

الموقع الثاني stackey
عيبه الشحن اغلى من MyUS
يرسلون لك الشحنه بنفس تغليفها مايضيفون عليها حمايه
ميزته اول ماتوصل الشحنه تتسجل على طول بخزنتك/عنوانك وتشحنونها متى مابغيتوا عكس MyUS بعد ١٠ ايام تتسجل وتنشحن على طول
لما جيت اشتري من ابل كل شوي يرفض عنواني المسجل عندهم

ادخلوا على المواقع وشوفوا الأفضل لكم واقروا بالتفاصيل اكثر✨

شيء مهم وضروري تحتاجونه قبل تبدون تتسوقون✨ الي هو بطاقة فيزا تسوق من الراجحي او اي بنك تفضلونه

والحين بقول لكم كيف تشترون من ابل بسعر ارخص اول شيء تروحون قوقل وتكتبون Apple education وبتطلع لكم هذي الصفحة

الحين بتشوفون الفرق بأسعار الأجهزة

بعد ماتختارون الجهاز الي تبغونه لازم تكونون مسجلين بواحد من المواقع الي عطيتكم اياها قبل
الخطوات مره سهله نفس اي حساب ثاني بس تأكدوا انكم تحطون ايميل رسمي عشان توصلكم تحديثات مهمه بخصوص طلباتكم!!

بعدها بتطلع لكم هذي الصفحه اذا سويتوا الحساب وسجلتوا دخولكم تضغطون على menu وبطلع لكم عنوانكم الأمريكي ورسميًا صار لكم عنوان امريكي♥️

الحين نرجع لأبل ولازم تمشون على كلامي خطوة خطوة اي خطأ بسيط ودعوا شحناتكم✨

اول شيء تختارون الجهاز الي بخاطركم وتخصصونه زي ماتبغون✨طبعًا تقدرون تكتبون اسمائكم او اي شيء عليه وببلاش

طبعًا الحين في عرض اي ايباد او ماك بوك يجي معهم ايربودز مجانًا او ايربودز برو ب340ريال

بعد ماتضيفون المنتج للسلة بتلاحظون ان الشحن مجاني ومافي اي ضرائب بحكم ان عنوانكم مسجل بمنطقة مافيها ضرائب
الشحن حق ابل مره يتأخر وهذا شيء سيئ مره بالنسبة لشركة كبيره زي ابل

الحين لازم تركزون صح لأنه هذي خطوه مهمه مره!!! الخانتين الأولى الأسم الأول والأخير نفس الي سجلتوهم بالموقع لا يتغير حرف
والعنوان سوو له نسخ لصق لأنه لو تغير ودعوا شحناتكم
وتحت بتكون خانه الأيميل والرقم حطوا رقم الشركة وايميلكم الي استخدمتوه بالموقع