رتبها

((ثريد)) المعسكر:
قصة حقيقية من الDM.
تابع ل:اغرب القصص الحصلت مع الناس
.
.
لازم نعرف لنو نحن ناعايشين ف العالم دا لوحدنا وانو زي ما اتخلقنا نحن اتخلقو معانا كائنات تانية.
.
.
رتويت ⭕ رتويت ⭕ رتويت ⭕

حصلت القصة في بداية ال2013. قدمت وقبلوني في قوات خاصة وكنا في معسكر لمدة تلاتة شهور ف مكان اسمو نوارا قريب من منطقة الشكينيبة. وكان جات فترة العيد وكنا قرابة ال 800 نفر وماعندنا غير 3 دفارات وترلة فا قررو انو نرجع بالحاجات المتوفرة دي.

والضابط المكلف علينا ورانا الكلام. دا العايز يرجع يركب والماعايز ينتظر. كلنا كنا عايزين نرجع ونهرب من جحيم المعسكر. وركبنا والزحمه كانت ما طبيعية ممكن عادي تموت من الزحمه ولا نفسك ينقطع ويلا يتوطو عليك وفي ناس اتوطو عليهم. ولحدي هنا القصة ما بدت

كنا ف الدفار والزحمه شديدة لمن الدفار يمشي يمين وشمال والعساكر التعلمجية راكبين فوق ما بخلوك تطلع فوق ولا تحاول تبقى عالي وتجر نفس الساعه ٢ بليل وصلنا المشاريع الزراعية وكانت الدنيا برد شديد حصلت مشكلة ف الدفار القدامنا فنزلو العساكر يشوفو في شنو..

انا مسكت ركن وقلت لصاحبي انا نازل لو عايز تنزل ارح معاي وبنلقى طريقة بنرجع بيها الخرطوم رفض. قمت نزلت براي واتديست في خور لحدي ما اتحركوا ومشوا

جات الساعه ٢ وحاجة نص الليل والجو بارد شديد لمن برجف من البرد طلعت على الظلط وبقيت ماشي على اساس القى عربية اتقدم معاها. ماكان في اي شي بعد شوية سمعت صوت حاجة ماشة وراي وبتتكلم!! وبتسرع تقرب علي وانا ابداً ما اتلفت وماسك ف لساني (اعوذ بكلمات الله التامات من شر ما خلق) ولسة.

ماشي والدنيا ليل وبرد ومافي غيري ف الشارع والصوت دا بوراي وبتكلم كلام غريب زي الطلاسم كدة وانا حالف ما اتلفت وعارف انو لو جريت ولا مسكتني خوفة شديدة ممكن تحصل لي حاجة فضلت ماشي لحدي ما لقيت لي مظلة معمولة من طوب وفيها سقف زنك خشيت فيها.

وانا قاعد ف المظلة الصوت واقف بوراي ولسة بيتكلم بالطلاسم الغريبة والاصوات الاغرب حسيت براسي تقل اتمدا كانو لو مديت يدي قدامي ممكن المس جبهتي. فأجئة من بعيد لمحت نور عربية قمت وجريت وقفت فنص الشارع عشان يقيفو لي وبأشر ليهم لحدي ما قربت مني العربية.

عشان ما تضربني العربية انا زحيت على اليمين والعربية زحت شمال وسامع الناس الجوا العربية (اعوذ بالله من الشطان الرجيم) قايلني جني! ومشوا.. بعد ما العربية بعدت سمعت صوت من ناحية المظلة(مااشي وين ومخلينا ونحن ماشين معاك المسافة دي كلها!!!!)..

انا هنا الخوف بدا يتمكن مني ودقات قلبي زادت وكان اول مرة اخت عيني فعيونا واركز معاها كان شكلا غريب شديد واشبه بالخيال من فوق جسم مرا بس من تحت زي السمكه وواقفة ف السما بتتحرك يمين وشمال ما خفت منها خفتا من الاتنين الوراها اشكالهم من تحت زي رجلين الحمير ومن فوق وشوشهم زي الغوريلات

قالت لي تعال وانا ماقادر اتكلم وحيلي بارد قلت ليها انتو منو وعايزين شنو ما اردت لي قال لي تعال وبيني وبينها كان الظلط عايز اتحرك عليها قالت لي اقيف. بعديها قالت (خدم) الاتنين الوراها اتحركو وركعو ليها في الارض وعملت ليهم حركه كدة فلمح البصر اختفو !!!!؟

بقيت بقول سري اعوذ بكلمات الله التامات من شر ماخلق واعوذ بالله من ااشيطان الرجيم وخايف اقولا بصوت عالي وهي زي البتنهر فيهم وبتعاين فوق! فجأة كدة بقيت ما بين صاحي ونايم. حلمان ولا واعي ماعارف روحي فتحت عيوني لقيت نفسي فمكان تاني؟ مكان تاني خالص بمعني الكلمه؟؟

لقيت نفسي ف مكان كدة الحيط من زجاج وشايف عربات طايرة ف السما وناس صغيرة ماشة وبنيان حديث شديد والغطا المتغطي بيهيو دافي وناعم شديد من حرير ولا من شنو ماعارف والدمورية الكنت لابسا نضيفة ومعطرة.

جات داخلة علي المرا ديك ومعاها بتين واول مادخلت الحراس الواقفين ف الباب اختفو قالت لي ديل بناتي جوية وجويان. ولابسات زي لبس مضيفات الطيران بالظبط بس بدل الطاقية لابسات تاج. وفي ناس حتقول الكلام دا تخيلات ولا خرف مني لكن اقسم بالله دا الحصل والبنات جميلات جمال ماعادي.

جسمهم قريب للقزاز ممكن تشوف الدم جاري فعروقهم. قالت لي نحن جن مسلم وديل بناتي اختار واحدة فيهم وعرسا وطلعت من الغرفة جو قعدو معاي ف السرير وانا في نصهم لا لمستهم ولا لمسوني ولا هم بيتكلمو ولا انا. واسمر الوضع كدا سبعه ايام وانا ماعارف حسيت بيها كيف ولا حسبتها كيف لكت متاكد سبعه.

جاتني تاني راجعه بعد الفترة دي قالت لي ليه ما اخترت فيهم واحدة ماعجبوك ولا شنو ثلت ليها انا عايز ارجع اعيد مع اهلي وبجي بنتفاهم قالت خلاص اي واحدة تجيب ليك خادم يساعدوك لحدي ما تجينا بعد العيد قامو البتين واي واحدة جابت خادمه والخادمات زيهم بس لابسات حجول ف رجولهم وما لابسات تاج.

وشرطنا معاك واحد انو ما تكلم زول بالحصل وما تلمس واحدة ف الخدم قلت تمام. وطلعو الخدم قالو لي حترجع الصباح فجأة غمضت وفتحت لقيت الدنيا حمار الشروق داك ولقيت نفسي ف المظلة الكنت فيها من اول لقيت قريبة قريبة مشيت لقيت بتاع حافلة بقول مدني الجزيرة ركبت معاهو وانا اول واحد ركبت

اول ما صحيت لمست واحدة من الخدم فجأة اختفو الاتنين ومافي حاجة حصلت... في الحافلة سألت السواق قلت لي انا وين قالي ف(المدينه عرب) سالني جاي من وين قلت ليهو من الشكينيبة....
(والحاجة الخلتني اصدق انو الحصل ماكان حلم انو ملابسي نضيفة شديد وريحتي قوية!)

وصلنا موقف مدني السوق الكبير لقيت الدفعه كلها هناك والناس بتشرب ف الشاي عرفت انو الكلام دا كلو حصل ف ليلة واحدة بس كيف حسيت بيها سبعه ايام ماعارف.... لمن رجعت مشيت لي شيخ انصار سنه لا مشيت لشيخ صوفي ولا لدجال بتاع عمل.. وقرا لي وعمل رقية شرعية وتفسيرو.. ك

تفسير كان انو الله امسك عني حاجة.. وبس الحمد للله وهسي انا فتويتر حبيت اشارك قصتي بدون اتنشن ولا منشن 🙏.
.

لحدي هنا انتهى الثريد ياريت يكون عجبكم.
ماتنسو.
لايك⭕رتويت⭕
ولو من النوع البتحب الثريدات دي والقصص الغامضة تابعني🙏.
.
ولو عندك قصة حابي تشاركا مع الناس اتفضل لي DM.
وشكرا🔥👋

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد