رتبها

#مجانية_التعلم وتعميمه تتنسبش لحد أو عصر لوحد
1-طالب بيها عرابي والنديم ومحمد عبده
2-طالب بيها مصطفى كامل ومحمد فريد
3-طالبت بيها ثورة 1919 وفرضتها للابتدائي في دستور 1923
4-حكومة الاحتلال عصلجت في التطبيق فكافح طه حسين لحد ما طبقتها بعد 20 سنة
5- 👇

5-مجلس النواب-لأن أكتره إقطاعيين- كان بيرفض يعمل الاعتمادات اللازمة لنشر المدارس في الريف رغم تطبيق المجانية عشان يقلل فرصة اللي يقدرو يتعلمو
6-كافح طه حسين وغيره عشان يجيب مجانية الثانوي وطلع بيها قرار قبل ثورة 1952 بس مش عارفة اتطبق قبلها ولا بعدها
7-رفض فاروق مجانية 👇

7-رفض فاروق ومعظم البرلمان مجانية الجامعة بحجة هتطلع شيوعيين+نجيب مين يزرعلنا الأرض ويخدمنا
8-ثورة 23 يوليو طبقت تعميم مجانية التعليم الابتدائي والثانوية بنشره ف كل قرية وعمل مئات المدارس سنويا لتسهيل وصول التعليم لكل مصري
9-لقلة الفلوس حولت الثورة بيوت الإقطاعيين في القرى لمدارس

10- حققت ثورة 23 يوليو حلم في مجانية التعليم المجاني وحطت حق التعليم المجاني لكافة مراحل التعليم من الابتدائي للجامعة في الدستور عشان ميجيش حاكم ويلغيه بقرار أو بمزاجه
11-عملت الثورة جامعة أسيوط كأول جامعة في وجه قبلي عشان تسهل وصول الجامعة للناس هناك اللي يقدروش يسافرو القاهرة

12-وبكدة يبقى حط التعليم المجاني العام الابتدائي كان بقوة ثورة 1881 و 1919 لما اتحط في دستور 1923، وحط التعليم الجامعي المجاني في الدستور كان بقوة ثورة 23 يوليو
13- عمل قانون بمجانية التعليم لوحده مش كفاية.. الرك على إن الحكومة من قلبها تهتم بنشر المدارس وتوصيلها لكل السكان 👇

14- الحكومة الخاضعة للاحتلال قبل #ثورة_23_يوليو اتجبرت بكفاح الثورات أو ناس زي مصطفى كامل وطه حسين إلخ تطلع بمجانية التعليم قوانين أو تحطه في الدستور، لكن كانت بتماطل في التطبيق وبناء المدارس
والحجة دايما كانت "قلة الميزانية"، أو "الخوف من انتشار الشيوعية بين المتعليم" إلخ

15-لما جت ثورة 23 يوليو كانت امتداد لثورة 1881 ومصطفى كامل ومحمد فريد و 1919 في إصرارهم على تعميم التعليم المجاني..
فتوفرت لأول مرة "إرادة الدولة" في نشر التعليم
فمن أول سنة للثورة وهي بتخصص ميزانية كبيرة لنشر المدارس، وضمت للميزانية دي الفلوس اللي اتصادرت من عيلة محمد علي

16- فلسفة مجانية التعليم لحد الجامعة مش مجرد يطلع ناس معاها شهادات عالية
لكن إن الوظايف والمناصب والمراكز ما تبقاش "حكر" على اللي معاهم فلوس أو العائلات اللي كونت ثرواتها أيام الاحتلال
لأن تسهيل تعليم كل الناس من كل المستويات هيزود فرص الكل في حكم بلدهم وفي ثروتها

وعشان بواقي الاحتلال والإقطاعيين وأي حد كاره إن مصر تبقى للمصريين، وعايزينها تبقى لشوية يعملو طبقة لوحدهم "إيليت" فهنلاقي دعوات إلغاء مجانية التعليم شغالة على ودنه بألف حجة
لكن الهدف الحقيقي هو إنهم يرجعو يحتكرو مصر لطبقة وغالبا طبقة مستوردة

وإن كان التعليم الجامعي بقى دلوقت بيطلع دفعات عددها فوق الوظايف المتوفرة للجامعيين
فالحل مش يتلغي التعليم المجاني.. وترجع البلد لطبقة بتكره المصريين (الفلاحين)
لكن إن استراتيجية الدولة تحبب المصريين في الحرف والصناعات اللي مش محتاجة جامعة
وننشر الاحترام اللازم ليها ولأصحابها

ويتقطع لسان كل اللي يعتبر كلمة صنايعي، مزارع، سباك، نجار، ميكانيكي، إلخ شتيمة
بالعكس.. يرجع (زي ما ثورة يوليو نفسها كانت بتعمل في فيلم #الأيدي_الناعمة مثلا ) يكون الشغل اليدوي والحرف اللي مش عايزة جامعة محترمة وأهلها يتوصفو بالراقيين والمتحضرين
فبكدة هيخف ضغط الإقبال ع الجامعات

الخلاصة..
1-مجانية التعليم في مصر الفضل فيها ممدود من القرن 19 لحد ثورة 23 يوليو
ولازم نحفظ حقوق كل الناس،نقفلهاش على عصر واحد
2-المجانية أمن قومي لمصر..وإننا نلغيها عشان ترجع البلد لناس بتفتخر بأصولها الأجنبية وتكره تعليم الفلاحين وعايزاهم يرجعو فواعلية عندهم فده أكبر خطر
(تم)🌹