احاول اضحك نفسي شوية . اول مرة رحت فرنسا كان سنة 1992 وكان معايا ابراهيم اصلان وحيجيلنا من سويسرا بهاء طاهر وجميل عطية ابراهيم . وصلنا فندق رويال كاردينال اللي في شارع المدارس " ري ديزيكول " اصلان راح غرفته وانا دخلت غرفتي قلت لي رجلي بتاكلني مش حاقعد . حاخد حمام ونمشي .
نروح شارع شان جيرمان ونروح سان ميشيل ونتفرج علي كنيسة نوتردام دي باري وكل يوم نروح حتة بين الندوات . لسة حادخل الحمام لاقيت الباب بيخبط فتحت لاقيته جميل عطية ابراهيم قال لي انا لسة واصل ونازل معاكم في نفس الفندق ، فين اصلان قلت له في الغرفة اللي جنبي
قال لي طيب حاروح له واستحمي والبس بسرعة علشان اخدكم تاكلوا طعمية عند محل حلو اوي . بصيت له وضحكت وقلت له ياجميل احنا سايبين الطعمية بقالنا ست ساعات . خدنا مطعم اسماك أو فروي دي مير ولا حتي بيتزا ولا كريب . روح استناني مع اصلان علي ما اخلص .
لبست ونزلنا رحنا السان ميشيل وعدينا نهر السين اتفرجنا علي نوتردام دي باريس . رحنا مشي علشان نتفرج علي كل حاجة والمسافة مش بعيدة . خدنا خريطة من الفندق . وسهرنا واكلنا كريب ورجعنا اتعشينا في الفندق . واحنا ماشيين اصلان همس لي قال لي جميل عمل حاجة غريبة جدا . ايه يا اصلان ؟
قال لي سالني معاك سجاير كليوباترا طلعت له علبة من الخرطوشة اللي جايبها معايا شرب نصها في تلت ساعة . استغربت جدا وبعدين جميل اشتري علبتين مارلبورو عطي اصلان واحدة قال بدال الكليوباترا اللي نسفتها وبأه كل يوم يشتري علبة مارلبورو يديها لاصلان تعويض .
جميل مامشيش معانا تاني وقال لنا انا عايش في سويسرا ومش فارقة معايا وباريس عارفها كويس . اصلان بقي يمشي معايا لكن مابيتكلمش انجليزي ولا فرنساوي وانا باتكلم انجليزي وشوية فرنساوي فبقيت اعمل له كل حاجة وباه هو من غير كلام لحد يوم السفر . في المطار قال خليك جنبي عايز الف اشتري حاجة
في السوق الحرة . مشيت شوية وبابص مالقتوش جنبي . استغربت . دا احنا مامشيناش كتير . رجعت للكراسي اللي كنا قاعدين عليها في انتظار الطيارة لاقيته قاعد . سالته رجعت ليه بسرعة . قال لي ابدا . دخلت محل شرايط تسجيل وراديوهات وفاكرك جنبي مالقتكش الراجل كلمني فرنساوي اتربكت
سالته يو سبيك انجليش قال لي ييس سلمت عليه وقلت له فيري جود فيري جود ورجعت قعدت مكاني . وبكرة ولا بعده احكي لكم عن الزيارة التانية بعد سنتين واللغة الفرنسية وانا مع اصلان والبساطي وعفيفي مطر . افك نفسي شوية
جاري تحميل الاقتراحات...