اللحمة و العيد و اشياء اخرى..
لما كنت صغير شديد يعني، كنت بستغرب كيف الوالد عليه رحمة الله بيقدر يفرق بين لحمة البقر و الضأن لما يقوم بكل ثقة داقي جرس و معلناً حردان الغداء لأنه الطبيخ معمول بلحمة بقر.. الاستغراب دة كان عندي زي استغرابي من الناس الكانت بتقدر تفرق بين [١]+
لما كنت صغير شديد يعني، كنت بستغرب كيف الوالد عليه رحمة الله بيقدر يفرق بين لحمة البقر و الضأن لما يقوم بكل ثقة داقي جرس و معلناً حردان الغداء لأنه الطبيخ معمول بلحمة بقر.. الاستغراب دة كان عندي زي استغرابي من الناس الكانت بتقدر تفرق بين [١]+
طعم الكوكاكولا و البيبسي.. طبعاً تعليل الوالد -عليه الرحمة- انه لحم البقر بيهيج ليهو المصران وهو لعمري ما وجدت له اي دليل خلال اكثر من ٢٠ سنة في المجال الطبي.. [٢]
اللحمة عندي دائماً كانت مصدر دهشة ويمكن عشان الواحد اتربى وسط اهل ابوه في بري الدرايسة وهم ناس بيعزوا اللحمة جدا جداً.. كنت بندهش اكتر لما امشي في الويكند (ياها خميس و جمعة) نبيت في بيت جدنا في أم درمان.. المدهش ما كان انه اهلي في امدرمان غداء الجمعة عندهم ثابت طبيخ رجلة [٣]+
لكن كان لحمة الملاح البيطلعوها في الصينية و محرمين أكلها.. طبعاً أنا كواحد جاي من بري و بدوس لحمة الطبيخ -كما وجدنا عليها اباؤنا- كانت في غالب الظن بتثير في نفوس خالاتنا و خيلانا الشفقة لأنه اولاد اختهم ضاربين اوتوكيت.. [٤]
في بري، لحمة الطبيخ ما بيفضل منها الا العضم، ودة لعله بيفسر بكل وضوح كيف انه جركاس (كلب الحلة) بتاع بري ضعيف و تعبان مقارنة بكلاب ام درمان الضاربة اللحمة واحنا كنا مفتكرين الشغلة حرورة قلب.. [٥]
أيام قطر، وفي اخر كم سنة، والناس في نهايات العقد الرابع، كانت الشلة بتفتش لسبب عشان تكون في لمة في الويكند و يكون في خروف في الصاج.. كمعشر اطباء كانت في همهمات عشان تطمن البقية انه الاكل دة صحي لأنه وجبة بروتينات عالية.. [٦]
طبعاً في قطر دي بدون خجلة الواحد اول مرة يتعرف على عالم لحم البقر beef.. لا يمر اسبوعين الا والواحد مع فرده في مطعم steaks و ضارب اللحمة.. صاحبنا اللي كان معانا في قطر و حكينا ليهو عن اعجوبة شرائح اللحم البقري beef steaks [٧]+
حلف يمين مغلظ انه دة دلع و حركات ترف منكم ساي وانه مافي لحمة احلى من خروف الصاج.. وقد كان، كفر بعد ايمان، و بقى صاحبنا من الناس البتحرك الشباب؛ ح تمشوا تضربوا steak متين؟.. طبعاً ضلوع البقر دي علم لدني عديل لا يتسع المجال لذكره.. [٨]
قبل كم شهر شاهدت لي وثائقي آخاذ في نتفلكس اسمه The game changers او (مغيري اللعبة) و الفيلم باختصار بيتكلم كيف انه الاكل النباتي صحي اكثر لينا كأفراد و كيف انه الرياضيين الاكلهم نباتي اقوى و اكثر تحملاً مقارنة بالبيضربوا اللحمة.. [٩]
والفيلم بيمشي لقدام و يتكلم كيف انه اكل اللحوم بيؤثر على الاحتباس الحراري و تغيير المناخ بسبب توسع صناعة الماشية على حساب القطاع النباتي.. المهم، الفيلم معمول بطريقة ممكن تلف للزول رأسه.. اذكر اني حكيت عنه تاني يوم للشباب المعاي في الشغل هنا.. [١٠]
بعد اسبوع واحد فيهم قلب بقى نباتي قح تأثراً بالفيلم و شكرني جداً.. وزميلنا ثاني اصلاً كان نباتي شكرني انه الفيلم ثبته على الايمان بتاعه وانه اخلاقياً من واجبنا كلنا كحيوانات مختلطة التغذية نقلب و نبقى نباتيين عشان ننقذ كوكب الأرض.. [١١]
الكلام دة لف لي رأسي شوية، خصوصاً انه الواحد مما وصل الغرب وهو بيعقد في المقارنات النفسية و الاخلاقية.. حقيقة، كل الفلسفة دي ضاعت و سقطت مع اول لمة غداء مع شبابنا في الشغل لما بعضنا قرر يطلب brisket، وهو امر لو تعلمون عظيم.. [١٢]
تاريخياً كدة، من منطلق شخصي بحت، و على مر السنين كان العيدين بيمثلوا لي حاجتين.. الحاجة الاولى مع عيد الفطر الصحن الكبير ومردوم بسكويت النشادر و كباية شاي اللبن الكبيرة.. الصحن دة بيمثل فطور و غداء اول يوم في العيد.. [١٣]
الحاجة دي تأثيرها الاساسي بتكون مرة واحدة بس في السنة، صباح اليوم الأول لعيد الفطر.. بعد كدة ما بتقدر تصل لنفس النشوة مهما حاولت.. ولعله تأثير الصيام ما قبل العيد بيلعب دور أساسي في اسطورية الاحساس.. [١٤]
الحاجة الثانية فطور عيد الضحية (اظننا الشعب الوحيد الما بنقول اضحى).. اها الواحد كان بيكون حارس المنقد و الصاج حراسة جد مع وجود بعض الاختلاسات هنا و هناك بحنك تفقد جهوزية اللحمة.. الوالدة بتزبط تقريباً اغلب لحمة الخروف لفطور اول يوم.. [١٥]
الواحد بيكون حريص انه ما يدخل اي حاجة ثانية في حلقه؛ لا سلطة لا عيش لا يحزنون.. و ختمة فطور اول يوم دي ما بتكون نموذجية الا مع شربوت كارب، و الشربوت ذاته لو ما خلاك تدخل في سابع نومة نص النهار بيكون ذاته ما أصلي.. جارتنا رقية -الله يرحمها- كانت بتعمل شربوت منتهي الروحانية [١٦]
بعد الكلام الكتير دة كله، الواحد على كبر كدة لغى الاضحية من حساباته.. ما عشان تكاليف، ولا عشان انسانية النباتيين و الاحتباس الحراري، لكن بكل بساطة لأنه اكتشف انه ما وجدنا عليه اباؤنا و جدودنا دة ليس من الدين في شئ.. [١٧]
والواحد عملاً بأن يفعل ما يقول و يقول كما يفكر، فلازم يكون منسجم ومريح باله.. ايوة دة قصدي.. يعني قصة تضبح كل سنة عشان تفتدي اولادك دة ما عنده اي سند ديني مقنع.. ولست بمعرض الحديث عن فتفتة الدليل و البرهان لما سبق، عشان اقنعك يا عزيزي القارئ [١٨]
اللي انا متأكد انك بطنك بتكون طمت لما وصلت للفقرة دي، لأنه البحث و الوصول لنتائج تقنعك دي مسألة بتخصك ومفروض تبحث فيها بنفسك اذا حبيت طبعاً.. فما ح اجيب الدلائل العقلية في ان الفداء لإبن سيدنا ابراهيم كان من الله و ليس من ابوه، [١٩]
ولا ح احاججك في انه ابن الذبيح مقصود بيهو سيدنا اسحق وليس اسماعيل.. ولا ح اقول ليك انه الهدي (القربان) ما مذكور في القرآن الا في حتة شعائر العمرة و الحج و محصورة كمان بمكان محدد.. فدة كله واجبك انت تفتش عنه لو حبيت.. [٢٠]
أذكر للطرافة انه الموضوع دة فتحناه قبل كم سنة في قروب واتساب يجمعنا بأصدقاء و احباب فواحد صاحبنا قريب فكرياً مني وهو من عشاق اللحمة ومتبتل ورع في مطابخها و مطاعمها؛ قال لي بالحرف الواحد: شوف يا هشام المهدي، اي شي ما عندنا فيهو مشكلة بس بالله ما تتكلم لينا في اللحمة دي [٢١]
انتهى-
انتهى-
جاري تحميل الاقتراحات...