رتبها

ملخصنا الليلة حيكون عن الكتاب دا 📚❤️
EAT THAT FROG
الكتاب بتكلم عن مشكلة ال procrastination أو التسويف والكسل وتأجيل الحاجات المهمه المفروض تعملها وبديك techniques بسيطة تعملها لحل المشكلة
أكيد كلنا سألنا نفسنا دا شنو الاسم الغريب دا..!! 😅😅

الكاتب هنا شبه أصعب مهمة بالنسبة ليك عايز تعملها وهي عبارة عن مهمة مؤثرة جدا في حياتك بالضفدع..!!
ودا كناية عن مثل بيقول..
( إذا كان عليك أكل ضفدعين فبدأ بالأبشع أولا)
فالكاتب بقوليك إذا انتهيت من المهمه الصعبة دي فالباقي حيبقاليك ساهل 💪

كلنا قبل كدا زبطنا المنبه عشان نصحى قبل ساعتين من الجامعة ونقرا شوية.. ولمن يضرب المنبه نعمل ليهو snooze ونقول 5 دقايق وحنقوم ونستمر كدا لحدي ما نصحى مخلوعين مع زمن الجامعة ونمشي الجامعة ونقول خلاص بكرة حنقرا..
وبكره في بكره الى ما لانهاية..!!
طيب البحصل شنو في مخنا بالزبط ؟؟🤔

مخنا بي طبيعتو كسلان وبكون عايز يكون مرتاح.. فلمن يلقاك قررتا تعمل حاجه وفيها مجهود وتفكير حيحاول يذكرك بالحاجات الزابطة وملهية بالنسبة ليك..مثلا لو عايز تذاكر حتلقى مخك بقوليك..
- ياخي ماااا تديها كباية قهوة كدا حتى تجي تقرا ☕
- ياخي مااا تديها نومة ساعتين كدا وتصحى تقرا 💤

دا بالزبط الموضوع الحاصل في أي حاجه بنأجلها في حياتنا وحنلقى إنو بنضحي بي حياة ناجحة على المدى البعيد قصاد متعة لحظية أو زي ما بسميها الكاتب (مسكن لحظي)
طيب الحل شنو؟؟
الكاتب هنا ادانا مجموعة من ال techniques الممكن نستخدمها عشان نتفادى مشكلة التسويف..

1 - Write down your gols
جيب ورقة وقلم واكتب 10 أهداف عايز تحققهم.. راجع القائمة تاني واختار اكتر هدف مؤثر بالنسبة ليك (الضفدع).. مهما كان الهدف دا اكتبو في ورقة براهو وحدد موعد نهائي لي تحقيقه وبعد داك أبدا أبني خطتك لي تحقيق الهدف

2 - Plan every day in advance
كل يوم أعمل قائمة أكتب فيها كل مهامك بتاعت بكرة ودا حيوفر عليك وقت كبير جدا انك تفكر في خلال اليوم عايز تعمل شنو.. رتب الأولويات بي طريقة ABCDE Method.. بحيث أنك تدي كل مهمة وزن حسب أهميتها وحتلقو شرح ال methodفي الصورة دي 👇

3 - Practice creative procrastination
ودي معناها إنك تتعمد التسويف في المهام الماليها داعي.. أعمل قائمة بالمهام دي وأبدا فورا في التسويف فيها.. مثلا أجل إنك تفتح التلفزيون تشوف مسلسل.. أو أجل إنك تضرب لي صحبك العارفو حيمسك بيك زمن طويل في التلفون..!!

والكاتب هنا ذكر كلمة مهمة في إدارة الوقت وهي كلمة (لا)..!! 🚫
في ناس بتتحرج إنها تقول الكلمة دي في حين إنو ممكن تعطله عن حاجه مهمة بالنسبة ليهو!!
قول (لا) بكل ذوق واحترام أو أجل الحاجة دي بعد تخلص من شغلك.. درب نفسك تقول (لا) لي أي شي ممكن يعطلك..

4 - Prepare before you begin
ودي معناها جهز مكتبك وجيب أي حاجه محتاجها لي تنفيذ مهامك بدل كل شوية تقوم وتجيب حاجه وتشتت نفسك..
اقفل السوشال ميديا مثلا وأبعد عن أي حاجه ممكن تفقدك تركيزك وانتا شغال..

5 - Slice and dice the task
ودي معناها انو تقسم المهمه.. يعني مثلا لو عندك مادة فيها theory كتييير ومادة تانيه ساهلة وبسيطة.. أبدا قسم مادة ال theory لي أجزاء كل جزء 30 دقيقة وبعدها أخد بريك وابدا ال 30 دقيقة التانية وأخد تاني بريك وواصل على الأساس دا..

6 - Put the pressure on your self
ودي لخصها الكاتب في إنها القدرة على تحديد الوقت اللازم لإنجاز المهمة..
الكاتب قاليك أي وقت حددتو لإنجاز مهمة زيد عليهو 20% ودا حيكون ال deadline النهائي بتاعك.
كدا إنتا ختيت نظام ذاتي للضغط على نفسك بفرض عليك إنك تستمر وما تكسل من إنجاز مهامك.

7 - Motivate your self into action
ودي قصد منها الكاتب إنو يكون التحفيز حاجه محيطة بيك خلال يومك.. بي إنك تقرا قصص ناس ناجحين مثلا أو بي أي طريقة تعجبك..
يعني باختصار :
Keep motivation as a daily task in your life