بعطيكم طريقة صناعة القهوة باداة #الكيمكس chemex راح تحتاج ١-ورق ترشيح(فلتر) ٢-ميزان دقيق صغير ٣- قهوة فلتر مطحونة ٤- غلاية ٥-اداة صناعة القهوة chemex او v60 #قهوه_مختصه #كافيهات_الرياض
1-بسم الله نبدا بالفلتر في نوعين من الفلاتر في فلتر على شكل دائري وفيه فلتر على شكل مربع. ما تفرق استخدامها اهم شي تسوي شكل مخروط زي الصور الجايه، الطريقه هي انك تخلي ثلاث طبقات من الورقه على جهة "السباوت" الانبوب اللي تصب منه القهوة والجهه الثانيه طبقة وحده وتكون خفيفه
2- الميزان والغلاية عادي مايحتاج شي غالي الغلاية موجوده في كل بيت مايحتاج تشتري حقت دريب، الميزان بس اللي تحتاج تشتريه وتلقاه رخيص في امازون السعودية او اكتب ميزان دريب في قوقل وبيطلعلك انواع كثيره.
3- طحنت القهوة، هذي أهم خطوة الطحن لازم يكون على طريقة القهوة الكيمكس. تكون الطحنه (متوسطه غير ناعمه)، اذا انت تطحن في البيت بوريك الصور يمكن تساعد في الوصف واذا ماعندك طاحنة اطلب من نفس القهوة المختصة اللي تروحلها يطحنون لك اياها بطريقة الكيمكس وهذا الخيار الاسهل
4- حط الفلتر على الكيمكس بنفس الطريقة اللي شرحتها سخن الموية من الغلاية واغسل الفلتر بالموية الحارة. انت كذا بتتخلص من طعم ورق الترشيح وتسخن القزاز عشان القهوة لما تنزل ما تبرد، بعدها كب الموية ورجعه فوق الميزان وصفره
5- الوزنية المعتادة هي ٦٠ قرام قهوة = ١ لتر موية(١٠٠٠قرام) يعني ١٦ قرام موية لكل قرام قهوة طبعاً اذا انت تحب القهوة ثقيله عادي تزيد قهوة حاول انك كل يوم تجرب تزيد ٥ قرامات قهوة او تنقص ٥ قرامات لين تلقى الوزنية اللي تجيب راسك
6- حط #القهوة بنص الفلتر صفر الميزان وسخن الغلاية. عندك مرحلتين الحين اول مرحلة راح تصب ثلاث اضعاف كمية القهوة يعني لو انت حاط ٢٠ قرام قهوة صب ٦٠ قرام موية. اهم شي لا تصب بسرعة عشان الموية ما تنزل وتخترق الفلتر وركز انك تصب على القهوة بس، وحاول انك تغطي القهوة كامله بالموية.
7- الحين نبغى نجانس القهوة مع الموية بحركة بسيييطه امسك الكيمكس وحركها مع او عكس عقارب الساعة لمدة ١٠ ثواني زي المقطع اللي مرفقه بعدين وقف وخلها لمدة ٤٠ ثانية عشان يطلع غاز ثاني اوكسيد الكربون اللي يعطي القهوة طعم حامض
8 - بعد الانتظار ٤٠ ثانية صب باقي الموية بشكل دائري عشان توصل الموية للقهوة اللي بالاطراف وراقب الميزان لين توصل قرامات الموية اللي تبغاها يعني لو على المثال حقنا (٢٠ قرام قهوة) صب موية ووقف لما توصل (٣٢٠ قرام) من الموية (٢٠ x ١٦ = ٣٢٠)
9- الحين عليك انك تنتظر لين ما تنزل الموية وما يبقى الا القهوة المطحونة شيل الفلتر وصبلك فنجان قهوة، المفروض تخلص في ٤ الى ٥ دقايق اذا زاد الوقت عن كذا او تأخرت اعرف انه في شي غلط سويته وراجع خطواتك، او غير وزنية الطحن
والحين يمديك تجرب جميع انواع #القهوة_المختصة انا عن نفسي كل اسبوع اروح محلات القهوة المختصة واجرب نوع قهوة جديد انت لو بتستخدم اداة الكيمكس ايش اول نوع قهوة راح تجربه؟
جاري تحميل الاقتراحات...