أعتقد إن الريف عموماً في أي بلد هو الانعكاس الحقيقي لحس الجمال عند شعبها، لأن الريف في أي بلد، على عكس المدينة أو العاصمة، بيبقى معزول ومتروك مصيره لأهله يشكلوه بالطريقة اللي تناسبهم وعجباهم، مش لسلطة مركزية على بعد مئات الأميال بتتحكم فيه، لأن حتى لو موجودة غالباً هم اللي

بيخلقوا واقعهم برضو، بمعنى آخر عايز تشوف أي شعب هيخلق واقع وحياة شكلها ايه لو سبته على راحته وماقيدتوش بقوانين كتير اتفرج ع الريف في الدولة دي، واعرف إن دي الطباع ال Raw بتاع الشعب دا وإن قوانين المدينة والعاصمة مجرد فارضة عليه قالب حداثي معين مختلف شوية صغيرة أو شوية كتير عن

طبيعته الأصيلة.
والموضوع مش بيتقاس بجمال مظهر المباني وتزينها بالورد مثلاً أو بتبليط الشوارع وتشجيرها أو باختيار ألوان مريحة للعين ومتناسقة مع البيئة المحيطة أو بالحفاظ ع نظافة المكان، دا كمان بيتقاس بجمال اللبس، عدد كثافة السكان، طبيعة العلاقة بين الذكور والإناث، طرق الاحتفال في

الأفراح والأعياد، وجود مهرجانات سنوية مبهجة كنوع من الاحتفال بالحياة والترفيه عن النفس، والأهم من كل دا، طبيعة العلاقة بالجيران والمحيطين، هل بتسودها الغيرة والغل وانعدام الثقة والتخوين والكراهية والعزلة والمكايدة والعداوة والرغبة في الانتقام والتفاخر بذل الأخرين وكسر مناخيرهم

والخوف والهلع من نظرات المجتمع؟، ولا بيسود المجتمع الصغير دا القبول والود وتجنب الصراعات قدر الامكان والبساطة وحب مساعدة الأخرين والابتسام قدر المستطاع وعدم المبالغة في الادانة والنبذ والرفض أو عدم "التلكيك"
أعتقد سهل نتخيل شكل المدينة والدولة الكاملة الواقع فيها الريفين دول!🤷‍♀️